18
Igi ǝn tǝššaɣeren i tawšeten šin wǝr nǝgrew tǝdagart
1 As ǝɣradan maddanǝs n Israyil abbaz ǝn kallan kul win den, ǝddewan-du ketnasan s ǝɣrǝm wa n Šilaw ǝkrasan daɣ-as limaman ahaket wa n ǝmǝnǝy d Amaɣlol.
2 Ǝssayat tawšeten daɣ Kǝl-Israyil a d-ǝqqimnen wǝr sǝr-ǝsnat d-ǝxselnat tǝdǝgren-nasnat. 3 Adi a fǝl inna Joswe i tawšeten šin den: «Mas tǝqqalam wǝr tobezam akal was Amaɣlol Ǝmǝli-nawan a t-ikfan y aljadan-nawan? 4 Sǝnnǝfrǝnat-du karad meddan daɣ ǝkkullu ǝn tawšet, a tan-assagla, a d-ǝnǝyan šidǝgren ǝn tawšeten-nasan, ǝktǝb-du isalan-nasnat, ǝqqǝlan-i-du. 5 Tuzanam akal tagim-tu ǝssayat tǝdǝgren. Ǝzzurrǝyya ǝn Yahuda ad aqqam daɣ amadal-net ihan agala, wa n Yusǝf ad aqqam daɣ wa-net ihan tamasna. 6 As du-tǝktabam isalan ǝn tǝdǝgren šin den, taglim-du tǝssaknim-i-tan. Ǝddi a dawan-z-aga šišaɣeren fall-asnat dat Amaɣlol Ǝmǝli-nana. 7 Mišan tawšet ta n Lebi wǝr za tǝtǝwǝkfu tǝdagart waliyyat daɣ tǝzunt, fǝlas tadagart-net tišit ǝn limaman a tat-imosan. Tawšet amaran ta n Gad ǝd ta n Ruben d aganna iyyan ǝn tawšet ta n Manasay, tawakfanat idǝgran-nasnat daɣ amadal wa iddǝnnagan y agarew wa n Yordan. Musa iman-net wa n ǝkli ǝn Mǝššina a dasnat-t-ikfan.»
8 Ǝglan meddan win tawasanafrannen y a d-ǝnǝyan akal. Amaran dat teklay-nasan ig-asan Joswe ammaran win da, inn-asan: «Agliwat tilalam akal taššaggaram-t-id ǝs tǝmǝwit tolaɣat, tǝktǝbam-i-du awa tǝnayam. A dawan-agaɣ šišaɣeren da da daɣ Šilaw, dat Ǝmǝli, nǝssǝn šidǝgren šin za tǝgrǝwam.» 9 Ǝllilan meddan akal ketnet, ǝktaban-du ǝs tǝmǝwit tolaɣat isalan ǝn tǝdǝgren šin ǝssayat a z'uzanan d ǝket n ǝsmawan ǝn ɣǝrman. Ǝqqalan-du Joswe daɣ ɣawnatan win Šilaw. 10 Tǝzzar iga Joswe i maddanǝs n Israyil šišaɣeren fǝl akal dat Amaɣlol. Ikfa tawšet kul tadagart-net.
Tǝdagart ǝn tawšet ta n Benyamin
11 Tawšet ta n Benyamin a tǝtawakfat tadagart ta tazzarat daɣ tǝšaɣeren s aɣaywan aɣaywan. Akal-nasan iha gǝr akal wa n ǝzzurrǝyya ǝn Yahuda ǝd wa n ǝzzurrǝyya ǝn Yusǝf. 12 Iyyaka-net wa n tamasna ibaz-du ɣur agarew wa n Yordan iggǝzzay s abadan ǝn Yerikaw wa n tamasna, itram illil akal wa n ǝdɣaɣan har teneray ta n Bet-Awen. 13 Den daɣ ad innǝmad Luz eway tama-net ta n agala as itawannu Betel. Tǝzzar izagaday s Atrot-Addar illil adɣaɣ wa ihan agala ǝn Bet-Xoron ta n ares. 14 Daɣ ataram n ǝdɣaɣ wen da inimawalan ǝd Bet-Xoron, dǝffǝr adi ikkorat iyyaka-net, istaɣ sa sǝr agala iraz-du ɣur Kirǝyat-Bal tǝgat esǝm Kirǝyat-Yarim, tǝha tǝla ǝn tawšet ta n Yahuda. Den daɣ a d-iqqal iyyaka-net wa n ataram.
15 Ibaz-du iyyaka-net wa n agala ɣur tama n ǝɣrǝm ǝn Kirǝyat-Yarim ikka sa sǝr Gazin iraz-du ɣur tǝmǝksen šin Naftawax. 16 Ǝddi da ad izagaday iyyaka s abada n ǝdɣaɣ wa inamawalan d ǝɣlal wa n Ben-Hinnom iga tamasna n ǝɣlal wa n Rafayitatan. Izagaday s ǝɣlal wa n Ben-Hinnom daɣ tasaga ta n agala ǝn tǝkašwart ta n Yebusatan, igla izigaday har En-Rogel. 17 Istaɣ iyyaka-net sa sǝr tamasna iga anamod wa n En Šemeš ikka Gelilot tǝnimawalat ǝd tǝzǝggǝzzǝyt ta n Adumim. Izagaday ǝs tǝhunt ta n Bohan imosan iyyan daɣ maddanǝs ǝn Ruben. 18 Illil iyyaka-net tasaga n ǝdɣaɣ ta n tamasna fǝl aganna wa inamawalan d ǝɣlal wa n Yordan, izagaday s aɣlal en da. 19 Okay iyyaka-net ǝs tama ta n tamasna ǝn Bet-Xogla, iraz-du daɣ tamasna n Agarew wa n Ǝsalǝɣ ɣur adag wa daq-q' iggaz agarew wa n Yordan. Den da a d-iqqal iyyaka wa n agala. 20 Iqqal agarew wa n Yordan iyyaka-net wa n dǝnnǝg. Den da a du-tǝqqal tǝdagart ta tǝtawakfat i tawšet ta n Benyamin s aɣaywan aɣaywan.
21 Ǝntanay da iɣǝrman win ǝmosnen tǝla ǝn ɣawnatan win Benyamin s aɣaywan aɣaywan: Aɣrǝm wa n Yerikaw, ǝd wa n Bet-Xogla, ǝd wa n Emek-Kessis, 22 ǝd wa n Bet-Araba, ǝd wa n Semarayim, ǝd wa n Betel, 23 ǝd wa n Abim, ǝd wa n Fara, ǝd wa n Ofra, 24 ǝd wa n Kefar-Ammona, ǝd wa n Ofni ǝd wa n Geba, iqqal awen maraw ɣǝrman ǝd ǝššin ǝd tǝɣarmaten šin fǝl ǝxkaman. 25 Ǝllan-tu deɣ ɣǝrman a ta n ǝmosnen: aɣrǝm wa n Gabawun, ǝd wa n Rama, ǝd wa n Beyerot, 26 ǝd wa n Misfe, ǝd wa n Kefira, ǝd wa n Mossa, 27 ǝd wa n Rekem, ǝd wa n Irǝfewel, ǝd wa n Tarala, 28 ǝd wa n Sela, ǝd wa n Elef, d ǝɣrǝm wa n Yebusatan almaɣna Yerusalam, d ǝɣrǝm wa n Gibeyat ǝd wa n Kirǝyat-Yarim. Iqqal awen maraw ɣǝrman d ǝkkoz ǝd tǝɣarmaten šin dǝr namahazan ǝxkaman fall-asnat. Awen ketnet imos tadagart ǝn tawšet ǝn Benyamin s aɣaywan aɣaywan.