43
Ǝšikǝl wa n ǝššin ǝn maddanǝs ǝn Yaqub ǝs Masar.
1 Igla laz itittǝy daɣ akal. 2 As iɣrad alkama wa d-ǝzzǝnzan maddanǝs ǝn Yaqub inn-asan šissan: «Ǝqqǝlat, ǝlǝsat-du inazzan n arat ǝn sudar.» 3 Tǝzzar inn-as Yahuda: «Alǝs wen irkâb šimǝzzugen-nana fǝl a t-in-wǝr-nǝqqel wǝr in-nǝddew d amadray-nana. As wǝr iga adi wǝr dǝr-ǝs za nammanay. 4 Kud za tarde s a dǝr-na tǝššidǝwaɣ amadray-nana wǝdi ad nǝrǝs Masar a dak-du-nazzanzu isudar. 5 Mišan as dǝr-na wǝr iddew wǝr za naglu fǝlas alǝs wen inn-âna wǝr dǝr-ǝs za nammanay ar s ad nǝddew d amadray-nana.» 6 Inn-as Israyil: «Mafel tǝgâm-i arak tǝmǝtǝkwǝyt tǝgât abrur a s das-tǝmalam ǝstizarat as tǝlâm amadray iyyan?» 7 Ǝnnan-as: «Alǝs di ǝsǝstan a dana-iyyǝwan ǝd man-nana ǝd marwan-nana, issǝstan-ana kud abba-nana iddâr wala, kud nǝla amadray wala. Tǝzzar nǝjjǝwwab i sǝstanan-net. Awak mǝni awas za nǝssǝn kud tara a iga a das-du-nawǝy amadray-nana wala?»
8 Inna Yahuda y abba-net Israyil: «Ayy-ana ad nǝššikǝl, fǝl ad naqqam da wǝr danaɣ-inɣa laz nakkanay dǝr-ǝk ǝd bararan-nana. 9 Barar-nak, nak a t-ilmanan, nak a daq-qu tǝssana as dak-k-id-wǝr-ǝssoɣala. As dak-k-idu-wǝr-ǝssoɣala tǝssǝna daɣ-i iman-net. 10 Fadda ǝnnar wǝr nǝllolat ǝmǝrǝdda nǝga-du tewaɣlay ta n sanatat.» 11 Inn-asan abba-nasan Israyil: «Kud tanat ǝddi da, wǝdi agliwat tawǝyam daɣ sumad-nawan ilalan win ofanen daɣ akal, tagim-tan susay y alǝs wen: arat ǝn mǝglan, d arat ǝn turawat, d aḍutan ǝzodnen, d âratan wiyyad ǝqqurnen n eškan. 12 Awǝyat ǝnǝtfus n ǝzrǝf, tǝssuɣǝlam wa d-itawaggan daɣ sumad-nawan, mijas tǝɣilt ɣas adi. 13 Idawat d amadray-nawan, tǝqqǝlam alǝs en. 14 Mǝššina di Maqqaran ya tǝhinatteɣ-awan, issuɣǝl-awan-du alǝs di amadray-nawan wahadan ǝd Benyamin. Nak amaran kud ǝtǝrmǝs a daɣ-i ǝtawaggin bararan-in wǝdi attarmasanet!»
15 Ǝdkalan susay wa z'awǝyan d ǝnǝtfus n ǝzrǝf wanad, ǝglan, ǝddewan ǝd Benyamin, ǝrasan Masar har ǝzzǝkken dat Yusǝf. 16 As inay Yusǝf Benyamin iddêw dǝr-san inna y ǝmuzar ǝn maššaɣalan-net: «Agu meddan a daɣ ahan, tǝgzǝma texsay tagaɣ imensewan fǝlas meddan win nak a ɣur z'atšin daɣ ammasnazal a.» 17 Iga alǝs wa arat wa das-inna Yusǝf: eway-tan s ahan ǝn Yusǝf.
18 Tǝggaz-tan tasa assaɣa wa sǝr-ǝs ǝmmewayan, ad ǝtinǝmǝnnin gar-essan: «A wa ǝddǝlil n ǝzrǝf wa nad a din-nosa daɣ sumad-nana da a fǝl nǝtawazargaz da, fǝl ad nǝtǝwǝdgǝz, nǝtǝwǝsǝknu tarna nǝqqǝl eklan, attarkaban daɣ-na ǝzdan-nana.» 19 As din-ewadan imi n ahan ǝn Yusǝf ǝhozan-in ǝmuzar ǝn maššaɣalan ǝn Yusǝf ǝnnan-as: 20 «Surǝf-ana Mǝššikkana! Nakkanay idas-anaɣ as du-nosa da nǝzzǝnza isudar 21 nǝqqal aɣaywan. Nǝššokal har dad nǝnsa nora isumad-nana. Akkiyyan daɣ-na os-in daɣ ǝmi n ǝsamǝd-net azrǝf-net, itiwasaɣal-t-idu. Azrǝf wǝdi nǝqqal-du dǝr-ǝs, 22 wǝr nǝssen i t-igan daɣ sumad-nana. Neway-du deɣ iyyan a daɣ nara isudar.» 23 Inn-asan: «Nagriwat, a kawan wǝr tǝggǝz tasa. Mǝššina Ǝmǝli-nawan, Ǝmǝli n abba-nawan ǝnta a kawan-ikfan ǝrrǝzǝɣ daɣ sumad-nawan. Azrǝf-nawan illikan as iggâz ǝfus-in.» Ikkas-asan-du amadray-nasan Šimǝɣon daɣ kasaw.
24 Ig-en alǝs wa daɣ ahan ǝn Yusǝf ikf-en d aman ǝššoradan idaran-nasan ikfa ǝzdan-nasan ǝlǝmmuz. 25 Sammagnen-du susay-nasan iket di a d-itasu Yusǝf ɣur ammasnazal fǝlas ǝslân as da da ad z'atšin. 26 As d-iggaz Yusǝf ehan ǝkfan-t-in susay wa das-d-ewayan da, tǝzzar ǝssǝjadan-as. 27 Issǝstan-tan d awa ǝxlakan, inn-asan: «Abba-nawan was di-tǝgannam ma ixlak? Iddâr?» 28 Ǝnnan-as: «Akli-nak abba-nana wǝr ila malad, iddâr.» Ǝlasan enez ǝssǝjadan-as.
29 Idkal Yusǝf asawad-net inay amadray-net Benyamin, s ǝnta a dǝr idraw anna, inn-asan: «Amadray-nawan wa da as di-tǝgannam?» Tǝzzar inn-as Yusǝf: «Ig-ak Mǝššina arraxmat barar-in!» 30 Idbaɣ-as ǝdkǝr n anay n amadray-net, itrab olɣat daɣ ammas n ahan-net, ad ihallu. 31 As iššorad udǝm-net iqqal-tan-du, igammay iduf ǝn tala daɣ man-net. Inna: «Ammawayanet-du mensewan.»
32 Ǝzunan mensewan. Ǝmmewayan wiyyad i Yusǝf, ǝmmewayan wiyyad i mǝdrayan-net, ǝmmewayan deɣ wiyyad i Kǝl-Masar win ɣur-ǝs ǝllanen, fǝlas Kǝl-Masar wǝr dǝrrǝwan ǝd Ɣibritan, imos awen arat xaraman ǝddin-nasan. 33 Ǝqqiman mǝdrayan ǝn Yusǝf dat-ǝs mitartaran s ǝmmǝk was namajwaran daɣ elan, a d-obazan ɣur wa waššaran har wa ǝndarran. Ǝnimaswadan, gar-essan iqqan awen iɣafawan-nasan. 34 Isassaga-asan-du idǝgran daɣ mensewan win-net, amaran adagar wa n Benyamin isassagar-tu win-nasan ǝs sǝmmos nǝtfusan. Ǝšwan, ǝfalawasan ǝntanay dǝr-ǝs.