یعقوب اُلدوریلیَر، پِطرُس زیندانا دوشیَر
۱۲
شُل واقتلار هیرودیس پادیشاه کِلیسانینگ کَبیر آداملارینی عاذاپلاپ، اُلارا اِذیِت بِرمَگه باشلادی.
۲ اُل یوحنانینگ دُغانی یعقوبی قیلیچ بیلِن اُلدورتدی.
۳ اُل مونونگ یَهودیلِرینگ یورِکدِن راضیدیغینی گُروپ، سُنگرا پِطرُسی-دا زیندان اِتدی. بو واقا پِتیر بایرامی* گونلِرینده بُلوپ گِچدی.
۴ هیرودیس پِطرُسی توتوپ، زیندانا سالاندان سُنگ، هِر بیری دُرت سِربازدان عیبارات بُلان دُرت دِسّه اُنگا قاراوول قُیدی. اُنی پِسَح بایرامیندان سُنگرا خالقینگ اُوونه چیقاریپ، حُکوم اِتمِک نییِتی باردی.
۵ شِیلِلیکده، پِطرُس زینداندا ساقلانیاردی، اِمّا کِلیسا اُنونگ اوچین خودایا ایخلاص بیلِن دُغا اِدیَردی.
۶ هیرودیسینگ اُنی اُرتا چیقارجاق گونونینگ اُنگ گیجه‌سی پِطرُس ایکی سِربازینگ آراسیندا قُشا زینجیر بیلِن باغلی یاتیردی. قاراوول‍لار-دا زیندانینگ گیریلیَن یِرِنده قاپینینگ آغزیندا ساقچیلیق اِدیَردیلِر.
۷ بیردِن خودایینگ پِریشده‌سی گُرونوپ، زیندانینگ ایچینده نور پارلادی. پِریشده پِطرُسینگ قاپدالینا دورتوپ، اُنی توروزدی-دا: «باسیم، تور!» دییدی. دِرِّو پِطرُسینگ زینجیرلاری اوزولیپ، اِلیندِن یِره قاچدی.
۸ پِریشده اُنگا: «قوشاغینگی قوشان-دا، کُووشلِرینگی گِی!» دییدی. اُل شِیله هِم اِتدی. پِریشده یِنه-ده: «دُنونگی گِی-ده، مِنینگ ایزیما دوش!» دییدی.
۹ پِطرُس اُنونگ ایزینا دوشوپ، زینداندان داشاری چیقدی. اِمّا اُل پِریشده‌نینگ اوستو بیلِن بو بُلیان زاتلارینگ حاقیقاتدیغینی بیلمَن، گُزونه گُرونیَندیر گومَن اِدیَردی.
۱۰ اُلار بیرینجی، ایکینجی قاراوول‍لاردان گِچیپ، شَهره چیقیان دِمیر دِروِزَه یِتِنلِرینده، اُل اُز-اُزوندِن آچیلدی. اُلار داشاری چیقیپ، بیر کُچَنینگ بُیی بیلِن یُرِدیلِر. بیردِن پِریشده پِطرُسینگ یانیندان غاییپ بُلدی.
۱۱ شُل واقت پِطرُس اُزونه گِلیپ: «ایندی، حاقیقاتدانام، خودای اُز پِریشده‌سینی یُلّاپ، مِنی هیرودیسینگ اِلیندِن و یَهودی خالقینینگ باشیمدان ایندِرجِک بِلا-قاضالاریندان آزاد اِدِندیگینه آچیق گُز یِتیردیم» دییدی.
۱۲ پِطرُس مونگا عاقیل یِتیرِندِن سُنگ، یوحنانینگ اِنه‌سی مریمینگ اُیونه گیتدی. یوحنا مَرقُس هِم دییَّردیلِر. اُل یِرده کَن آدام اویشوپ، دُغا اِدیَردیلِر.
۱۳ پِطرُس حایاطینگ قاپیسینی قاقاندا، قاپینی رودا آدلی بیر خیدماتکَر قیز آچماغا گِلدی.
۱۴ اُل پِطرُسینگ سِسینی تانیپ، قاپینی آچماغا دِرِک بِگِنجیندِن یانگا ایچِری یُرتوپ، حایاطینگ قاپیسیندا پِطرُسینگ دوراندیغینی خابار بِردی.
۱۵ اُلار اُنگا: «سِن عاقیلینگدان آزاشیپسینگ» دییدیلِر. اِمّا قیز اُز دییِنینی توتوپ دورانسُنگ، اُلار: «بو پِطرُسینگ پِریشده‌سیدیر» گومَن اِدیَردیلِر.
۱۶ پِطرُس بُلسا ایزینی اوزمَن قاپینی قاقیاردی. قاپینی آچانلاریندا، اُنی گُروپ حایران قالدیلار.
۱۷ پِطرُس اُلارا اِلی بیلِن یوواش بُلماقلارینی ایشارات اِتدی. اُنسُنگ خودایینگ اُزونی زینداندان نَهیلی آزاد اِدِندیگینی اُلارا گورّونگ بِردی. سُنگرا: «مونی یعقوبا* و بِیلِکی دُغانلارا خابار بِرینگ» دییدی-ده، باشغا یِره چیقیپ گیتدی.
۱۸ گون دُغاندا، سِربازلارینگ آراسیندا اولی قالماغال توردی. اُلار بیری-بیریندِن: «پِطرُسا نَمه بُلدوقا؟» دییشیپ سُرایاردیلار.
۱۹ هیرودیس پِطرُسی آغتاردی. اِمّا اُنی تاپمانسُنگ، قاراوول‍لاری سُراغا چِکیپ، اُلاری اُلدورمِگی تابشیردی. شُندان سُنگ هیرودیس یهودیه‌دِن قیصریه گیدیپ، شُل یِرده قالدی.
هیرودیس پادیشاهینگ اُلومی
۲۰ هیرودیس صور و صیدون خالقینا قاتی غاضابلانیاردی. اُلار هِم بیرلِشیپ، هیرودیسینگ یانینا گِلدیلِر-ده، پادیشاهینگ باش خیدماتکَری بلاستوسی اُز طارافلارینا چِکیپ، یاراشیق دیلِدیلِر. سِبَبی اُلارینگ یوردی هیرودیس پادیشاهینگ یوردوندان اییمیت آلیاردی.
۲۱ اینه، بِلِّنِن گون هیرودیس پادیشاهلیق لِباسینی گِییپ، تاختیندا اُتوردی و خالقا یوزلِنیپ، سُز سُزلِدی.
۲۲ خالق هِم: «بو اینسان سِسی دَل-ده، بیر خودایینگ سِسیدیر!» دییّپ قیغیریشدیلار.
۲۳ دِرِّو خودایینگ بیر پِریشده‌سی هیرودیسی جِزالاندیردی، سِبَبی اُل خودایی بِییکلِندیرمَندی. شِیدیپ، اُنونگ اِندام-جانی قورچوقلاپ اُلدی.
۲۴ خودایینگ خوش خاباری بُلسا باردیقچا آرتیپ، ایماندارلارینگ سانی هِر گون آرتیاردی.
۲۵ بارنابا بیلِن سولُس هِم اُزلِرینه تابشیریلان خیدماتی یِرینه یِتیریپ، اورشلیمدِن ایزینا دُلاندیلار. اُلار اُزلِری بیلِن بیله یوحنانینگ بِیلِکی آدی مَرقُسی هِم آلیپ قایتدیلار.