46
Tǝzrek ǝn Yaqub d Aɣaywan-net ǝs Masar.
1 Iggǝlat Israyil ǝnta ǝd tǝla-net ketnet. As osa Ber-Šeba iga šikutawen i Mǝššina, Ǝmǝli n Abba-net Isǝhaq. 2 Iššewal Mǝššina y Israyil daɣ anay n etǝs inn-as: «Yaqub! Yaqub!» Ikkǝwan-as inn-as: «Nak da» 3 Tǝzzar inn-as: «Nak Mǝššina, Ǝmǝli n abba-nak. A kay-wǝr-tǝggǝz tasa n iki ǝn Masar fǝlas den da a kay-z-aga tamattay tagget. 4 Nak iman-in a dǝr-ǝk iddewan ǝs Masar amaran illikan as nak a kay-du-z-issuɣǝlan. As kay-z-iba illa ɣur-ǝk Yusǝf.»
5 Igmad Yaqub Ber-Šeba. Ǝssǝwanan bararan n Israyil abba-nasan Yaqub ǝd bararan-nasan ǝd tǝdoden-nasan šimariwen šin dasan-d-issǝgla Firɣawna y a tanat-in-ǝwǝnan. 6,7 Iddew Yaqub ǝd maddanǝs kul ǝd yahawan-net kul, ǝd hǝrwan-nasan d awa ǝkrazan kul daɣ akal ǝn Kanan. Ǝmmǝk di daɣ as iggǝlat Yaqub ǝnta d awa t-id-igmadan s akal Masar.
8 Ǝntanay da esmawan ǝn maddanǝs n Israyil (esǝm wa hadan ǝn Yaqub) win d-osanen Masar ǝntanay ǝd maddanǝsan: Aɣafadday-net esǝm-net Ruben. 9 Maddanǝs ǝn rures Ruben ǝmosan Xenok, ǝd Falu, ǝd Xesseron ǝd Karmi. 10 Maddanǝs ǝn Šimǝɣon ǝmosan Yǝmul, ǝd Yamin, d Ohad, ǝd Yakin, ila deɣ aššes ǝmosnen Isoxas ǝd Šul teraw wǝlǝt Kanan. 11 Maddanǝs ǝn rures Lebi ǝmosan Geršon, ǝd Kǝhat ǝd Mǝrari. 12 Maddanǝs ǝn rures Yahuda ǝmosan Er, d Onan, ǝd Šela, ǝd Farǝs ǝd Zarax. Mišan Er d Onan aba-tan daɣ akal wa n Kanan. Farǝs amaran eraw Hersan ǝd Xamul. 13 Maddanǝs ǝn rures Issakar ǝmosan Tola, ǝd Fuhax, ǝd Yašub ǝd Šimron. 14 Maddanǝs ǝn rures Zǝbulun ǝmosan Sered, d Elon ǝd Yaxlel. 15 Ǝntanay da da maddanǝs ǝn Yaqub win ila ǝd Leyya daɣ akal ǝn Mezobotamǝya, ila dǝr-ǝs deɣ tǝbarart tǝgât esǝm Dina. Iqqal ǝket ǝn maddanǝs-net d aššes ǝd hayawan-net win ila ǝd Leyya karadat tǝmǝrwen ǝd karad.
16 Maddanǝs ǝn rures Gad ǝmosan Isifyon, ǝd Xaggi, ǝd Šuni, d Esbon, d Eri, d Arodi, d Areli. 17 Maddanǝs ǝn rures Aššer ǝmosan Yimna, ǝd Yišfi, ǝd Bǝriha ǝd tamadrayt-nasan Serax. Briha eraw Xeber ǝd Malkyel. 18 Ǝntanay da da maddanǝs ǝn Yaqub d aššes ǝd hayawan-net win ila ǝd Zilfa taklit ta ikfa Laban elles Leyya imos ǝket-nasan maraw ǝd sǝdis.
19 Maddanǝs ǝn Yaqub win ila ǝd Raxil ǝmosan: Yusǝf ǝd Benyamin. 20 Yusǝf igraw bararan daɣ akal ǝn Masar, ǝmosnen Manasay d Efrayim, il-en d Asnat ta n elles ǝn Foti-Fera ǝlimam n ǝɣrǝm wa n On. 21 Maddanǝs ǝn Benyamin ǝmosan Bela, ǝd Beker, d Ašbel, ǝd Gera, ǝd Naman, d Exi, ǝd Roš, ǝd Muffim, ǝd Xuffim d Ared. 22 Ǝntanay da da maddanǝs ǝn Yaqub ǝd hayawan-net win ila ǝd Raxil, imos ǝket-nasan maraw d ǝkkoz.
23 Rures ǝn Yaqub wa igan Dan eraw Rušim. 24 Rures ǝn Yaqub wa igan Naftali eraw Yaxsel, ǝd Guni, ǝd Yeser ǝd Šilem. 25 Ǝntanay da da maddanǝs ǝn Yaqub ǝd hayawan-net win ila ǝd Bilxa taklit ta ikfa Laban elles Raxil imos ǝket-nasan ǝssa.
26 Ǝket n aytedan win d-ǝgmadnen Yaqub ǝddêwan-du dǝr-ǝs ǝs Masar as wǝr ǝhenat tǝdoden ǝn maddanǝs, imos sǝdisat tǝmǝrwen n awedan ǝd sǝdis. 27 Aytedan win di ǝwaran-tan-in ǝššin bararan win Yusǝf ǝhǝwnen daɣ Masar iqqla ǝket n aytedan kul n aɣaywan ǝn Yaqub daɣ Masar ǝssayat tǝmǝrwen.
28 Izzozar-in Yaqub Yahuda ǝs Yusǝf fǝl a das-imǝl as ǝntanay ǝzayan-in Gošen. As din-osan akal ǝn Gošen, 29 isammatag Yusǝf tamara-net ikka akal wen issǝlkad y abba-net Israyil. Da daɣ ad inay Yusǝf abba-net a sǝr-ǝs in-ozal izalammat-tu ad ihallu fǝl ǝzir-net har irǝw. 30 Inna Yaqub i Yusǝf: «Ǝmǝrǝdda kud ira ib-i azzama ǝnayaq-qay tǝddâra.»
31 Inna Yusǝf y aɣaywan n abba-net: «Ad aglaɣ ad ǝmǝlaɣ i Firɣawna as abba-nin d aɣaywan-net osan-i-du, ǝgmadan-du akal ǝn Kanan. 32 Ǝmǝlaɣ-as deɣ as imadanan a tǝmosam fǝlas ihǝrwan a tǝlam gǝr win madrornen wala win zawwarnen tosam-du dǝr-san ǝntanay d awa tǝlam kul. 33-34 As kawan-in-isassaɣra Firɣawna issǝstan-kawan d ǝššǝɣǝl-nawan, tannim-as: "Nakkanay mǝššikkana, a du-nǝxlak imadanan a nǝmos har harwa nakkanay ǝd marwan-nana". As das-tǝnnam adi a kawan akfu turagat ǝn tǝmǝɣsurt daɣ amadal wa n Gošen fǝlas Kǝl-Masar a ǝknanen mušǝkat ǝn madanan.»