عیسی اورشلیمه گیریَر
۲۱
عیسی بیلِن شَگیرتلِری اورشلیمه قُلایلاپ، زِیتون داغینینگ آشاغینداقی بِیت‌فاجا گِلِنلِرینده، عیسی ایکی شَگیردینی اُودِن یُلّاپ، اُلارا:
۲ «اُوونگیزدَکی اُبا بارینگ. اُبانینگ ایچینه گیرِن یِرینگیزده دانگیلیپ دوران بیر اِشِک و کورّه اِشِگی بیلِن تاپارسینگیز، اُلاری چُزونگ-ده، مِنینگ یانیما گِتیرینگ.
۳ اِگِر بیری سیزه بیر زات دییسه: ”بولار اُستادا گِرِک“ دییّپ آیدینگ، و اُل هِم اُلاری دِرِّو ایبِرِر» دییدی.
۴ بو-دا پیغامبار سِبَبی آیدیلان شو سُزونگ بِرجای بُلماغی اوچیندی:
۵ «اِی صَهیون قیزی!
اینه، پادیشاهینگ سانگا طاراف گِلیَر.
اُل بیر اِشِگه، اِشِگینگ-ده کورّه‌سینَه مینیپ،
فُروتَنلیک بیلِن سانگا طاراف گِلیَر.»*
۶ شَگیرتلِر گیدیپ، عیسانینگ تابشیریشی یالی اِتدیلِر.
۷ اِشِک بیلِن کورّه‌نی گِتیردیلِر-ده، دُنلارینی اُلارینگ اوستونه آتدیلار، عیسی-دا کورّه‌نینگ اوستونه میندی.
۸ جِماغاتینگ کَنسی دُنلارینی یُلا دوشِیَردیلِر، کَبیرلِری-ده باغلاردان شاخالار کِسیپ، یُلا دوشِیَردیلِر.
۹ اُنونگ اُووندِن هِم ایزیندان گِلیَن جِماغات:
«داوود اُغلونا اُوگولِر بُلسون!
خودایینگ آدیندان گِلیَنه موبارِک بُلسون،
آسمانلاردا اُوگولِر بُلسون!» دییّپ قیغیریشیاردیلار.*
۱۰ عیسی اورشلیمه گیرِنده، هِمّه شَهر: «بو کیم؟» دییّپ، جُشماغا باشلادیلار.
۱۱ جِماغات بُلسا اُلارا: «بو جلیل‌ینگ ناصِره شَهریندِن بُلان عیسی نِبی» دییَّردی.
عیسی ساتیانچیلاری عیباداتخانادان قُویار
۱۲ عیسی عیباداتخانانینگ حایاطینا گیریپ، اُل یِردَکی ساتیانچیلاری، آلیانچیلاری قُودی. اُل پول چالیشیانلارینگ تاغچالارینی، کِپدِر ساتیانلارینگ جایلارینی آغداردی.
۱۳ عیسی اُلارا: «مِنینگ اُیوم عیبادات اُیی دییلیپ آدلاندیریلار دییّپ یازیلان، اِمّا سیز مونی اُغورلارینگ جایینا اُووروپسینگیز» دییدی.*
۱۴ عیباداتخانادا کُرلِر، آغساقلار عیسانینگ یانینا گِلدیلِر. عیسی اُلاری شِفا بِردی.
۱۵ یُلباشچی کاهینلار بیلِن دین عُلَمالار اُنونگ گُرکِزِن عجاییپلارینی و عیباداتخانادا: «داوود اُغلونا اُوگولِر بُلسون!» دییّپ قیغیریان اُغلانلاری گُرِنلِرینده غاضابا میندیلِر.
۱۶ اُلار عیسادان: «بولارینگ نَمه دییَنینی اِشیدیَرسینگمی؟» دییّپ سُرادیلار. عیسی اُلارا: «هاووا، اُندا سیز:
”چاغالار و بَبِکلِرینگ دیلینده
شوکور و دُغا اِتمِسینی یاراتدینگ“*
دییِن سُزلِری آصلا اُقیمادینگیزمی؟» دییدی.
۱۷ عیسی اُلاری شُل یِرده قالدیریپ، شَهردِن چیقیپ گیتدی. اُل بِیت‌عَنیا گِلیپ، گیجَه‌نی شُل یِرده گِچیردی.
قوران اینجیر باغی
۱۸ عیسی اِرتیر ایر بیلِن شَهره دُلانیپ گِلیَرکَه آجیقدی.
۱۹ یُلونگ قیراسیندا بیر اینجیر باغینی گُروپ، اُنونگ یانینا گِلدی، اِمّا اُندا یاپراقدان باشغا هیچ زات تاپمادی. عیسی باغا: «موندان بِیلَک سِنده آصلا میوه بیتمِسین!» دییدی. اینجیر باغی شُل واقتینگ اُزونده قوریدی.
۲۰ شَگیرتلِر مونی گُروپ: «اینجیر باغی شُل واقتینگ اُزونده نَدیپ قوریدی؟» دییشیپ حایران قالدیلار.
۲۱ عیسی اُلارا: «سیزه دُغروسینی آیدیارین، ایمانینگیز بُلوپ، شِک اِتمِسِنگیز، سیز یِکه بو اینجیر باغینا اِدیلِن بیلِن راضی بُلمانی، اُندا شو داغا: ”گُتِریل-ده، دِریایا زینگیل“ دییسِنگیز-ده، اُل بُلار.
۲۲ ایمانینگیز بار بُلسا، دُغا اِدِنینگیزده، نَمه دیلِسِنگیز، آلارسینگیز» دییّپ جُغاپ بِردی.
عیسانینگ ایختییاری
۲۳ عیسی عیباداتخانانینگ حایاطینا گِلیپ، تَعلیم بِریپ اُتیرقا، یُلباشچی کاهینلار، خالقینگ یاشولیلاری اُنونگ یانینا گِلیپ: «سِن بو زاتلاری هایسی ایختییار بیلِن اِدیَرسینگ؟ بو ایختییاری سانگا کیم بِردی؟» دییّپ سُرادیلار.
۲۴ عیسی اُلارا: «مِن هِم سیزه بیر سُراق بِرجِک. مانگا جُغاپ بِرسِنگیز، مِن سیزه بو زاتلاری هایسی ایختییار بیلِن اِدیَنیمی آیدایین.
۲۵ یحیی تَعمید بِرمِک اوچین ایختییارینی نیرِدِن آلدی؟ آسماندانمی یا-دا اینساندان؟» دییدی.
اُلار هِم اُزآرا ماصلاحاتلاشماغا باشلادیلار: «بیز: ”آسماندان“ دییسِک، اُل بیزه: ”اُندا نَمه اوچین اُنگا ایمان گِتیرمِدینگیز؟“ دییِر.
۲۶ ”اینساندان“ دییمَگه-ده خالقدان قُرقیاریس، سِبَبی هِمّه‌لِر یحیانی پیغامبار بیلیَرلِر.»
۲۷ اُلار عیسی: «بیز بیلِمزُق» دییّپ جُغاپ بِردیلِر. عیسی-دا اُلارا: «مِن هِم سیزه بو زاتلاری هایسی ایختییار بیلِن اِدیَنیمی آیتجاق دَل» دییدی.
ایکی اُغول میثالی
۲۸ عیسی سُزه باشلادی: «سیز مونگا نَمه دییِرسینگیز؟ بیر آدامینگ ایکی اُغلی بار میشدیق. اُل بیرینجی اُغلونینگ یانینا باریپ: ”اُغلوم، بو گون گیت-ده، اوزوم باغیندا ایشله“ دییَّر.
۲۹ اِمّا اُل: ”گیتجِک دَل!“ دییّپ جُغاپ بِریَر. یُنه سُنگراق مونگا پِشیمان بُلوپ، اُل یِره گیدیَر.
۳۰ یانگقی آدام ایکینجی اُغلونینگ یانینا باریپ، اُنگا-دا شُل سُزی آیدیار. اُل بُلسا: ”بُلیار، آقا، بارارین!“ دییّپ جُغاپ بِریَر، اِمّا گیتمِیَر.
۳۱ بولارینگ ایکیسیندِن هایسیسی آتاسینینگ ایسلِگینی یِرینه گِتیردی؟» اُلار: «بیرینجیسی» دییّپ جُغاپ بِردیلِر. عیسی اُلارا: «سیزه دُغروسینی آیدیارین، مالییات آلیانچیلار و فاحیشه‌لِر خودایینگ پادیشاهلیغینا سیزدِن اُوونچَک گیرِرلِر.
۳۲ یحیی سیزه دُغری یُل گُرکِزمَگه گِلدی، سیز اُنگا اینانمادینگیز، اِمّا مالییات آلیانچیلار و فاحیشه‌لِر اُنگا ایناندیلار. سیز مونی گُرِنینگیزدِن سُنگ هِم اُکونمِدینگیز، اُنگا اینانمادینگیز» دییدی.
اوزومچیلیک و باغبانلار میثالی
۳۳ «یِنه بیر میثالا قولاق آسینگ: بیر یِر اِیه‌سی بار میشدیق. اُل اوزوم باغلارینی اُتوردیپ، داشینا دیوار چِکیَر. شِراب بِجِرمِک اوچین اوزومی سیقماغا بیر چوقور قازیار و بیر سانی گُزِگچیلیک دینگینی قوریار. اُنسُنگ اوزومچیلیگینی باغبانلارا کیرایاسینا بِریپ، اُزی اوزاق یُلا گیدیَر.
۳۴ «حاصیل واقتی گِلِنده، اوزومینگ میوه‌سیندِن آلیپ گِلمِک اوچین، اُل خیدماتکَرلِرینی باغبانلارینینگ یانینا ایبِریَر.
۳۵ باغبانلار اُنونگ خیدماتکَرلِرینی توتوپ، بیرینی یِنچیَرلِر، باشغا بیرینی اُلدوریَرلِر، بِیلِکیسینی-ده داشلایارلار.
۳۶ اوزومچیلیگینگ اِیه‌سی اُنگکودِن هِم کَن خیدماتکَرلِرینی ایبِریَر. باغبانلار اُلارا-دا اُنگکولِره اِدِنلِرینی اِدیَرلِر.
۳۷ آخیریندا اوزومچیلیگینگ اِیه‌سی: ”اُغلومی سیلارلار“ دییّپ، اُز اُغلونی ایبِریَر.
۳۸ اِمّا باغبانلار بیری-بیرلِرینه: ”اینه، بو میراثدار، گِلینگ، شونی اُلدوریپ، میراثینی اِلیندِن آلایلینگ“ دییّشیَرلِر.
۳۹ اُلار اُنی توتوپ اُلدوریَرلِر و اوزومچیلیگینگ داشینا اُقلایارلار.
۴۰ ایندی اوزومچیلیگینگ اِیه‌سی گِلیپ، بو باغبانلارا نَمه اِدِر؟»
۴۱ اُلار عیسی: «بو یامان آداملاری قینچیلیق اُلومه سِزاوار اِدیپ و اوزومچیلیگینی بُلسا میوه‌سینی واقتیندا اُزونه بِرجِک باشغا باغبانلارا کیرایاسینا بِرِر» دییدیلِر.
۴۲ عیسی اُلاردان: «سیز نَمه مُقادِّس یازغیلاردا:
”بِنّالارینگ رِد اِدِن داشی،
اُل بورچ داشی بُلدی.
مونی خودای اِتدی،
بو ناظاریمیزدا عجاییپ بُلدی“*
دییِن سُزلِری اُقیمادینگیزمی؟» دییّپ سُرادی.
۴۳ «مونونگ اوچین سیزه شِیله دییَّرین: آسمانینگ پادیشاهلیغی سیزدِن آلنیپ، اُندان حاصیل آلجاق بیر میلِّته بِریلِر.
۴۴ بو داشینگ اوستونه ییقیلان بُلِک-بُلِک بُلار. اِگِر بو داش بیرینینگ اوستونه قاچسا، اُنی مینجیرادار.»