عیسی ناصِره شَهرینده
۶
عیسی اُل یِری تِرک اِدیپ، اُز اُنوپ-اُسِن مِکانینا گیتدی. شَگیرتلِری هِم اُنونگ ایزینا دوشوپ گیتدیلِر.
مَرقُس ۶:۱-۲۹
۲ سَبَّت گونی عیسی کِنیسه‌ده اُورِتمَگه باشلادی. اُنونگ آیدیان زاتلارینی اِشیدِن کَن آدام گِنگ قالیپ: «بو آدام مونچا زادی نیرِدِن اُورِنِنکَه؟ اُنگا بِیله حِکمِتی کیم بِردیکَه؟ اُل نَدیپ بِیله مُعجِزه‌لِری گُرکِزمِگی باشاریارقا؟
۳ اُل مریمینگ نِجّار اُغلی دَلمی؟ یعقوبینگ، یوشانینگ، یهودانینگ و شمعونینگ دُغانی دَلمی نَمه؟ اُنونگ آیال دُغانلاری-دا بیزینگ آرامیزدا یاشامایارلارمی نَمه؟» دییشیپ، اُلار عیسانی رِد اِتدیلِر.
۴ اُنسُنگ عیسی اُلارا: «نِبینینگ دینگه اُز دُغدوق یوردوندا، قارینداشلارینینگ آراسیندا و اُیونده قادیری یُقدور» دییدی.
۵ اُل بیرنَچه مِریضینگ باشینا اِلینی قُیوپ شِفا بِرمِکدِن باشغا اُل یِرده هیچ بیر مُعجِزه گُرکِزیپ بیلمِدی.
۶ عیسی اُلارینگ ایمانسیزدیغینا گِنگ قالدی.
عیسی اُن ایکی شَگیردینی خالقینگ آراسینا ایبِریَر
شُندان سُنگ عیسی اِطرافداقی اُبالارا آیلانیپ واغیظ اِتدی.
۷ عیسی اُن ایکی شَگیردینی یانینا چاغیریپ، اُلاری ایکی-ایکیدِن یُلّاماغا باشلادی و اُلارا آرخو-جینلاری قُوماغا ایختییار بِردی.
۸ اُلارا شِیله تابشیردی: «یُل اوچین یانینگیزا تایاقدان باشغا هیچ زات آلمانگ. نه چُرِک، نه تُربا، نه-ده قوشاغینگیزدا پول – هیچ زات بُلماسین.
۹ آیاغینگیزا کُووش گِیینگ، اِگنینگیزه آرتیقماچ کُینِک آلمانگ.»
۱۰ عیسی یِنه اُلارا: «هایسی اُیه بارسانگیز، قایدیانچانگیز شُل اُیده بُلونگ.
۱۱ اِگِر آداملار سیزی قابول اِتمِسِلِر، دینگلِمِسِلِر، اُل یِردِن چیقیپ باریارقانگیز، اُلارا قارشی شاهاتلیق بُلار یالی، آیاقلارینگیزینگ تُزونی قاقینگ» دییدی.
۱۲ شونلوق بیلِن، اُلار یُلا دوشدولِر و هِمّه آداملاری توبا چاغیریپ، واغیظ اِتمَگه باشلادیلار.
۱۳ اُلار کَن جینلاری قُووپ چیقاردیلار، اِنچِمه مِریضلِره یاغ چالدیلار، اُلار-دا شِفا تاپدیلار.
یحیی تَعمید بِریَنچینینگ اُلومی
۱۴ بُلوپ گِچیَن زاتلاری هیرودیس پادیشاه-دا اِشیتدی، سِبَبی عیسانینگ آد-اُوازاسی ایل آراسینا یایراپدی. کَبیر آداملار: «یحیی تَعمید بِریَنچی اُلومدِن دیرِلیپدیر، شُل سِبَپلی اُل بو مُعجِزه‌لِری گُرکِزیپ بیلیَر» دییَّردیلِر.
۱۵ بِیلِکیلِر بُلسا: «بو – اِلیاس»، کَبیرلِری-ده: «بو اُوالقی پیغامبارلارینگ بیری یالی پیغامباردیر» دییّشیَردیلِر.
۱۶ هیرودیس بولاری اِشیدیپ: «مِن اُنونگ باشینی چاپدیران یحیی دیرِلیپدیر!» دییدی.
۱۷-۱۸ هیرودیس آدام ایبِریپ، یحیانی توتدوریپدی، اُنونگ اِل-آیاغینی باغلاپ، زیندانا سالدیریپدی. اُل مونی اُز دُغانی فیلیپُسینگ آیالی هیرودیا اوچین اِدیپدی. سِبَبی هیرودیس هیرودیانی اُزونه آیال اِدیپ آلدی. شُنونگ اوچین یحیی اُنگا: «سِنینگ اُز دُغانینگ آیالینا اُیلِنمِگینگ دُغری دَل» دییّپدی.
۱۹ شِیلِلیکده، هیرودیا یحیی قارشی بُلوپ یورِگینده کینه ساقلاپ، اُنی اُلدورمِک ایسلِیَردی، یُنه بو اِلیندِن گِلمِیَردی.
۲۰ سِبَبی هیرودیس یحیانینگ دُغری هِم مُقادِّس آدامدیغینی بیلیپ، اُندان قُرقاردی و اُنی قُریدی. اُنی دینگلِدیگیچه، پِریشان بُلیاردی، اِمّا شُندا-دا هُوِس بیلِن دینگلَردی.
۲۱ بیر گونی میناسیپ فُرصَت گِلیپ یِتدی. هیرودیس اُز دُغان گونی خاطیراسینا کاخداقی اِمیرلِرینی، سِردارلاری و جلیل‌ینگ مُهِم آداملارینی چاغیریپ، طُوی توتدی.
۲۲ هیرودیانینگ قیزی ایچِری گیریپ، راقص اِدیپ، هیرودیسینگ و اُنونگ میهمانلارینینگ گُونونی خوش اِتدی. پادیشاه قیزا: «ایسلَن زادینگی دیله، سانگا بِرِیین» دییدی.
۲۳ اُنسُنگ قاسام ایچیپ، پادیشاه یِنه-ده: «مِندِن نَمه دیلِگینگ بُلسا آیت، پادیشاهلیغیمینگ یاریسی-دا بُلسا، سانگا بِرِرین» دییدی.
۲۴ قیز هِم داشاری چیقیپ اِنه‌سیندِن: «نَمه دیلَیین؟» دییّپ سُرادی. اُل هِم: «یحیی تَعمید بِریَنچینینگ کِلّه‌سینی» دییّپ جُغاپ بِردی.
۲۵ قیز دِرِّو پادیشاهینگ یانینا یُرتوپ گِلدی-ده: «شو واقتینگ اُزونده یحیی تَعمید بِریَنچینینگ کِلّه‌سینی بیر تاباقدا قُیوپ، مانگا بِرمِگینگی ایسلِیَرین» دییدی.
۲۶ پادیشاه قاتی غامگین بُلدی، یُنه میهمانلارینگ یانیندا قاسام ایچِنسُنگ، قیزینگ دیلِگینی بیتیرمَن، ایزینا قایتارماق ایسلِمِدی.
۲۷ دِرِّو بیر جِلّادی یُلّاپ، یحیانینگ کِلّه‌سینی گِتیرمِگی تابشیردی. جِلّات باریپ، زینداندا یحیانینگ باشینی چاپدی.
۲۸ چاپیلان کِلَّنی بیر تاباقدا گِتیریپ، قیزا بِردی. قیز-دا اُنی اِنه‌سینه اِلتیپ بِردی.
۲۹ یحیانینگ شَگیرتلِری مونی اِشیدیپ، اُنونگ جِسِدینی اَکیتدیلِر و اُنی بیر قابردا جایلادیلار.
عیسی بَش مونگ آدامی دُیوریار
۳۰ رِسول‍لار عیسانینگ یانینا ییغنانیپ، هِمّه اِدِن ایشلِری، خالقا اُورِدِن زاتلاری بارادا اُنگا خابار بِردیلِر.
مَرقُس ۶:۳۰-۵۶
۳۱ عیسی اُلارا: «گِلینگ، یِکه اُزومیز بیر بُش یِره گیدیپ، بیرآز دِم-دینچ آلایلینگ» دییدی. گِلیپ-گیدیَنلِرینگ کَنلیگیندِن یانگا، اُلارینگ ناهار اِدینمَگه-ده اِل‍لِری یِتمِیَردی.
۳۲ اُنسُنگ اُلار قاییقا مینیپ، یِکه اُزلِری بیر بُش یِره گیتدیلِر.
۳۳ گیدیپ باریارقالار، حالاییق اُلاری گُروپ تانیدیلار. شُندا هِمّه شَهرلِردِن آداملار پییادا یُلا دوشدولِر و هاولوغیشیپ، اُل یِره اُلاردان اُو باردیلار.
۳۴ عیسی قاییقدان دوشِنده، اولی جِماغاتی گُروپ، اُلارا یورِگی آویدی، سِبَبی اُلار چُپانسیز قُیونلار یالیدی. شُنونگ اوچین اُلارا کَن زاتلاری اُورِتمَگه باشلادی.
۳۵ گون یاشاندان سُنگ، شَگیرتلِر عیسانینگ یانینا گِلیپ: «بو بیر بُش یِر، واقت هِم گیجارادی.
۳۶ خالقی گُیبِر، تُوِرِکدَکی اُبالارا و اِکینچیلیکلِره گیدیپ، اُزلِرینه اییِره زات ساتین آلسینلار» دییدیلِر.
۳۷ اِمّا عیسی: «اُلارا اییمَگه زادی سیز بِرینگ» دییدی. اُلار: «اُندا بیز ایکی یوز کوموش سِکَّه چُرِگ ساتین آلیپ، اُلارا اییدیرِیلیمی؟» دییدیلِر.
۳۸ عیسی اُلاردان: «بارینگ، گُرونگ، نَچه چُرِگینگیز بار؟» دییّپ سُرادی. گُرِنلِریندِن سُنگ اُلار: «بَش چُرِک بیلِن ایکی بالیغیمیز بار» دییدیلِر.
۳۹ شُندا اُلارا هِمّه آداملاری دِسّه-دِسّه اِدیپ، اُتونگ اوستونده اُتورتماغی تابشیردی.
۴۰ شِیلِلیکده، اُلار یوز-یوزدِن، اِلّی-اِلّیدِن دِسّه-دِسّه بُلوپ اُتوردیلار.
۴۱ عیسی بَش چُرِک بیلِن ایکی بالیغی آلیپ، آسمانا باقیپ، شوکور اِتدی-ده، خالقا پایلار یالی بُلوشدیریپ، شَگیرتلِرینه بِردی. ایکی بالیغی-دا اُلارینگ هِمّه‌سینه پایلادی.
۴۲ هِمّه‌لِر اییّپ دُیدولار.
۴۳ شَگیرتلِر آرتان چُرِک بُلِکلِرینی، بالیقلارینگ اُونوقلارینی ییغناپ، اُن ایکی سِبِدی دُلدوردیلار.
۴۴ چُرِکلِری اییِن اِرکِکلِرینگ سانی بَش مونگ آدامدی.
عیسی سووونگ یوزوندِن یُرییَر
۴۵ جِماغاتی اوغرادیپ دورقا، عیسی شَگیرتلِرینه قاییقا مینیپ، اُزوندِن اُنگ بِیلِکی کِنارداقی بِیت‌صِیدا گِچمِگی تابشیردی.
۴۶ عیسی اُلار بیلِن خوشلاشاندان سُنگ، خودایا دُغا اِتمِک اوچین داغا چیقدی.
۴۷ آغشام دوشِنده، قاییق دِریانینگ اُرتاسیندادی، عیسانینگ بُلسا یِکه اُزی کِناردادی.
۴۸ عیسی اُلارینگ قاییقی قینلیق بیلِن کورِک اوروپ باریاندیقلارینی گُردی، سِبَبی یِل اُلارینگ قارشیسیندان اُسیَردی. دانگا قُلای عیسی دِریادا سووونگ یوزوندِن یُریپ، اُلارا طاراف گِلدی و یانلاریندان گِچیپ گیتجِک بُلدی.
۴۹ اِمّا اُلار اُنونگ سووونگ یوزوندِن یُریپ گِلیَنینی گُرِنلِرینده، گُزلِرینه روح گُرونیَندیر گومَن اِدیپ قیغیریشدیلار.
۵۰ چونکی هِمّه‌لِر اُنی گُروپ قُرقدولار. اِمّا عیسی دِرِّو اُلارا سُز آیدیپ: «خاطیرجِم بُلونگ! بو – مِن، قُرقمانگ!» دییدی.
۵۱ اُنسُنگ اُلارینگ یانینا قاییقا میندی، یِل هِم یاتدی. اُلار خاص بِتِر گِنگ قالیپ حایران قالدیلار.
۵۲ اُلار هِنیزِم چُرِکلی مُعجِزه دوشونمَندیلِر، بو اُلارینگ فیکرلِرینه باریپ یِتِنُقدی.
عیسی جِنیسارِتده مِریضلِری شِفا بِریَر
۵۳ اُلار دِریانینگ بِیلِکی طارافینا قاییق بیلِن گِچیپ، جِنیسارِت یوردونا باردیلار و اُل یِرده لِنگِر اُقلادیلار.
۵۴ قاییقدان دوشِن واقتیندا خالق عیسانی تانیدیلار.
۵۵ آداملار یُرتوپ، شُل تُوِرِکدَکی یِرلِره بُیدان-باشا آیلاندیلار و مِریضلِرینی دوشِکلِری بیلِن عیسانینگ یانینا گِتیردیلِر. اُلار هِر صاپار عیسانینگ نیرِدِدیگینی اِشیتسِلِر، مِریضلِرینی شُل یِره گِتیریپ باشلادیلار.
۵۶ عیسی نیرَه بارسا – اُبا بُلسون، شَهر بُلسون یا-دا اِطرافلیق – آداملار مِریضلِری بازارلاردا یاتیریپ، دینگه دُنونینگ اِتِگینَه اِل‍لِرینی دِگیرمَگه-ده اِجازا بِرسین دییّپ، اُنگا یالباریاردیلار. اُنگا اِل دِگرِنلِرینگ هِمّه‌سی-ده شِفا تاپیاردی.