41
Targǝten ǝn Firɣawna
1 As ǝgan ǝššin elan dǝffǝr awen iga Firɣawna targǝt tǝmosat as illa dagma n agaraw wa n Ǝnnil, 2 inay ǝssayat šitan ǝddǝratnen, as d-ǝgmadnat agaraw, ǝnaznat ǝdannat daɣ taddalǝt. 3 Dǝffǝr awen inay šiyyad ǝssayat ǝn tǝmǝnšaš, ǝbrarnen, as d-ǝgmadnat agaraw ǝntanatay da, ǝbdadnat dagma ǝn šinad hossaynen a, daɣ tǝšǝšwit n Ǝnnil. 4 Ǝnkarnat šitan šin tǝmǝnšaš ǝbrarnen, ǝɣradnat alamaz ǝn šin hossaynen en. Tǝzzar inkar-du Firɣawna daɣ etǝs.
5 Iqqal etǝs ilas targǝt, inay ǝssayat tǝɣaɣanen ǝtfâsnen ǝhossaynat ǝhânat agabal iyyanda. 6 Dǝffǝr adi inay šiyyad ǝssayat ǝssumnen issiqqad-tanat ǝhud as d-ǝdwalnat dǝffǝr šin azzarnen. 7 Ǝlmaznat tǝɣaɣanen šin ǝssumnen šin n ǝssayat ǝtfâsnen zawwarnen. Inkar-du Firɣawna, issan as awa targǝt.
8 As d-affaw Firɣawna da irriddad, isassaɣra-du imaššaɣawan ǝd musanan kul ǝn Masar. Immǝgrad-asan ǝs targǝt-net. Mišan wǝr tan-iha i das-imalan almaɣna-net. 9 Tǝzzar ibdad-du ǝmuzar ǝn maššaɣalan win ǝnnǝttafnen d ǝšǝšwi-net inn-as: «Azalada a d-assaktaɣ alxataten-in win okaynen.» 10 Ǝzǝl iyyan iggaz-kay alham-in nak d ǝmuzar ǝn maššaɣalan win dak-tagginen šigǝlwen, tǝgeɣ-ana daɣ kasaw wa sǝr innǝttaf ǝmuzar ǝn magazan-nak. 11 Ahad iyyan, nǝga targǝten fǝl ǝššin-ena s akkiyyat d almaɣna-net. 12 Kasaw wen nǝnimah-ay d iyyan daɣ Ɣibritan, imosan ašku n ǝmuzar ǝn magazan-nak. Nǝssoɣal-as targǝten-nana tǝzzar imal y akkiyyan daɣ-na almaɣna ǝn targǝt-net. 13 Ǝmmǝk da was danaq-qanat-imal: «Nak za tawasaɣalaɣ ǝššǝɣǝl-in, amaran alǝs wa hadan itawašalay ašǝk.»
14 Izammazal Firɣawna awedan, issǝgmay-tu Yusǝf. Itawakkas-du tarmad daɣ kasaw, ilza, isammattay tabdoq. Tǝzzar igla-du har ibdad dat Firɣawna. 15 Inna Firɣawna i Yusǝf: «Nak ǝgeɣ targǝten as di-aba i di-tanat-imalan, amaran ǝsleɣ as kay tǝmmala targǝten.» 16 Inn-as Yusǝf: «Wǝrge nakku a immalan targǝten, kala kalar Mǝššina a z'agin i targǝten ǝn Firɣawna emel wa tu-z-anfin.»
17 Inna Firɣawna i Yusǝf: «Anay a ǝge daɣ targǝt-in as ǝbdâda daɣ tama n agarew wa n Ǝnnil, 18 har din-ǝswada daɣ ǝssayat šitan ǝddǝratnen ǝhossaynen as t-id-ǝgmadnat. Ǝnaznat ǝnbarnat daɣ taddalǝt. 19,20 Ǝnaya harwa šiyyad ǝssayat ǝnšašnen, ǝbrarnen wǝllen, ǝlbâknen as wǝr kala ad ǝnaya tulat-nasnat daɣ Masar. Šitan šin, ǝlkamnat-du i šin d-azzarnen ǝddǝratnen ǝtšanat-tanat. 21 Ǝɣradnat iguz ǝn tǝdusen-nasnat mišan wǝr dasnat-tanat-tǝha tǝnfa awen, fǝlas ǝglanat ǝbrârnat. Tǝzzar ǝnkara-du daɣ etǝs. 22 Ǝlasaɣ ǝnaya daɣ targǝt iyyat ǝssayat tǝɣaɣanen ǝtfâsnen ǝhossaynat ǝhânat agabal iyyanda. 23 Dǝffǝr adi ǝnaya šiyyad ǝssayat ǝlliswaynen ǝssumnat, issiqqad-tanat ǝhud, as d-ǝdwalnat dǝffǝr šin d-azzarnen. 24 Ǝnkarnat tǝɣaɣanen šin ǝssumnen ǝlmaznat šin ǝdfasnen. Targǝten šin ǝmalaq-qanat i maššaɣawan mišan wǝr tan-iha i di-imalan almaɣna-nasnat.»
25 Inna Yusǝf i Firɣawna: «Targǝten ǝn Firɣawna almaɣna-nasnat iyyanda. Mǝššina a iran ad imǝl i Firɣawna arat otas igi-net. 26 Ǝssayat šitan šin ǝhossaynen di, adi ǝssa elan, amaran ǝssayat tǝɣaɣanen šin ǝhossaynen ǝntanatay da ǝssa elan: targǝt iyyadda adi. 27 Ǝssayat šitan šin ǝnšašnen, ǝbrarnen a d-ǝgmadnen agarew daɣ tilkamat d ǝssayat tǝɣaɣanen šin ǝssumnen issiqqad-tanat ǝhud adi ǝssa elan. Mišan ǝssa elan di, in laz. 28 Awa da ǝnneɣ ihogan Mǝššina a iran ad imǝl i Firɣawna arat was otas igi-net. 29 A d-asin ǝssa elan ǝn tewant akal ǝn Masar kul. 30 Ǝlkǝman-asan ǝssa elan wiyyad ǝn laz har din-attawin aytedan tewant ta nad, tǝgmǝd tǝnfa akal. 31 Awa z'agu laz daɣ igi, a din-attawin aytedan tewant tas kala ad tǝga.» 32 Inna Yusǝf harwa: «Ǝššin igitan win tǝgeɣ i targǝt ta sinafalalan as Mǝššina isigatakkat tanat-net, amaran tarmad as tat-z-ammazal.
33 Ǝmǝrǝdda iwar-kay ad tǝsǝnnǝfrǝnaɣ alǝs n ǝlmǝxsud n ǝmǝli ǝn tayttay a za tǝssudǝfa tanat n akal ǝn Masar ketnet. 34 Iwar-kay deɣ ad tǝdkǝlaɣ imaššaɣalan daɣ akal ketnet y a du-tabazan tǝzunt ta n sǝmmosat n awa talayan aytedan daɣ tǝwǝgas-nasan daɣ ǝssa elan win tewant. 35 Ǝššidǝwanet ǝnnuɣan ǝn sudar kul daɣ elan ǝn tewant win d ǝzaynen da. Ǝššidǝwanet alkama daɣ ɣǝrman win tizart ǝn Firɣawna, iqqǝl šiɣebǝren, aggǝzan-tu. 36 Isudar win ad ǝqqǝlan šiɣebǝren y ǝssa elan ǝn laz win z'aginen daɣ akal ǝn Masar. As iga adi wǝr z'ihlǝk laz akal.»
37 Tǝgraz batu ta i Firɣawna d aytedan-net. 38 Inna Firɣawna y aytedan-net: «Alǝs a za ih-ay Rux ǝn Mǝššina. Mǝnid za nǝgrǝw tulat-net?» 39 Inna Firɣawna i Yusǝf: «Dad zamas issosan-kay Mǝššina daɣ aratan win, wǝdi wǝr t-illa alǝs n ǝlmǝxsud n ǝmǝli ǝn tayttay ar kay. 40 Kay a z'izaran y aytedan-in, ittǝf akal kul tanat-nak, nak taɣmar ɣas as kay z'agǝra. 41 Ǝmǝrǝdda ǝgeq-qay ǝmuzar ǝn Masar.» 42 Ikkas-du Firɣawna tǝsǝndǝrt daɣ adad-net ig-et daɣ wa n Yusǝf. Ig-as telassay mallat tǝknât šihussay d ǝzzǝwi, iqqan-as takaza n urǝɣ ta wǝr itǝqqǝn ar ǝmǝnokal. 43 Issǝwan-tu tamara-net ta n sanatat tǝmosat amalankay ǝrkâban ǝggǝsan, s ǝnta a iggan ǝmaray sǝr-ǝs, ad saɣaren dat-ǝs meddan gannin: «gǝrǝffǝtat-as!» Tǝmǝwit ta da as issodaf Firɣawna Yusǝf tanat n akal ǝn Masar kul. 44 Inna Firɣawna deɣ i Yusǝf: «Nak za Firɣawna a mosa, mišan wǝr t-illa awedan a z'isǝffǝrǝkrǝkan arat daɣ akal ǝn Masar kul ar ǝs turagat-nak.» 45 Iga Firɣawna i Yusǝf esǝm Safnat-Fanex, izzǝzlaf-tu Asnat tǝmosat elles ǝn Foti-Fera wa n ǝlimam n ǝɣrǝm n On. Tǝzzar iššokal Yusǝf iras akal ǝn Masar as ittâf tanat-net kul.
46 Yusǝf ila karadat tǝmǝrwen n awatay as d-immeway i Firɣawna, ǝmǝnokal ǝn Masar. Imatakway Yusǝf ɣur Firɣawna iššokal daɣ amadal ǝn Masar ketnet. 47 Daɣ ǝssa elan win tewant, ǝgânat tǝwǝgas igi olâɣan. 48 Ad išadaw Yusǝf isudar kul daɣ akal ǝn Masar har ǝndan ǝssa elan win den. Isudar win, iɣabbar-tan daɣ ɣǝrman. Ǝkkullu n ǝɣrǝm iššedaw-du isudar daɣ tǝwǝgas šin t-ǝhoznen. 49 Alkama wa iɣbar Yusǝf da, iga igǝt wǝr iga ar amadal, wǝr ifreg fadda ǝddukad-net fǝl iba ǝn tǝla-net ǝket.
50 Dat azzaman win laz ila Yusǝf ǝššin bararan ǝd tǝntut-net Asnat, elles ǝn Foti-Fera ǝlimam n ǝɣrǝm n On. 51 Barar-net wa n aɣafadday ig-as esǝm Manasay fǝlas a inna: «Mǝššina a di-in-isattawan tamaɣatirt-in kul d aɣaywan-nana kul.» 52 Wa n ǝššin ig-as esǝm Efrayim fǝlas a inna: «Mǝššina a di-ikfan tǝla ǝn bararan daɣ akal wa daɣ ǝnaya arkanay.» 53 Ǝɣradan ǝssa elan win tewant ɣas, 54 ǝntan win laz ǝs tǝmǝwit tas tan-imal Yusǝf.
Iga laz daɣ kallan kul. Akal wa n Masar ɣas a ǝhan sudar. 55 As idgaz laz aytedan kul win Masar, ǝkkan Firɣawna sakkarayan fall-as. Inn-asan: «Aglat, akkiwat Yusǝf, tagim arat kul wa dawan-z-annu.» 56 Idgaz laz akal ǝn Masar ketnet, amaran olam Yusǝf šiɣebǝren šinad iga da, a din-izanzu alkama i Kǝl-Masar. Ikna laz dǝgguz n aytedan daɣ Masar ketnet. 57 A du-gallan aytedan daɣ kallan kul gammayan-du alkama ǝs Masar zanzin-t-in ɣur Yusǝf, fǝlas ikallan kul as tan-idgaz laz.