22
Imazalan win ǝlkamnen ǝn Joswe
Ǝsǝllǝm ǝn Joswe meddan ǝn tawšeten šin dǝnnǝg ǝn Yordan
1 Isassaɣra-du Joswe meddan ǝn tawšet ta n Ruben, ǝd win ta n Gad ǝd win aganna ǝn tawšet ta n Manasay. 2 Inn-asan: «Tǝkkiwanam y ammaran ketnasan win Musa, akli ǝn Mǝššina. Tǝgam deɣ aratan kul win as kawan-omaraɣ. 3 A ilan elan har azala, wǝr kala ad tǝqqimam wǝr tǝdhelam išǝqqaɣan-nawan win tawšeten šin hadatnen. Amaran tǝkkiwanam faw y ammaran n Amaɣlol Ǝmǝli-nana. 4 Id zamas ikfa Amaɣlol išǝqqaɣan-nawan alxer daɣ akal-nasan s ǝmmǝk was idkal arkawal-net, wǝdi ǝqqǝlat iɣawnatan-nawan daɣ akal wa kawan-ikfa Musa akli ǝn Mǝššina daɣ dǝnnǝg n agarew wa n Yordan. 5 Mišan, sǝggǝtǝkkǝtat daɣ ǝmazal n ǝššǝriɣa ketnet was Musa, akli ǝn Mǝššina a kawan omaran sǝr-ǝs a t-imosan as: Iriwat Amaɣlol Ǝmǝli-nawan, tammazalam tara-net, tagim awa as kawan-omar, tasǝɣam dǝr-ǝs. Tǝlkǝmam i tarrayt-net s ǝwǝl iyyanda ǝd gǝlleyat.»
6 Ittar-asan Joswe, issǝllam-tan, ǝglan ǝkkan iɣawnatan-nasan. 7 Dat awen ikfa Musa aganna ǝn tawšet ta n Manasay akal daɣ amadal wa n Bašan daɣ dǝnnǝg n agarew wa n Yordan. Tǝzzar ikfa Joswe akal y aganna wa hadan ǝn tawšet ta n Manasay daɣ ataram n agarew wa n Yordan. Dat teklay-nasan, ittar-asan Joswe a dasan-igan albaraka 8 inn-âsan deɣ: «Kawanay da a z'ǝqqǝlnen iɣawnatan-nawan da tewâyam ǝrrǝzǝɣan aggotnen ǝgânen daɣ hǝrwan sinahalnen igǝt, d ǝzrǝf iknân igǝt d urǝɣ ǝd daroɣ ǝd tǝzoli ǝd tǝbǝddaɣ ǝknânen igǝt. Ǝrrǝzǝɣan kul win du-tobazam da daɣ zǝnga-nawan, as din-tosam tuzanam-tan d aytedan win hadatnen ǝn tawšeten-nawan.»
9 Ǝnkaran meddan win Ruben ǝd win Gad ǝd win aganna ǝn tawšet ta n Manasay ǝfalan maddanǝs n Israyil win hadatnen ahanen aɣrǝm wa n Šilaw, daɣ akal wa n Kanan ǝqqalan iɣawnatan-nasan ǝhânen akal wa n Galad. Akal wa ǝnta a imosan tǝdagart-nasan a tan-ikfa Musa imos awen arat as t-omâr Amaɣlol.
Edag wa n tǝkutawen ǝn tǝgǝyya
10 Ewadan meddan win Ruben ǝd win Gad ǝd win aganna ǝn tawšet ta n Manasay efay n agarew wa n Yordan, harwada wǝr okayan akal wa n Kanan. Ǝkrasan den daɣ edag ǝn tǝkutawen zǝwwǝran ilan anay. 11 Amaran ǝslanat tawšeten ǝn maddanǝs n Israyil šin hadatnen as, tawšet ta n Ruben ǝd ta n Gad d aganna ǝn ta n Manasay, ǝkrasan edag ǝn tǝkutawen fǝl afay n agarew wa n Yordan daɣ ataram n akal ǝn tawšeten šin hadatnen ǝn maddanǝs n Israyil daɣ akal ǝn Kanan.
12 Ǝslan meddan ǝn Kǝl-Israyil win hadatnen awen ɣas, ǝddewan-du ketnasan daɣ Šilaw y ad ǝbǝgan tawšet ta n Ruben ǝd ta n Gad d aganna ǝn ta n Manasay ǝhânen dǝnnǝg n agarew wa n Yordan. 13 Tǝzzar ǝnkaran maddanǝs n Israyil ǝssǝglan Finɣas ag ǝlimam Elɣazar ǝssokan-tu akal ǝn Galad y ad ammanay ǝd tawšet ta n Ruben ǝd ta n Gad d aganna ǝn tawšet ta n Manasay. 14 Ǝddewan dǝr-ǝs maraw muzaran ǝn tamattay s akkiyyan daɣ-san imos ǝmuzar n iyyat daɣ tawšeten n Israyil šin ǝhanen ataram. Amaran imuzaran win, akkiyyan daɣ-san imos tǝgǝttawt n aɣaywan-nasan. 15 Ǝkkan tawšet ta n Ruben ǝd ta n Gad d aganna ǝn tawšet ta n Manasay ǝnnan-asnat: 16 «Ǝntada awa ǝnnan maddanǝs n Israyil win hadatnen ketnasan: "Ma fǝl tǝtaggim ark ǝmazal ogdân d awa dat Amaɣlol tǝmmǝzzayam ǝd tǝkawent y-as s akaras wa tǝgam edag ǝn tǝkutawen? Mafel tǝtaggim fǝl Amaɣlol wa daɣ ǝfǝllǝg? 17 Awak ǝgǝddi a dawan-wǝr-iga abakkad wa nǝga imosan as nǝɣbad ǝssǝnǝm wa n Feyyor? Ǝssǝnǝm wen wǝrgeɣ harwada wǝr dǝr-ǝs nǝmmǝzzay kuddeɣ as izizzabbat-du fall-anaɣ Amaɣlol ǝlmǝssibat? 18 Awak ǝmǝrǝdda tara a tǝgam ad tammazzayam ǝd tǝkawent y Amaɣlol? Kud za ǝfǝllǝg a fall-as tǝgam azalada, wǝdi tufat ad t-iggǝz alham ǝn tamattay n Israyil ketnet. 19 Kud arat iyyan a t-illan a dawan-igdâlan ǝlɣibada n Amaɣlol daɣ akal-nawan, tǝqqǝlam-du akal wa n Amaɣlol iha ahan-net, tabǝzam imǝdlan daɣ ammas ǝn win-nana. Kala kala nǝmǝggǝgat d ǝfǝllǝg fǝl Amaɣlol, wala deɣ ǝfǝllǝg fall-ana s ad tǝkrǝsam edag ǝn tǝkutawen iyyan wǝr nǝmos wa n Amaɣlol, Ǝmǝli-nana. 20 Awak tǝkittǝwam alwaq wad iga Akan wa n ahaya ǝn Zera abakkad, as idkal aratan win fǝl tǝga tarɣǝmt? Tǝssanam as wǝrgeɣ Akan ɣas-net a immutan fǝl ǝddǝlil n abakkad wa iga, kalar tamattay ketnet as iggaz alham-net Amaɣlol."»
21 Tǝzzar ǝjjǝwwaban meddan ǝn tawšet ta n Ruben ǝd ta n Gad, ǝd win aganna ǝn tawšet ta n Manasay i muzaran ǝn tawšeten šin hadatnen, ǝnnan-asan: 22 «Amaɣlol ǝnta imosan Ǝmǝli wa ilan taɣmar, awalla ǝnta a ilan taɣmar! Ǝnta a issanan awa fǝl nǝga tǝmǝtǝkwǝyt ten, amaran Kǝl-Israyil da ad ǝssǝnan awa fǝl tat-nǝga. Kud za ǝfǝllǝg a nǝga fǝl Amaɣlol wala deɣ nǝga ǝmazal iyyan n iba n alɣadala y as, ad wǝr tudu tǝfuk azalada nǝddar. 23 Kud akaras a nǝga edag ǝn tǝkutawen fǝl a fall-as nǝtaggu šikutawen šin tirǝkǝmmitnen ǝd tǝkutawen šin tǝbzǝst meɣ šin tassaq, fǝl ad nammazzay ǝd tǝkawent y Amaɣlol, kud adi a igan abǝzet-ana sǝr-ǝs Amaɣlol! 24 Kala wǝrgeɣ adi a igan. Edag ǝn tǝkutawen wa, wǝr tu-nǝssǝkras ar fǝl as nǝksud ad annu ǝzzurrǝyya-nawan i wa-nana daɣ azzaman win d-ǝzaynen: "Ma tǝmos tassaq ta tǝllat gar-ewwan d Amaɣlol Ǝmǝli n Israyil? 25 Wǝrgeɣ kawanay aytedan ǝn Ruben ǝd win Gad Amaɣlol iman-net a igan agarew wa n Yordan iyyaka gar-ena dǝr-wan? Daɣ adi mǝni kawanay mǝni Amaɣlol?" Arat wǝdi as iga, a d-awǝy s ǝzzurrǝyya-nanaɣ ad ammazzay d ǝlɣibada n Amaɣlol. 26 Awen daɣ a fǝl nǝga tanat n akaras n adag ǝn tǝkutawen. Wǝr nǝga awen fǝl ad nǝtaggu šikutawen šin tirǝkǝmmitnen wala deɣ šin hadatnen. 27 Kalar tara ɣas a nǝga, a tu-tǝlla tǝgǝyya n as nǝla turagat n ad nǝɣbǝd Amaɣlol s igi ǝn tǝkutawen šin tirǝkǝmmitnen, ǝd tǝkutawen šin tassaq, ǝd šin hadatnen. Edag ǝn tǝkutawen wǝdi ad iqqǝl tǝgǝyya gar-ena dǝr-wan, iqqǝl-tat deɣ gǝr ǝzzurrǝyya-nanaɣ ǝd wa-nawan. As iga adi wǝr z'annu ǝzzurrǝyya-nawan i wa-nana daɣ azzaman win d-ǝzaynen: "Wǝr tǝlem tarrayt waliyyat s ǝlɣibada n Amaɣlol". 28 Ǝntada awa nǝgmay s awen: As iqqal as daɣ azzaman win d-ǝzaynen, inna ǝzzurrǝyya-nawan adi i wa-nana, a das-annu wa-nana: "Ǝswǝdat, aljadan-nana ǝgan y adag wa ǝsǝkrǝs olân ǝd wa n adag ǝn tǝkutawen n Amaɣlol. Amaran wǝr t-ǝssǝkrasan fǝl a daɣ-as agin šikutawen šin tirǝkǝmmitnen ǝd šin hadatnen, kalar wǝr t-ǝssǝkrasan ar fǝl ad iqqǝl tǝgǝyya gar-ena dǝr-wan". 29 Kala kala wǝr nǝra ǝfǝllǝg fǝl Amaɣlol wala deɣ tǝmazrǝyt ǝn tarrayt-net. Wǝr nǝssǝkras edag di fǝl a daɣ-as nagu šikutawen šin tirǝkǝmmitnen wala šin tǝbzǝst wala šin hadatnen. Wǝr t-illa fadda adag a daq-qanat za nǝtaggu ar edag ǝn tǝkutawen wa ihan dat ahaket n Amaɣlol Ǝmǝli-nana.»
30 Tǝzzar iqbal ǝlimam Finɣas, ǝd muzaran win dǝr d-iddew, awa dasan-ǝnnan aytedan ǝn tawšet ta n Ruben ǝd ta n Gad ǝd ta n Manasay. 31 Tǝzzar inn-asan Finɣas: «Nǝssan as azalada Amaɣlol illa ɣur-na fǝlas wǝr tǝmmǝzrayam tara n Amaɣlol. Daɣ adi tǝwaɣam-in fǝl Kǝl-Israyil attadib n Amaɣlol.»
32 Tǝzzar igla ǝlimam Finɣas ag Elɣazar ǝd muzaran ǝn tamattay, ǝfalan aytedan win Ruben ǝd win Gad daɣ akal wa n Galad ǝkkan wa n Kanan y ad agin i maddanǝs n Israyil win hadatnen isalan n awa igan. 33 Igraz awen i maddanǝs n Israyil ǝgan igodan y Ǝmǝli. Ab'as ǝgan ǝnnǝyat n ad ǝbǝgan, arzin ikallan ǝn tawšet ta n Ruben, ǝd ta n Gad 34 Dǝffǝr adi ǝnnan aytedan win Ruben, ǝd win Gad: «Edag wa n tǝkutawen a, imos-anaɣ ketnana tǝgǝyya, n âs Amaɣlol ǝnta a imosan Ǝmǝli.» Awen daɣ a fǝl ǝgan y adag en esǝm "tǝgǝyya".