21
Iɣǝrman win Kǝl-Lebi
1 Ǝkkan-du muzaran ǝn ɣawnatan ǝn tawšet ta n Lebi ǝlimam Elɣazar ǝd Joswe ag Nun ǝd muzaran ǝn ɣawnatan ǝn tawšeten šin hadatnen ǝn maddanǝs n Israyil 2 ahanen aɣrǝm wa n Šilaw daɣ akal wa n Kanan. Ǝnnan-asan: «Amaɣlol omar ǝs tarrayt ǝn Musa s ad nǝtǝwǝkfu iɣǝrman daɣ za nǝɣsǝr nǝtǝwǝkfu deɣ mǝssǝdan i hǝrwan-nana.» 3 Tǝzzar sannafranan maddanǝs n Israyil daɣ tǝdǝgren-nasan iɣǝrman ǝd mǝssǝdan-nasan y a tan-akfin i Kǝl-Lebi. Awen da as tan-omar Amaɣlol.
4 Tawagganat tǝšaɣeren i Kǝl-Lebi, immǝdkal-du ǝɣrǝf wa n Qehat. Aɣrǝf wa n Qehat ǝnta a ǝhan hayawan n ǝlimam wa igan Harun. Tawakfan hayawan n ǝlimam Harun ǝs tǝšaɣeren maraw ɣǝrman ǝd karad ahanen amadal wa n Yahuda ǝd wa n Šimǝɣon ǝd wa n Benyamin. 5 Awa d-iqqiman daɣ ǝɣrǝf wa n Qehat itawakfa ǝs tǝšaɣeren maraw ɣǝrman ahanen amadal wa n Efrayim ǝd wa n Dan ǝd wa n aganna ǝn tawšet ta n Manasay tahat ataram n agarew wa n Yordan.
6 Aɣrǝf wa n Geršon itawakfa ǝs tǝšaɣeren maraw ɣǝrman ǝd karad ahanen amadal wa n Issakar ǝd wa n Aššer ǝd wa n Naftali d amadal wa n Bašan, imosan tǝla n aganna ǝn tawšet ta n Manasay.
7 Aɣrǝf wa n Merari itawakfa ǝs tǝšaɣeren maraw ɣǝrman d ǝššin ahanen amadal wa n Ruben ǝd wa n Gad ǝd wa n Zǝbulun.
8 Iɣǝrman win den kul ǝd mǝssǝdan-nasan as tan-ǝkfan maddanǝs n Israyil i Kǝl-Lebi ǝs tǝšaɣeren. Awen daɣ as tan-omar Amaɣlol ǝs tarrayt ǝn Musa.
Iɣǝrman win tawakfanen y ǝɣrǝf wa n Qehat
9 Ǝntanay da ismawan ǝn ɣǝrman win ahanen amadal wa n Yahuda ǝd wa n Šimǝɣon win tawakfanen y 10 ǝzzurrǝyya ǝn Harun wa n ǝɣrǝf ǝn Qehat, Qehat amaran ag Lebi. Ǝntanay a d-ǝmmǝdkalnen ǝstizarat daɣ tǝšaɣeren. 11 Tawakfan ǝs tǝšaɣeren aɣrǝm wa n Kirǝyat-Arba almaɣna aɣrǝm wa n Arba, Arba amaran aljad n Anakitatan. Aɣrǝm wa esǝm-net azalada Xebron iha idɣaɣan n akal wa n Yahuda. Tawakfan aɣrǝm wen ǝd mǝssǝdan win tu-ɣalayɣalaynen. 12 Mišan šiwǝgas ǝd tǝɣarmaten šin fǝl ixkam ǝɣrǝm wa n Arba dat awen ad tawakfanat i Kaleb ag Yefunne.
13 Itawakfa ǝzzurrǝyya ǝn Harun wa n ǝlimam ǝs tǝšaɣeren, aɣrǝm wa n Xebron imosan aɣrǝm n ǝlɣillas y awedan ewad ǝlɣǝdǝr n igi ǝn man a din-wǝr-igmay. Tawakfan deɣ aɣrǝm wa n Libna, 14 ǝd wa n Yattir ǝd wa n Eštemoya 15 ǝd wa n Xolon ǝd wa n Debir 16 ǝd wa n Ayin ǝd wa n Yutta ǝd wa n Bet-Šemeš. Iqqal awen taza ɣǝrman ǝd mǝssǝdan-nasan, as ketnasan amadal wa n Yahuda ǝd wa n Šimǝɣon a ǝhan. 17 Daɣ amadal wa n Benyamin tawakfan aɣrǝm wa n Gabawun ǝd wa n Geba 18 ǝd wa n Anatot ǝd wa n Almon. Iqqal awen ǝkkoz ɣǝrman ǝd mǝssǝdan-nasan. 19 Daɣ adi maraw ɣǝrman ǝd karad ǝd mǝssǝdan-nasan a tawakfanen i limaman win ǝzzurrǝyya ǝn Harun.
20 Awa d-iqqiman daɣ ɣawnatan n ǝɣrǝf wa n Qehat tawakfan daɣ tǝšaɣeren iɣǝrman win ahanen amadal wa n Efrayim a tan-ǝmosnen: 21 Aɣrǝm wa n Šǝkem imosan aɣrǝm n ǝlɣillas ihan idɣaɣan win Efrayim d aɣrǝm wa n Gezer 22 d ǝɣrǝm wa n Kibezayim ǝd wa n Bet-Xoron. Iqqal awen ǝkkoz ɣǝrman ǝd mǝssǝdan-nasan. 23-24 Tawakfan deɣ daɣ amadal wa n Dan ǝkkoz ɣǝrman ǝd mǝssǝdan-nasan. Iɣǝrman win ǝmosan: aɣrǝm wa n Elteke ǝd wa n Gibeton, ǝd wa n Ayalon ǝd wa n Gat-Rimmon. 25 Daɣ amadal wa n aganna ǝn tawšet ta n Manasay ta tahat ataram ǝn agarew wa n Yordan, tawakfan ǝššin ɣǝrman ǝd mǝssǝdan-nasan a tan-ǝmosnen: aɣrǝm wa n Tanak d aɣrǝm wa n Gat-Rimmon. 26 Daɣ adi maraw ɣǝrman ǝd mǝssǝdan-nasan a tawakfan.
Iɣǝrman win tawakfanen aɣrǝf wa n Geršon
27 Aɣrǝf wa n Geršon, imosan arat daɣ Kǝl-Lebi itawakfa ǝs tǝšaɣeren ǝššin ɣǝrman ǝd mǝssǝdan-nasan daɣ akal wa n aganna ǝn tawšet ta n Manasay tahat dǝnnǝg n agarew wa n Yordan, almaɣna : aɣrǝm wa n Golan imosan iyyan daɣ ɣǝrman n ǝlɣillas ihan amadal wa n Bašan, d ǝɣrǝm wa n Bešetera. 28-29 Daɣ amadal wa n Issakar tawakfan ǝkkoz ɣǝrman ǝd mǝssǝdan-nasan a tan-ǝmosnen: aɣrǝm wa n Kišǝyon d aɣrǝm wa n Dabǝrat d aɣrǝm wa n Yarmut d aɣrǝm wa n En-Gannim. 30-31 Daɣ amadal wa n Aššer tawakfan ǝkkoz ɣǝrman ǝd mǝssǝdan-nasan a tan-ǝmosnen: aɣrǝm wa n Mišal d aɣrǝm wa n Abdon d aɣrǝm wa n Xelkat d aɣrǝm wa n Rexob. 32 Daɣ amadal wa n Naftali tawakfan karad ɣǝrman ǝd mǝssǝdan-nasan a tan-ǝmosnen: aɣrǝm wa n Kedeš imosan iyyan daɣ ɣǝrman n ǝlɣillas ihan amadal ǝn Galilaya d ǝɣrǝm wa n Xammot-Dor d aɣrǝm wa n Kartan. 33 Daɣ adi maraw ɣǝrman ǝd karad ǝd mǝssǝdan-nasan a tawakfanen y ǝɣrǝf wa n Merari.
Iɣǝrman win tawakfanen aɣrǝf wa n Merari
34-35 Aɣrǝf wa d-iqqiman daɣ Kǝl-Lebi, almaɣna wa n Merari, itawakfa s aɣaywan aɣaywan ǝkkoz ɣǝrman ǝd mǝssǝdan-nasan daɣ amadal wa n Zǝbulun a tan-ǝmosnen: aɣrǝm wa n Yoqneyam ǝd wa n Karta d aɣrǝm wa n Dimna d aɣrǝm wa n Nahalal. 36-37 Daɣ amadal wa n Ruben, tawakfan ǝkkoz ɣǝrman wiyyad ǝd mǝssǝdan-nasan. Iɣǝrman win ǝmosan: aɣrǝm wa n Besser imosan iyyan daɣ ɣǝrman n ǝlɣillas ihân teneray. Tawakfan deɣ aɣrǝm wa n Yahas, d aɣrǝm wa n Kedemot d aɣrǝm wa n Mefat. 38-39 Daɣ amadal wa n Gad tawakfan ǝkkoz ɣǝrman ǝd mǝssǝdan-nasan. Iɣǝrman win ǝmosan: aɣrǝm wa n Ramot imosan iyyan daɣ ɣǝrman win ǝlɣillas ihan amadal ǝn Galad d ǝɣrǝm wa n Maxanayim, d ǝɣrǝm wa n Xešbon ǝd wa n Yazer. 40 Daɣ adi aɣrǝf wa d-iqqiman daɣ Kǝl-Lebi, almaɣna wa n Merari, itawakfa ǝs tǝšaɣeren maraw ɣǝrman d ǝššin.
41 Awa itawakfan tawšet ta n Lebi daɣ awen ketnet iqqal ǝkkozat tǝmǝrwen n ǝɣrǝm d ǝttam ǝd mǝssǝdan-nasan a du-tiwafrasnen daɣ mǝdlan ǝn tawšeten n Israyil šin hadatnen. 42 Iɣǝrman win akkiyyan daɣ-san ila imǝssǝdan-net ǝhanen iɣǝliɣǝlayan-net.
Ǝsǝbdǝd n Amaɣlol arkawal wa iga
43 Ikfa Amaɣlol maddanǝs n Israyil akal ketnet was ihad y aljadan-nasan as a dasan-t-akfu. Obazan-tu ǝxsaran daɣ-as. 44 Ig-asan Amaɣlol alxer daɣ akal ketnet. Awen daɣ as ihad y aljadan-nasan as a dasan-t-agu. Wǝr t-illa daɣ zǝnga-nasan i dasan-ifragan fǝlas Amaɣlol a tan-ikfan fall-asan tarna. 45 Aratan olaɣnen kul win imal Amaɣlol i maddanǝs n Israyil issǝnd-en. Wǝr tan-iha iyyanda wǝr issǝnda.