44
1 Dǝffǝr adi omar Yusǝf amaššaɣal wa innǝttafan d ahan-net inn-as: «Ǝdkǝr isumad ǝn meddan a awas ǝfragan aggay-net. Tǝssuɣǝla y ǝkulluk n iyyan azrǝf-net, tagaɣ-as-tu daɣ ǝmi n ǝsamǝd-net. 2 Taga takabart-in ta n ǝzrǝf daɣ ǝmi n ǝsamǝd ǝn wa ǝndǝrran tǝssǝrtǝyaɣ-as-tat d ǝzrǝf-net wa daɣ izzǝnza alkama.» Iga amaššaɣal wen arat iman-net was t-omar Yusǝf.
3 As affaw tufat aɣora, tawayyan meddan ǝglan d ǝzdan-nasan ǝggigganen ǝššokalan. 4 Ǝgmadan aɣrǝm mišan wǝr ǝggugan as inna Yusǝf y amaššaɣal wa innǝttafan d ahan-net: «Aglu, ǝlkǝm i meddan a n ihogan as tan-tewada tannaɣ-asan: "Ma fǝl tǝrazzamam alxer ǝs tǝkma? 5 Wǝr tǝssenam as takabart a ǝnta a daɣ isassu mǝšši, innay-du sǝr-ǝs igitan win ǝkkǝntalnen? Tǝgâm arak tǝmǝtǝkwǝyt tǝbrârat."»
6 Ewad-tan, inn-asan awen da. 7 Ǝnnan-as: «Mafel itaggu mǝššikkana batu tǝdi? Wǝr t-illa ǝmmǝk as za nagu ǝmazal olân d adi. 8 Tǝhannayaɣ as wala azrǝf wa nǝgraw daɣ mawan ǝn sumad-nana daɣ akal ǝn Kanan, da neway-awan-t-idu, manǝmmǝk as za nakǝr azrǝf wala urǝɣ daɣ ahan ǝn mǝššik? 9 Tǝwǝkkǝsanet man daɣ wa ɣur du-tǝgraw tǝkabart daɣ-na, ǝqqǝlanet win hadatnen eklan-nak.» 10 Inn-asan: «Ǝrdeɣ s awa tǝnnam, mišan wa ɣur du-tǝgraw takabart ɣas az z'abǝza iqqǝl akli, win hadatnen amaran ayyaq-qan.»
11 Tarmad as izazzabbat akkiyyan daɣ-san ǝsamǝd-net or-ay. 12 Ad isaggad amaššaɣal i tǝkabart daɣ sumad-nasan. Issǝnta-du ɣur wa waššaran har wa ǝndǝrran. Tǝgraw-du daɣ ǝsamǝd wa n Benyamin. 13 Ǝrmaɣan ad ǝzazarren isǝlsa-nasan, ǝkullu n iyyan iggǝgga ajad-net, ǝqqalan aɣrǝm.
14 As din-osa Yahuda ǝd mǝdrayan-net, ǝggazan ehan ǝn Yusǝf. As t-in-osan harwa da ih-ay, ǝssǝjadan dat-ǝs. 15 Inn-asan Yusǝf: «Ma imos ǝmazal wa tǝgam da? Wǝr tǝssenam as alǝs ǝn šilat-in ila fǝrregat ǝn masnat n arat ittinkalan?» 16 Inn-as Yahuda: «Ma dak-za-nannu mǝšši? Ma dak-za-najjawwab? Mas za nǝkkǝs iman-nana? Mǝššina a isaffaggan abakkad n eklan-nak. Nakkanay da ǝmǝrǝdda ad nǝqqǝl eklan-nak, nakkanay harkid wa ɣur du-tǝgraw takabart.» 17 Inna Yusǝf: «Nimaggaga d igi n ark ǝmazal di. Alǝs wa ɣur du-tǝgraw takabart-in ɣas a z'iqqǝlan akli-nin, win hadatnen amaran ad tawayyin, taglim daɣ alxer, ǝqqǝlan abba-nasan.»
18 Tǝzzar ihoz-t-idu Yahuda inn-as: «Ǝgmâya daɣ-ak mǝšši turagat n a dak-ǝššiwǝla da wǝr kay-iggez alham fǝlas almaqam-nak ewad wa n Firɣawna. 19 Kay iman-nak mǝšši as dana-tǝssǝstana kud abba-nana iddar wala, tǝssǝstanaɣ-ana ǝntada kud nǝla amadray wala. 20 Nǝjjǝwwab-ak as nǝla abba-nana waššaran ǝd barar-net ǝndǝrran igraw daɣ tušaray-net, was amaqqar-net wa dǝr wǝr iga afandes, aba-tu. Barar wa isinnahal-tu abba-nana tara, fǝlas ǝnta ɣas a das-d-iqqiman daɣ bararan ǝn tǝntut-net ta dǝr wǝr ila ar ǝššin bararan.
21 Tǝnneɣ-ana mǝššikkana: " Awǝyat-i-t-idu har t-ǝnǝyaɣ ǝs šittawen-in. " 22 Nǝnn-ak: "Barar wa wǝr ifreg abba-net ǝmǝzzǝy-net, fǝlas as t-igmad at t-iba." 23 Mišan dǝr iga awen da tǝnneɣ-ana mǝššikkana: "As du-wǝr-tǝddewam d amadray-nawan wǝr za tǝlǝsam agaraw ǝn turagat n a dat-i tǝbdǝdam. "
24 As nǝqqal akli-nak abba-nana nǝg-as batu ta dana-tǝge. 25 As danaɣ-inna abba-nana: " Ǝqqǝlat zanzat-ana-du arat ǝn sudar. " 26 Nǝnn-as: " Wǝr nǝhel tewaɣlay ar s ad nǝddew d amadray-nana. As dǝr-ǝs wǝr nǝddew wǝr za nǝgrǝw turagat ǝn tabadday dat alǝs wa ixkaman akal wen." 27 Inn-anaɣ ǝkli-nak abba-nana: " Tǝssanam as tamahharak-in Raxil ǝššin bararan a dǝr-ǝs ǝle. 28 Iyyan igmad-i, amaran ǝkkâsaɣ aššak as ǝmǝtši a iga fǝlas har ǝmǝrǝdda wǝr t-ǝnaya. 29 As di-tǝzammazzayam ǝd wa ǝnta da, tǝgraw-tu talbast iyyat, wǝdi nak a waššaran a, aɣšud ǝn man wa sǝr-i du-za-tawǝyam, a di-awǝy s alaxirat."
30 Ǝmǝrǝdda as nǝqqal akli-nak, abba-nana, wǝr nǝddew ǝd barar a, azzama tǝmǝddurt-net tǝqqân daɣ-as, 31 wǝdi at t-iba. Daɣ adi a du-nawǝy s ǝkli-nak abba-nanaɣ aɣšud ǝn man a tu-z-awǝyan s alaxirat. 32 Fǝlas nak akli-nak a ilmanan barar a. A ǝnneɣ y abba-nana: " As dak-k-idu-wǝr-ǝssoɣala ǝhan-i iman-net har faw."