17
Tadagart ǝn tawšet ta n Manasay
1 Dǝffǝr tawagganat tǝšaɣeren, tǝgraw tawšet ta n Manasay tǝdagart daɣ amadal. Manasay amaran aɣafadday ǝn Yusǝf a imos. Dat awen itawakfa amadal y ǝzzurrǝyya ǝn Makir imosan aɣafadday ǝn Manasay. Makir ǝnta a erawan Galad, amaran imos alǝs n anammagar ilan ǝwǝl. Awen daɣ a fǝl igraw akal wa n Galad ǝd wa n Bašan iddǝnnagan y agarew wa n Yordan. 2 Tawakfan mǝdlan i ɣawnatan n ǝzzurrǝyya ǝn Manasay win d-ǝqqimnen ǝmosnen: Aɣaywan wa n Abǝyezer, ǝd wa n Xelek, ǝd wa n Asrǝyel, ǝd wa n Šǝkem, ǝd wa n Xefer, ǝd wa n Šemida. Meddan di fǝl ǝgan ɣawnatan di, ketnasan Manasay a d-ǝgmadan, imosan ag Yusǝf. 3 Xefer eraw Zelofad, Xefer amaran ag Galad. Galad ag Makir. Makir ag Manasay.
Amaran Zelofad wǝr igrew yayyan, šibararen ɣas a igraw s esmawan-nasnat: Maxla, ǝd Nowa, ǝd Xogla, ǝd Milxa, ǝd Tirsa. 4 Ǝkkanat-du ǝlimam wa igan esǝm Elɣazar ǝd Joswe ag Nun ǝd muzaran ǝn tamattay ǝnnanat-asan: «Amaɣlol omar Musa s a danaɣ-akfu imǝdlan s ǝmmǝk was tan-ǝgrawan meddan ǝn tawšet-nanaɣ.» Tǝzzar ǝgrawnat tǝbararen ǝn Zelofad imǝdlan ǝs tǝmǝwit tas tan-ǝgrawan meddan ǝn tawšet-nasnat, s ǝmmǝk was omar Amaɣlol. 5 Iqqal âs tawšet ta n Manasay tǝgraw daɣ amadal maraw dǝgran dǝffǝr amadal wa ǝgrawan kala da, imosan wa n Galad ǝd wa n Bašan, ahanen efay wen iddǝnnagan i agarew wa n Yordan. 6 Fǝlas šidoden ǝn tawšet ta n Manasay šin den, a tawakfanen tǝdagart daɣ mǝdlan s ǝmmǝk was tan-ǝgrawan meddan ǝn tawšet-nasnat. Amaran amadal wa n Galad en, kala da in ǝzzurrǝyya ǝn Manasay.
7 Ibaz-du iyyaka n amadal wa n Manasay ɣur akal wa n Aššer har ǝɣrǝm wa n Mikmetat iddǝnnagan i Šǝkem. Ibaz-du deɣ ɣur Mikmetat ikka sa sǝr agala har tǝmattiwen šin ǝxsarnen En-Tafuwax. 8 Amadal wa, imos tǝla ǝn Manasay mišan aɣrǝm wa n Tafuwax ihan iyyaka-net in tawšet ta n Efrayim. 9 Tǝzzar izagaday iyyaka-net daɣ agala ǝn tǝsǝssǝngǝyt ta n Kana. Tawakfan ɣǝrman win ǝhanen agala ǝn tǝsǝssǝngǝyt ta n Kana y aytedan win Efrayim, kuddeɣ as iɣǝrman en amadal ǝn Manasay a ǝhan. Ifal iyyaka-net ǝddi da daɣ tamasna ǝn tǝsǝssǝngǝyt ta n Kana har d-iraz ɣur agaraw wa zǝwwǝran. 10 Tawšet ta n Efrayim tǝha agala ǝn tǝsǝssǝngǝyt, ta n Manasay tǝha tamasna-net. Iqqal agaraw wa zǝwwǝran iyyaka wa n ataram ǝn tawšet ta n Manasay. Tawšet ta n Aššer amaran, tǝha tamasna daɣ ataram ǝn ta n Manasay, ta n Issakar tǝha tamasna daɣ dǝnnǝg. 11 Tǝgraw tawšet ta n Manasay daɣ amadal wa n Issakar ǝd wa n Aššer iɣǝrman win: aɣrǝm wa n Bet-Šeyan ǝd wa n Ibleyam ǝd tǝɣarmaten šin fǝl ǝxkaman. Tǝgraw deɣ aɣrǝm wa n Dor ǝd karad daggan wiyyad ǝmosnen En-Dor ǝd Tanak ǝd Megidaw ǝd tǝmattiwen-nasan ǝd tǝɣarmaten šin fǝl ǝxkaman. 12 Mišan ǝzzurrǝyya ǝn Manasay indar-as ad abǝz iɣǝrman win daɣ Kananitatan win daɣ-san ǝxsarnen fǝlas ǝsǝggǝtǝkki a ǝgan as wǝr z'ǝgmǝdan iɣǝrman win den. 13 Ǝglan maddanǝs n Israyil har ǝknan assahat, mišan wǝr tan-ǝsteɣan, dǝr iga awen da ǝgan-tan zun eklan.
14 Tǝzzar ǝnkaran maddanǝs n Israyil win ǝzzurrǝyya ǝn Yusǝf ǝmosnen tawšet ta n Efrayim ǝd ta n Manasay, ǝkkan Joswe ǝnnan-as: «Mafel danaɣ-tǝkfeɣ tadagart iyyadda ɣas daɣ akal? As iga awen da nǝkna igǝt fǝlas izazzabat-du Amaɣlol albaraka-net fall-ana.» 15 Inn-asan Joswe: «Dad zamas tǝggǝtam, wǝr dawan-igda akal wa n ǝdɣaɣan n Efrayimatan, agliwat tǝɣtǝsam daɣ gorasan win Fǝrizitatan ǝd win Rafayitatan idaggan daɣ za tǝɣsǝram.» 16 Tǝzzar ǝnnan i Joswe: «Akal wa n ǝdɣaɣan wǝr danaɣ-igda. Šizawaɣen amaran ǝxsâran daɣ-asnat Kananitatan sinahalnen tǝla ǝn mutag n ǝmǝgǝr ǝgânen daɣ amalankaytan ǝn tǝzoli ǝlwâyan ǝggǝsan. Ǝlan-tan win ǝxsarnen aɣrǝm wa n Bet-Šeyan ǝd tǝɣarmaten šin fǝl ǝxkaman, ǝlan-tan deɣ win ǝxsarnen iɣǝrman win ahanen aɣlal wa n Jizreyel.» 17 Tǝzzar inna Joswe y ǝzzurrǝyya ǝn Yusǝf: «Tidǝt a imos as tǝggǝtam tǝknâm assahat, adi da a fǝl wǝr za tǝgrǝwam tadagart iyyadda ɣas daɣ akal. 18 Daɣ adi amadal wa n ǝdɣaɣan ǝlsan gorasan ad iqqǝl i-nawan. Ǝɣtǝsat daɣ-as eškan tilem-tu ketnet har da d-iraz. Kud imos as Kananitatan ǝknan assahat ǝlan deɣ amalankaytan n ǝmǝgǝr ǝlwayan ǝggǝsan da a daɣ-san tabǝzam amadal di.»