24
Ǝšǝššinǝy n arkawal ǝn tassaq
1 Dǝffǝr awen iššedaw-du Joswe tawšeten ǝn maddanǝs n Israyil ketnasnat daɣ ǝɣrǝm wa n Šǝkem. Isassaɣra-du imɣaran, ǝd muzaran ǝd mašraɣan ǝd muzaran ǝn gǝnan n Israyil, ǝglan-du ǝzzǝkken dat Amaɣlol.
2 Inna Joswe i tamattay ketnet: «Ǝntada awa inna Amaɣlol Ǝmǝli n Israyil: "Ǝstizarat aljad-nawan Terax wa n šis n Ibrahim ǝd Naxor akal ihân efay wen sen n agarew wa n Efrat a daɣ iɣsar, iɣbad imalan wiyyad. 3 Ǝkkasa-du aljad-nawan Ibrahim daɣ akal wen, sassawayaq-qu d akal ketnet wa n Kanan. Ǝkfeq-qu isǝhaq ǝssǝgataɣ ǝzzurrǝyya-net. 4 Isǝhaq ǝkfeq-qu Yaqub d Ezaw. Ǝkfeɣ Ezaw akal n ǝdɣaɣan wa n Sir iqqal tǝla-net. Yaqub ǝd maddanǝs amaran ǝkkan Masar. 5 Dǝffǝr adi ǝssǝgla Musa ǝd Harun, ǝggǝdlaɣ ǝlmǝssibaten aggotnen fǝl Masar. Tǝzzar ǝkkasa-du aljadan-nawan daɣ akal wa n Masar. 6 As ǝfalan Masar ǝglan har ewadan agaraw wa n Telant. Ǝlkaman-asan Kǝl-Masar ǝwannen ǝggǝsan d amalankaytan n ǝmǝgǝr ǝlwayan ǝggǝsan. 7 Tǝzzar sakkarayan aljadan-nawan gammayan daɣ-i taggast. Ǝgeɣ agarak kawalan gǝr tamattay-nawan ǝd Kǝl-Masar. Sammasaɣalaɣ-du aman fǝl Kǝl-Masar, lamamasan fall-asan. Tǝggǝyyem iman-nawan awa ǝgeɣ i Kǝl-Masar. Dǝffǝr awen tǝga tamattay-nawan tamert tagget daɣ taneray.
8 Ǝddi amaran ewayaq-qawan s akal wa n Amoritatan ihan dǝnnǝg n agarew wa n Yordan, ǝbagan-kawan-du, eges ǝgeq-qan gǝr fassan-nawan. Tobazam akal-nasan fǝlas nak Amaɣlol a tan-ihlakan dat-wan. 9 Dǝffǝr awen ibag-kawan Balaq ag Siffor imosan ǝmǝnokal n akal wa n Mowab. Fadda issǝgmay Balɣam ag Behor fǝl a dawan-agu šiwatriwen a fǝl tǝlɣanam tǝhlǝkam.
10 Mišan wǝr ǝqbelaɣ arak tǝwatriwen ǝn Balɣam, kalar ewaya-du sǝr-ǝs as dawan-iga šiwatriwen n albaraka. Ǝmmǝk en daɣ as kawan ǝɣlasa daɣ Balaq. 11 Tǝɣrâsam agarew wa n Yordan har tewadam aɣrǝm wa n Yerikaw, ǝmmǝgaran dǝr-wan aytedan-net tǝrzam-tan. Ǝmmǝgaran deɣ dǝr-wan Amoritatan ǝd Ferizitatan ǝd Kananitatan ǝd Xitatan ǝd Girgašitatan ǝd Xiwitatan ǝd Yebusatan, amaran kul ǝgeq-qan gǝr fassan-nawan. 12 Ǝgeɣ tasa labasat daɣ mǝnokalan win ǝššin n Amoritatan har ǝddǝggagan, wǝr t-illa a ǝknanat tǝkabiwen-nawan wala imarran-nawan daɣ awen. 13 Ǝkfeq-qawan šiwǝgas wǝr tǝgyekam ǝd ɣǝrman wǝr tǝkresam, tǝxsaram daɣ-san, d alɣanab, d eškan n azzaytun wǝr tǝnbelam, tǝddaram sǝr-san."»
14 Ilas Joswe inn-asan: «Ǝmǝrǝdda iksadat Amaɣlol, tammazalam tara-net s ǝwǝl iyyanda, d alɣadala. Ǝɣrǝdat-in taggor n ǝssǝnǝman win as kala tan-ǝɣbadan aljadan-nawan daɣ afay wen sen n agarew wa n Efrat, d akal ǝn Masar, tǝlkǝmam y awa as kawan-omar Amaɣlol. 15 As wǝr tǝqbelam adi, wǝdi sǝnnǝfrǝnat azalada imalan win za tǝɣbǝdam gǝr za win as kala tan-ǝɣbadan aljadan-nawan daɣ afay wen sen n agarew wa n Efrat wala deɣ win ǝɣbadan Amoritatan dad zamas akal n Amoritatan a tǝɣsaram. Nak iman-in za d aɣaywan-in Amaɣlol a za nǝɣbǝd.»
16 Tǝnn-as tamattay: «Kala kala! Wǝr za nammazzay d ǝlɣibada n Amaɣlol nǝɣbǝd imalan wiyyad, 17 fǝlas Amaɣlol Ǝmǝli-nana ǝnta a danaɣ-d-ikkasan nakkanay d aljadan-nana daɣ ǝkkǝlu wa nǝha daɣ Masar. Nǝssân deɣ daɣ tǝlmǝɣjujaten šin iga den. Ǝnta a danaɣ-ogazan daɣ tǝzzǝgrǝt ǝn tarrayt ta du-neway daɣ ammas ǝn tǝmattiwen ketnasnat šin as nǝɣras ikallan-nasnat. 18 Istaɣ dat-na šimattiwen ketnasnat harkid Amoritatan win ǝxsarnen akal a. Daɣ adi manǝmmǝk as za naqqam nakkanay da wǝr nǝɣbed Amaɣlol s ǝnta a imosan Ǝmǝli-nana?»
19 Tǝzzar inna Joswe i tamattay: «Wǝr dawan-z-irɣas ǝlɣibada n Amaɣlol, fǝlas Ǝmǝli zǝddigan a imos wǝr nǝqbel a imosan ǝmadraw. Wǝrmad as z'iqbǝl ǝfǝllǝg-nawan wala deɣ ibakkadan-nawan. 20 As dǝr-ǝs tǝnamaggagam y ad tǝɣbǝdam imalan wiyyad, a kawan-issǝgǝg iman-net izǝmmǝgrǝz-kawan, ihlǝk-kawan kuddeɣ ig-awan a olaɣan dat adi.» 21 Tǝnn-as tamattay: «Kala kalar Amaɣlol a za nǝɣbǝd!» 22 Inna Joswe i tamattay: «Tǝggǝyyem iman-nawan ǝsǝnnǝfrǝn wa tǝgam ǝlɣibada n Amaɣlol da.» Tǝnn-as tamattay: «Awalla nǝggǝyat y awen.» 23 Tǝzzar inn-asan Joswe: «Daɣ adi ǝɣrǝdat-in taggor n ǝssǝnǝman kul win dǝr tǝnnǝttafam, tǝzzǝgzǝnam s ǝwǝl iyyanda s Amaɣlol Ǝmǝli n Israyil.» 24 Tǝnn-as tamattay: «Awalla ad nǝɣbǝd Amaɣlol Ǝmǝli-nana, nabbardag-as.»
25 Ǝzǝl wen da daɣ ǝɣrǝm wa n Šǝkem ad inamagga Joswe ǝd tamattay arkawal ǝn tassaq. Issodaf-tan deɣ alwajiban d ǝššǝrǝdan win as z'ǝlkǝman. 26 Iktab-tan Joswe daɣ ǝlkǝttab wa n ǝššǝriɣa ǝn Mǝššina. Idkal-du tǝhunt zǝwwǝrat issǝɣt-et daw ašǝk zagren dagma n adag wa zǝddigan n Amaɣlol. 27 Dǝffǝr adi inna i tamattay ketnet: «Ǝswǝdat wǝllen daɣ tǝhunt ta, a fall-ana taggayyat fǝlas tǝsla y awal ketnet wa danaɣ-iga Amaɣlol. Awalla a dawan-tǝqqǝl tǝgǝyya a dawan-za-tǝgdǝlat ǝfǝllǝg fǝl Ǝmǝli-nawan.» 28 Dǝffǝr adi issǝllam Joswe tamattay, ǝqqalan ikallan win tawakfan.
Iba ǝn Joswe d Elɣazar
29 Dǝffǝr aratan win ǝganen den, aba Joswe ag Nun imosan akli ǝn Mǝššina, ila temeday n awatay ǝd maraw. 30 Itawamazal daɣ amadal wa imosan tadagart-net daɣ aɣrǝm wa n Timnat-Serax ihan idɣaɣan win Efrayim daɣ tamasna n ǝdɣaɣ wa n Gaš.
31 Ǝɣbadan maddanǝs n Israyil Amaɣlol daɣ azzaman kul win iga Joswe daɣ ǝddǝnet. Ǝgan awen da dǝffǝr iba-net daɣ tǝmǝddurt n ǝmɣaran-nasan win ǝggǝyyatnen y aratan kul win iga Amaɣlol fǝl ǝddǝlil ǝn tamattay n Israyil.
32 Amaran iɣasan ǝn Yusǝf as Masar a daq-qan d-ewayan maddanǝs n Israyil, ǝnbalan-tan daɣ Šǝkem. Edag wa daq-qan ǝnbalan den, imos edag as a irǝwan ad t-izzinza Yaqub temeday ǝn tafelt ɣur ǝzzurrǝyya ǝn Xamor wa fǝl tǝkras Šǝkem. Edag tǝla n ǝzzurrǝyya ǝn Yusǝf a iha.
33 Dǝffǝr adi aba Elɣazar ag Harun, itawamazal-in fǝl tǝkašwart ta tǝtawakfat barar-net Finɣas daɣ ǝdɣaɣan win akal n Efrayim.