40
1 Dǝffǝr awen ǝmalan-tu ǝššin meddan ǝmosnen imaššaɣalan zawwarnen n ǝmǝnokal ǝn Masar. Iyyan imos ǝmuzar ǝn maššaɣalan win ǝnnǝttafnen d ǝšǝšwi-net a imos. Wa hadan ǝmuzar ǝn win tu-šatšinen. Meddan win ǝgan ark ǝmazal i Firɣawna, 2 iggaz-tu alham-nasan. 3 Ig-en Firɣawna daɣ kasaw tas azzar ǝmuzar ǝn magazan-net s ǝnta a iha Yusǝf. 4 Ig-en ǝmuzar ǝn magazan ǝn Firɣawna daɣ ǝfus Yusǝf innǝttaf dǝr-san, har ǝgan azzaman daɣ kasaw. 5 Ahad iyyan ǝgan maššaɣalan win ǝššin en targǝten daɣ kasaw s akkiyyat d almaɣna-net. 6 As affaw os-en-du Yusǝf, inay-tan ǝzikanzaran.
7 Tǝzzar issǝstan-tan inn-asan: «Ma fel tǝzikanzaram azalada?» 8 Ǝnnan-as: «Akkiyyan daɣ-na iga targǝt ǝndod amaran wǝr t-illa awedan ifrâgan emel-nasnat.» Inn-asan Yusǝf: «Mǝššina a ifragan a dawan-tanat-imǝl. Meqqal a di-tǝssuɣǝlam-i targǝten-nawan?»
9 Issoɣal-as ǝmuzar ǝn maššaɣalan win ǝnnǝttafnen d ǝšǝšwi ǝn Firɣawna tǝrgǝt-net inn-as: «Anay a ǝge dat-i esab n alɣanab. 10 Esab wen ila karad lǝdlad. Inzar ɣas tǝls-ay tǝjigay, d alɣanab iŋŋan. 11 As iga awen ǝttafa tǝkabart ta daɣ isassu Firɣawna, ǝnḳada-du alɣanab wa, ǝzmeq-qu daɣ-as, ǝzzalaɣ-as-tat-in.»
12 Inn-as Yusǝf: «Ǝntada almaɣna ǝn targǝt-nak: ilǝdlad win karad n asab ǝmmittalan karad adan. 13 Ɣur karad adan a kay-akfu Firɣawna tǝttǝyt, issuɣǝl-kay ǝššǝɣǝl-nak, a t-in-tǝhakka tǝkabart-net ta n tassay, s ǝmmǝk was das-tat-in-tǝhakkaɣ anin. 14 Amaran a di-in-wǝr-tattawaɣ as tǝkna taɣra-nak. Are daɣ-ak a di-tagaɣ ǝlxurma n a du-tǝdkǝla batu-nin i Firɣawna, tǝkkǝsaɣ-i-in daɣ kasaw a. 15 Fǝlas ǝmiwǝy a d-ǝge s ǝššil daɣ akal ǝn Ɣibritan, amaran kasaw wa ǝhe da, da wǝr ǝmmozalaɣ arat waliyyan a di-igan daɣ-as.»
16 As inay ǝmuzar ǝn maššaɣalan win šatšinen Firɣawna Yusǝf as ikfa almaɣna ihossayan targǝt n ǝmidi-net, inn-as: «Nak da ǝle targǝt. Daɣ targǝt-in ewâya fǝl aɣaf-in karadat tǝsayyen ǝhanat tǝgǝlwen šin ǝzodnen. 17 Tesayt ta n afalla ǝhan-tat ǝnnuɣan ǝn tǝgǝlwen šin ǝzodnen ewâyaɣ i Firɣawna, mišan tasin-du gǝdad, titǝwǝqqen-tanat.» 18 Inn-as Yusǝf: «Ǝnta da almaɣna n adi: šisayyen šin karadat, adi karad adan. 19 Ɣur karad adan ad isǝhhukǝt Firɣawna eɣaf-nak, iššilǝy-kay ašǝk, ad titǝwǝqqen gǝdad isan-nak.»
20 Karad adan dǝffǝr awen, ewad-du ǝmud wa n tǝhǝwt ǝn Firɣawna, isassaga saksas i maššaɣalan-net kul. Issok-as-du daɣ kasaw, ǝmuzar ǝn maššaɣalan win tu-šašwinen, d ǝmuzar ǝn win tu-šatšinen. 21 Ǝmuzar ǝn win ǝnnǝttafnen d ǝšǝšwi-net za, issoɣal-tu ǝššǝɣǝl-net. Inkar ǝmuzar wen, ikf-in Firɣawna takabart ta daɣ isassu. 22 Ǝmuzar ǝn win tu-šatšinen amaran, iššolay-tu ašǝk. Iɣsal-du awa inna Yusǝf. 23 Eges ya, ǝmuzar ǝn maššaɣalan win ǝnnǝttafnen d ǝšǝšwi ǝn Firɣawna, wǝr d-ikta Yusǝf. Kalar ittǝw-t-in.