عیسی سووی شِرابا اُووریَر
۲
شُندان ایکی گون گِچِنسُنگ، جلیل‌ینگ قانا شَهرینده طُوی بُلدی. عیسانینگ اِنه‌سی-ده شُل یِردِدی.
یوحنا ۲:۱-۱۲
۲ عیسی بیلِن شَگیرتلِری هِم طُویا چاغیریلیپدی.
۳ شِراب قوتاریبِرِنده، اِنه‌سی عیسی یوزلِنیپ: «اُلارینگ شِرابی قوتاردی» دییدی.
۴ عیسی اُنگا: «اِی آیال، مونونگ مانگا نَمه ایشی بار؟ مِنینگ واقتیم هِنیز گِلِنُق» دییّپ جُغاپ بِردی.
۵ اِنه‌سی خیدماتکَرلِره: «اُل سیزه نَمه دییسه، شُنی هِم اِدینگ» دییدی.
۶ شُل یِرده یَهودیلِرینگ یوونوپ-پَکیزلِنمه سونِّتی اوچین اولی آلتی سانی کویزه* باردی.
۷ عیسی خیدماتکَرلِره: «کویزه‌لِری سودان دُلدورینگ» دییدی. اُلار کویزه‌لِری آغیزلارینا چِنلی دُلدوردیلار.
۸ اُنسُنگ خیدماتکَرلِره: «ایندی شولاردان قویوپ، طُویونگ باشلیغینا اَکیدینگ» دییدی. اُلار اَکیتدیلِر.
۹ طُویونگ باشلیغی شِرابا اُورولِن سووونگ نیرِدِن گِلِنینی بیلمِیَردی، مونی دینگه سووی قویان خیدماتکَرلِر بیلیَردی. اُل بو شِرابدان دادیپ گُردی و اُیلِنیَن ییگیدی چاغیریپ، اُنگا:
۱۰ «هِمّه‌لِر ساچاغا اَوَّل قاوی شِرابی قُییارلار. میهمانلار ایچیپ دُیانلاریندان سُنگ، آرزان شِرابی بِریَرلِر. سِن بُلسا قاوی شِرابی شو واقتا چِنلی ساقلاپ قُیوپسینگ!» دییدی.
۱۱ بو عیسانینگ اَوَّلکی گُرکِزِن عالاماتیدی. اُل مونی جلیل‌ینگ قانا شَهرینده گُرکِزیپ، اُز بِییکلیگینی اَشکَر اِتدی. مونی گُرِن شَگیرتلِری اُنگا ایمان گِتیردیلِر.
۱۲ بو واقادان سُنگ عیسی اِنه‌سی، دُغانلاری و شَگیرتلِری بیلِن بیله کَفَرناحوما گیدیپ، اُل یِرده بیرنَچه گون قالدیلار.
عیسی آلیش-بِریش اِدیَنلِری عیباداتخانادان قُویار
۱۳ یَهودیلِرینگ پِسَح بایرامینینگ قُلایلاشیاندیغی اوچین عیسی اورشلیمه گیتدی.
یوحنا ۲:۱۳-۲۵
۱۴ اُل عیباداتخانانینگ حایاطیندا سیغیر، قُیون، کِپدِر ساتیانلاری، شِیله هِم، پول چالشیپ اُتورانلاری گُردی.
۱۵ عیسی طاناپدان شالّاق بِجِریپ، مال-قارالاری بیلِن بیرلیکده هِمّه‌سینی قامچیلاپ، عیباداتخانادان قُووپ چیقاردی، پول چالیشیانلارینگ تاغچالارینی آغداریپ، پول‍لارینی یِره سِچیپ گُیبِردی.
۱۶ اُل کِپدِری ساتیانلارا: «بولاری بو یِردِن داشاری چیقارینگ! آتامینگ اُیونی بازارا اُوورمَنگ!» دییدی.
۱۷ شُندا اُنونگ شَگیرتلِری مُقادِّس یازغیلارداقی «سِنینگ اُیونگه بُلان غایرات مِنی یاقدیرار» دییلِن سُزلِری یادلادیلار.*
۱۸ اُنسُنگ یَهودی باشلیغلاری اُندان: «سِنینگ بِیتمَگه نَمه حاقینگ بار؟ اِگِر حاقینگ بار بُلسا، عالامات گُرکِزیپ، مونی بیزه تاصدیق اِت» دییّپ طالاب اِتدیلِر.
۱۹ عیسی اُلارا: «بو عیباداتخانانی ییقینگ، مِن اُنی اوچ گونده دیکِلدِرین» دییّپ جُغاپ بِردی.
۲۰ یُلباشچیلار: «بو عیباداتخانا قیرق آلتی ییلدا بِجِرِلدی، سِن بُلسا اُنی ایندی اوچ گونده دیکِلتجِکمی؟» دییدیلِر.
۲۱ اِمّا عیسی عیباداتخانا دییّپ، اُز بِدِنینه آیدیاردی.
۲۲ عیسی اُلومدِن دیرِلِندِن سُنگ، شَگیرتلِری اُنونگ بو آیدانینی یادلادیلار. شُندا اُلار مُقادِّس یازغیلارا و عیسانینگ سُزلِرینه ایمان گِتیردیلِر.
۲۳ عیسی اورشلیمده پِسَح بایرامیندا بُلاندا، کَن آداملار اُنونگ گُرکِزِن عالاماتلارینی گُروپ، اُنگا ایمان گِتیردیلِر.
۲۴ اِمّا عیسی هِمّه آداملارینگ یورِگینی بیلِنسُنگ، اُزی هِم اُلارا اینانمایاردی.
۲۵ اینسان باباتدا اُنگا هیچ کیمینگ شاهاتلیغی گِرِک دَلدی، سِبَبی اینسانینگ نییِتینی عیسانینگ اُزی بیلیَردی.