45
1 Ab'as ifrag Yusǝf iduf ǝn tala daɣ man-net gǝr aytedan, tǝzzar isaɣɣarat, inna: «Itǝwǝsǝgǝget-i awedan kul!» Har ǝɣradan aytedan ǝwǝziwaz, igraw imǝdrayan-net s ǝsuf, as tan-izzǝzday iman-net. 2 Ikna tala haras ǝslan-as Kǝl-Masar, ewadan salan ehan ǝn Firɣawna ǝntada. 3 Inna Yusǝf i mǝdrayan-net: «Awa nak Yusǝf. Awak abba-nin iddar?» Mišan indar i mǝdrayan-net a das-ajjawwaban fǝl awa ǝgan daɣ ǝɣšud.
4 Inna Yusǝf i mǝdrayan-net: «Ihazat-i-du!» Tǝzzar ǝhozan-t-du. Inn-asan: «Awa nak Yusǝf, amadray-nawan. Nak a din-tǝzzǝnzam, ǝmmewayaɣ ǝs Masar. 5 Ǝmǝrǝdda ad wǝr tǝrmǝɣam tammagrazam inazzan win di-in-tǝgam, ǝmmewaya-du da, fǝlas Mǝššina a di-d-izzozaran y-awan s akal wa, fǝl a du-tǝrǝgam daɣ tǝmattant. 6 Ǝššin elan a iga akal ih-ay laz amaran ǝqqiman-in wiyyad sǝmmos a daɣ wǝr z'ǝnbǝlnat tǝwǝgaz za wala ammalaynat. 7 Mǝššina a di-d-izammazalan dat-wan s akal wa fǝl a du-tǝrǝgam ǝs tǝmǝwit ta tǝsammaklalat a, tilem ǝzzurrǝyya. 8 Daɣ adi wǝrge kawanay a di-d-ewayan s akal a, kala kalar Mǝššina. Ǝnta a di-igan šilat n abba i Firɣawna, idkal-i Firɣawna dǝnnǝg maššaɣalan n ahan-net kul, issodaf-i tanat n akal ǝn Masar kul.
9 Ǝqqǝlat tarmad abba-nin tannim-as: " Ǝnta da awa dak-inna rurek Yusǝf: Mǝššina ikf-i almaqam n iduf ǝn tanat n akal ǝn Masar kul. Akk-i-du tarmad 10 tǝmǝla dagma-nin tǝɣsǝra daɣ amadal wa n Gošen kay ǝd bararan nak ǝd hayawan nak d aharay nak wa ǝndǝrran ǝd wa zǝwwǝran, d awa ihan tǝla-nak kul. 11 Den da a dǝr-ǝk z'annattafa fǝl a din-wǝr-todena wala kay d aɣaywan-nak d awa ihan tǝla-nak, fǝlas harwa da ǝqqiman in sǝmmos elan ǝn laz." 12 Tǝhannayam ǝs šittawen-nawan kawanay d amadray-nin Benyamin as nak iman-in da a dawan-iššewalan da. 13 Tǝmǝlam y abba-nin adkul wa ǝgrawa daɣ Masar d awa tǝnayam kul, tǝssǝtrǝbam-du sǝr-i abba-nin.»
14 Izalammat Yusǝf amadray-net Benyamin ad ihallu, ad ihallu Benyamin ǝntada fǝl ǝzir n ǝmaqqar-net Yusǝf. 15 Ad itizǝlǝmmit Yusǝf imǝdrayan-net, ihallu. Tǝzzar ǝggazan dǝr-ǝs šin ǝmǝššiwal.
16 Ewadan salan n assa ǝn mǝdrayan ǝn Yusǝf ehan ǝn Firɣawna igraz awen i Firɣawna d aytedan-net. 17 Inna Firɣawna i Yusǝf: «Annu i mǝdrayan-nak: " Ǝnta da arat wa za tagim: aglat gaggat šimariwen-nawan tǝqqǝlam akal wa n Kanan. 18 Tǝzzar tidawam-i-du d abba-nawan ǝd ɣawnatan-nawan a kawan-akfaɣ edag wa ofan daɣ akal ǝn Masar, tǝddǝram ǝs šǝtša win ofanen daɣ akal." 19 Omâraq-qay s a dasan-tanna: " Ǝnta da awa za tagim: Ǝmmǝrat-in daɣ akal ǝn Masar šimariwen a du-tǝssǝwanam bararan-nawan ǝd tǝdoden-nawan, tǝsǝggǝlem-du abba-nawan taglim-du. 20 A kawan-wǝr-iššǝwǝš a din-tayyim arat waliyyan daɣ ǝrrǝzǝɣan-nawan fǝlas awa t-illan ofa daɣ akal ǝn Masar kul i-nawan."»
21 Ǝgan bararan n Israyil awen da. Ikf-en Yusǝf šimariwen s ǝmmǝk was t-omar Firɣawna, ikf-en deɣ allaw n ǝšikǝl. 22 Ǝkkullu n iyyan ikf-ay telassay, amaran ikfa Benyamin karadat tǝmad ǝn tamma n ǝzrǝf, ikf-ay deɣ sǝmmos sǝlsa aynaynen. 23 Isassaway y abba-net maraw bangitan ǝggigganen ǝssilxaten šin ofanen daɣ akal ǝn Masar, ǝd marawat tǝzḍen ǝggigganen alkama ǝd tǝgǝlwen ǝmosnen allaw y ǝšikǝl-net. 24 As išaššakal Yusǝf imǝdrayan-net, inn-asan: «Ad wǝr tannalhamam gar-ewwan.»
25 Ǝfalan Masar, ǝggǝzzayan s akal wa n Kanan ǝqqalan abba-nasan Yaqub. 26 Ǝgan-as isalan ǝnnan-as: «Yusǝf iddâr, ǝnta fadda a ittafan tanat n akal kul wa n Masar.» Mišan wǝr arden man ǝn Yaqub s awen fǝlas wǝr dasan-izzǝgzan. 27 Dǝr iga awen da ya as das-ǝmalan arat kul wa dasan-inna Yusǝf, inay deɣ šimariwen šin das-d-issǝgla y a tanat-in-ǝwǝnan, ǝknan man-net. 28 Inna Israyil: «Adi da a igan, barar-in Yusǝf iddâr! Ad agla at t-ǝnǝya harwa ad ǝddara!»