23
Aholan ǝn Joswe win ǝlkamnen
1 Tǝga tamert tagget a daɣ ikfa Amaɣlol maddanǝs n Israyil alxer daɣ zǝnga-nasan kul win ǝhanen ikallan win tan-ɣalayɣalaynen.
Iqqal Joswe aɣmar iknan tušaray. 2 Isassaɣra-du Joswe maddanǝs n Israyil ketnasan, gǝr ǝmɣaran-nasan ǝd imuzaran-nasan ǝd mašraɣan-nasan ǝd muzaran ǝn gǝnan-nasan inn-asan: «Nak da ǝmǝrǝdda, aqqalaɣ aɣmar waššaran, 3 tǝnayam iman-nawan aratan kul win iga Amaɣlol Ǝmǝli-nana i tǝmattiwen šin kallan win da, fǝl ǝddǝlil-nawan. Ǝnta iman-net as fall-anaɣ immǝgar. 4 Tǝnayam tǝzunt ta ǝgeɣ i tawšeten-nawan ǝs tǝšaɣeren ikallan ǝn tǝmattiwen šin ǝrzeɣ a d-ibazan daɣ dǝnnǝg n agarew wa n Yordan har Agarew wa Zǝwwǝran daɣ ataram. Ǝzunaɣ-awan ǝntada ǝs tǝšaɣeren ikallan ǝn tǝmattiwen šin d-ǝqqimnen harwada wǝr tawarzanat. 5 Amaɣlol Ǝmǝli-nana iman-net as tanat-z-istǝɣ dat-wan, issǝgǝg-awan-tanat. Ǝddi ad za tabǝzam ikallan-nasnat s ǝmmǝk was dawan-idkal Amaɣlol Ǝmǝli-nanaɣ arkawal n awen.
6 Daɣ adi sǝggǝtǝkkǝtat daɣ lǝkkum d ǝzǝmmizǝl n arat kul wa iktaban daɣ ǝššǝriɣa ǝn Musa. A daɣ-as in wǝr tǝglǝmam wala. 7 Ad wǝr tǝrtǝyam ǝd tawšeten šin d-ǝqqimnen gar-ewwan. Amaran imalan-nasnat, a du-wǝr-tǝdakkalam fadda ismawan-nasan wala tǝhhadam sǝr-san. A dasan-wǝr-tǝtaggim šikutawen wala tǝɣbǝdam-tan. 8 Amaɣlol Ǝmǝli-nana ɣas a dǝr za tasǝɣam s ǝmmǝk was tǝgam awen har azala.
9 Obaz-awan Amaɣlol ikallan daɣ tǝmattiwen zawwarnen, ǝknanat deɣ assahat amaran har ǝmǝrǝdda wǝr t-illa awedan a dawan-ifragan. 10 Iyyanda daɣ-wan isimagar agim n alǝs daɣ zǝnga-nawan fǝlas Amaɣlol Ǝmǝli-nanaɣ iman-net a iwaran aganna-nawan. Awen daɣ as dawan-idkal arkawal-net. 11 Daɣ adi ǝssǝnat daɣ man-nawan tirem Amaɣlol Ǝmǝli-nawan. 12 As fall-as tǝmalallayam tosaɣam ǝd tǝmattiwen šin d-ǝqqimnen gar-ewwan, tǝnnǝzlafam dǝr-ǝsnat, tǝrtayam dǝr-ǝsnat, 13 wǝdi ǝssǝnat as wǝr ilkem a tan-istaɣ Amaɣlol Ǝmǝli-nawan dat-wan. Kalar a kawan-ǝɣdǝran, ǝɣrǝdan-kawan abbaz, zǝkkǝbǝzzen-kawan amammal, har din-tǝmǝs tǝmayyamayt-nawan daɣ akal ihossayan wa kawan-ikfa Amaɣlol da.
14 Nak da ǝmǝrǝdda ihan tilkamat ǝn tǝɣrǝst-in da. Akkiyyan daɣ-wan issǝnet daɣ ǝwǝl-net, ǝd man-net as wǝr t-illa arkawal iyyanda iga Amaɣlol Ǝmǝli-nawan as wǝrgeɣ tǝnayam-tu. Arkawalan win iga ketnasan as ǝndan. 15 Ǝssǝnat as ǝmmǝk wa daɣ as ǝndan arkawalan win iga, ǝmmǝk di daɣ as fall-awan z'assandu attadiban win imal, as das-wǝr-tǝbbǝrdagam, aglu har kawan-ihlǝk daɣ akal ihossayan wa kawan-ikfa da. 16 As tǝɣtasam arkawal ǝn tassaq wa dǝr-wan inamagga Amaɣlol Ǝmǝli-nawan, wala deɣ tǝɣbadam imalan wiyyad, ad iggǝz alham-nawan Amaɣlol; issǝtrǝb-du sǝr-wan ahluk, imǝs-kawan deɣ daɣ akal ihossayan wa kawan ikfa da.»