20
Iɣǝrman win ǝlɣillas
1 Dǝffǝr adi omar Amaɣlol Joswe 2 inn-as ad annu i maddanǝs n Israyil: «Sǝnnǝfrǝnat iɣǝrman ǝmosnen idaggan n ǝlɣillas, s ǝmmǝk was kala dawan-ǝššewalaɣ s awen ǝs tarrayt ǝn Musa. 3 As ewad ǝlɣǝdǝr iyyan daɣ-wan, iga iman n awedan da wǝr das-igmay; addaggaget s iyyan daɣ ɣǝrman win, ilɣǝs y anammaray n awedan wen wa iwar ǝzǝrzǝm n addayyat-net. 4 Awedan wa iddǝggagan den as din-osa iyyan daɣ ɣǝrman win, ad akku imi n ǝɣrǝm ɣur adag wa daɣ taggin ǝššǝriɣatan ǝn tamattay. Tǝzzar issuɣǝl y ǝmɣaran win ǝmosnen šigǝttawen ǝn tamattay n ǝɣrǝm isalan n awa fall-as igan. Ǝddi ad t-ayyin iggǝz aɣrǝm, assaknin-tu edag wa daɣ z'iɣsǝr. 5 As das-ilkam anammaray wa iwar ǝzǝrzǝm n addayyat n awedan wa inɣa den, har iyyan daɣ ɣǝrman win, a das-t-ǝgdǝlan aytedan n ǝɣrǝm, fǝlas ǝlɣǝdǝr a t-ewadan iga iman n awedan wen da wǝr das-igmay; wǝr t-ides as t-izzingat. 6 Awedan wa igan iman da wǝr din-igmay awen, ad aqqam daɣ ǝɣrǝm en da iket di a das-šarraɣan ǝmɣaran win ǝmosnen šigǝttawen, dat šittawen ǝn tamattay itǝwǝssǝn kud igmay-in tenaɣay n awedan wen wala. Ad aqqam denda har iba ǝlimam wa zǝwwǝran n azzaman win den. Dǝffǝr adi amaran iqqǝl aɣaywan-net daɣ ǝɣrǝm wa daɣ d-iddǝgag.»
7 Ǝntanay da iɣǝrman n ǝlɣillas win ǝskatan maddanǝs n Israyil: Aɣrǝm wa n Kadeš ihan amadal ǝn Galilaya daɣ ǝdɣaɣan win Naftali d ǝɣrǝm wa n Šǝkem ihan idɣaɣan n Efrayim d ǝɣrǝm wa n Kirǝyat-Arba as itawannu Xebron daɣ ǝdɣaɣan ǝn Yahuda. 8 Daɣ afay wen sen n agarew wa n Yordan iddinnagan i Yerikaw, sannafranan daɣ akal ǝn tawšet ta n Ruben aɣrǝm wa n Besser ihan teneray tǝmosat afalla. Sannafranan deɣ aɣrǝm wa n Ramot ihan akal wa n Galad ihan tǝla ǝn tawšet ta n Gad d akal wa n Golan ihan amadal wa n Bašan imosan tǝla ǝn tawšet ta n Manasay. 9 Tawasanafranan ɣǝrman win da fǝl ad ǝqqǝlan idaggan n ǝlɣillas i maddanǝs n Israyil ǝd naftaɣan win ǝxsarnen gar-essan. As t-imal awedan ewad ǝlɣǝdǝr n igi ǝn man n iyyan da wǝr das-igmay, ad addaggag ilɣǝs daɣ iyyan daɣ ɣǝrman win y awedan wa iwar a daɣ-as ammazal ǝššǝriɣa. Amaran wǝr tu-z-anɣu awedan wa iwar ǝzǝrzǝm n addayyat, ar s ad imos as itiwašraɣ-as dat šittawen ǝn tamattay.