42
Ǝšikǝl wa azzaran ǝn maddanǝs ǝn Yaqub ǝs Masar
1 As isla Yaqub as akal wa n Masar ih-ay alkama, inna i maddanǝs: «Ma dawan-za-taknu tǝɣimit tǝnimaswadam gar-ewwan! 2 Nak ǝslêɣ as Masar ih-et alkama, ǝrǝsat-tat, zanzat-ana-du daɣ-as alkama, a dana-wǝr-anɣu laz.» 3 Ǝrasan maraw mǝqqaran ǝn Yusǝf Masar y a daɣ-as d-azzanzin alkama. 4 Mišan wǝr dǝr-san iššedaw Yaqub Benyamin wa n amadray ǝn Yusǝf fǝlas a inna iksud a tu-tǝgrǝw talbast iyyat ǝntada. 5 Ǝglan maddanǝs n Israyil ǝddewan d aytedan wiyyad ǝntanay da ǝgmaynen alkama fǝlas akal ǝn Kanan ǝntada ewad-t-in laz.
6 Yusǝf ǝnta a azzaran y akal, ǝnta a innǝttafan ǝd taɣawšay ta n nazzan n alkama y aytedan kul win n akal. As t-in-osan mǝqqaran-net ǝssǝjadan dat-ǝs. 7 Inay Yusǝf imǝqqaran-net ɣas izday-tan mišan ikkas-asan tazdǝyt, iharaššat-tan inn-asan: «Mǝni du-tǝfalam?» Ǝnnan-as: «Akal ǝn Kanan a du-nǝfal y ad nazzanzu isudar.»
8 Yusǝf izdây imǝqqaran-net mišan ǝntanay wǝr t-ǝzdayan. 9 Ikta-du targǝten šinad itag sǝr-san da, inn-asan: «Kawanay inassasaman a tǝmosam, wǝr kawan d-eway ar ad tǝnǝyam idaggan win ǝrkamnen daɣ akal.» 10 Ǝnnan-as: «Kala kala mǝššikkana, assa ɣas a du-nǝga y ad nazzanzu isudar. 11 Nakkanay ketnana abba-nana iyyanda, aytedan ǝn tǝflǝst a nǝmos, mǝššikkana, wǝr nǝmos inassasaman.»
12 Inn-asan Yusǝf: «Kala, kala, wǝr kawan-d-ewây ar ad tǝnǝyam idaggan win ǝrkamnen daɣ akal!» 13 Ǝnnan-as: «Nakkanay mǝššikkana marawena d ǝššin as danaɣ-eraw alǝs iyyanda ǝn Kanan. Amadray-nana wa ǝndǝrran noyy-ay-in ɣur abba-nana, amaran iyyan aba-tu.»
14 Inn-asan Yusǝf: «Nak adi da a dawan-ǝnne. Kawanay inassasaman a tǝmosam. 15 Amaran a kawan-ajjarraba: " Ǝhadaɣ-awan s esǝm ǝn Firɣawna kud tǝfalam da iket wǝr di-d-osa amadray-nawan. 16 Saglat iyyan daɣ-wan a t-id-awǝy, win hadatnen amaran a tan-ǝttǝfa daɣ kasaw. A kawan-ajjarraba har ǝssǝna kud awa di-tǝgannam da tidǝt wala bahu. As wǝr iga di, ǝhâda s esǝm ǝn Firɣawna as inassasaman a tǝmosam.» 17 Ig-en daɣ kasaw har ǝgan karad adan.
18 As iga ǝzǝl wa n karad, inn-asan Yusǝf: «Agat awa dawan-z-anna da, a kawan ayya tǝddâram, fǝlas Mǝššina a ǝksuda. 19 Ad ǝnǝya kud tidǝt daɣ as aytedan ǝn tǝflǝst a tǝmosam. A d-aqqam iyyan daɣ-wan daɣ kasaw, win hadatnen aglin awǝyan alkama y aɣaywan-nawan iha laz. 20 Tǝzzar awǝyan-i-du amadray-nawan ad ǝssǝnaɣ as tidǝt a di-tǝgam. As iga adi wǝr za tǝtǝwǝnɣim.» Ǝrdan s awen.
21 Ad ǝtinǝmǝnnin gar-essan, illikan as alxaq n amadray-nana a danaɣ-itawadan. Tǝrǝmmeq ta iga as daɣ-na igammay a das-nǝhǝnǝttǝt mišan nugay-as, tǝrǝmmeq za tǝdi da a nǝga azalada. 22 Iššewal Ruben inn-asan: «Wǝrge ǝnnêɣ-awan ad wǝr tagim abakkad imosan igi ǝn barar nad daɣ ǝmi n ǝhluk? Mišan tugayam. Ǝmǝrǝdda azni-net a daɣ-na itawaran.» 23 Wǝr ǝssenan mǝqqaran ǝn Yusǝf as issân awa gannin, fǝlas ǝmǝššewǝl a ila gar-es dǝr-san. 24 Igguk-kan-in ad ihallu.
Dǝffǝr adi iqqal-du igla imišawal dǝr-san, obaz Šimǝɣon issǝɣfal-tu dat šittawen-nasan. 25 Omar Yusǝf s a dasan-tǝwǝtkǝran sumad-nasan alkama, itǝwǝssuɣǝl-tan ǝzrǝf-nasan, akkiyyan itǝwǝgget-as ǝzrǝf-net daɣ ǝsamǝd-net. Omar deɣ s a dasan-itǝwǝggu allaw. Itawagg-asan awen da. 26 Ǝggǝggan isumad-nasan fǝl ǝzdan-nasan, ǝglan.
27 As osan edag iyyan a daɣ z'ansin ora iyyan daɣ-san ǝsamǝd-net y a d-ikkǝs y ajad-net a itša tǝzzar inay azrǝf-net daɣ ǝmi n ǝsamǝd. 28 Inna i midawan-net: «Ǝnǝyat azrǝf-in itawasaɣal-i-du, ǝnta da ihan ǝsamǝd-in da.» Tǝzzar tǝggaz-tan tasa, tǝndaw-tan taysǝst, ad ǝtinǝmǝnnin gar-essan: «Ma dana-itaggu Mǝššina da?»
29 As din-osan abba-nasan Yaqub daɣ Kanan ǝmalan-as arat wa tan-igrawan kul, ǝnnan-as: 30 «Alǝs wa imosan ǝmizwar ǝn Masar as din-nosa iharaššat-ana, inna: "Kawanay inassasaman a tǝmosam." 31 Nǝnn-as nakkanay aytedan ǝn tǝflǝst, wǝr nǝmos inassasaman. 32 Nakkanay marawena d ǝššin as nǝdraw abba, aba iyyan daɣ-na, amaran wa daɣ-na ǝndǝrran iqqim-in ɣur abba-nana daɣ akal ǝn Kanan. Tǝzzar inn-ana ǝmizwar ǝn Masar: "Arat was z'ǝssǝna kud aytedan ǝn tǝflǝst a tǝmosam, 33 a ɣur-i du-tayyim iyyan daɣ-wan tǝdkǝlam alkama tawǝyam-tu y iɣawnatan-nawan iha laz. 34 As din-tosam tewayam-i-du amadray-nawan wa n alallawa ad ǝssǝnaɣ as wǝr tǝmosam inassasaman, kalar aytedan ǝn tǝflǝst a tǝmosam. Ǝddi a kawan-z-ǝssuɣǝlaɣ amadray-nawan, akfaq-qawan turagat n ad tǝssǝɣlǝyam daɣ tǝɣawšiwen-nawan daɣ akal."»
35 As d-ǝggazan šin ikus n alkama, akkiyyan os-in daɣ ǝsamǝd-net tǝsǝgrǝst iha ǝzrǝf-net. As ǝnnayan azrǝf wa tǝggaz-tan tasa ǝntanay ǝd šissan. 36 Inn-asan abba-nasan Yaqub: «Bararan-in a dǝr-i tǝzamazzayam. Yusǝf ab'as t-illa, ilkam as Šimǝɣon, amaran tarâm ad tawǝyam Benyamin. Adi kul nak a ikma.» 37 Inn-as Ruben: «As dak-du-wǝr-ǝssoɣala Benyamin tanɣa bararan-in a n ǝššin. Ǝflǝs i sǝr-ǝs, a dak-k-id-ǝssuɣǝla.» 38 Inn-as Yaqub: «Barar-in wǝr dǝr-wan iddew, fǝlas amaqqar-net aba-tu iqqim-du ɣas-net. As tu-tǝgraw talbast daɣ ǝšikǝl-nawan, nak a wâššaran a, a di-awǝy aɣšud ǝn man wa sǝr-i du-za-tawǝyam s alaxirat.»