38
Yahuda ǝd Tamar
1 Azzaman en da ad ifal Yahuda imǝdrayan-net ikka alǝs igân esǝm Xira ihan aɣrǝm n Adulam. 2 Aɣrǝm en da a daɣ inay Yahuda tabarart n iyyan daɣ Kananitatan igân esǝm Šuwa, tǝzzar izlaf-tat iggaz fall-as. 3 Tǝga tadist, tǝgraw barar, ig-as esǝm Er. 4 As ǝlan barar wa n ǝššin, tǝg-as esǝm Onan. 5 Ǝlan wa n karad, tǝg-as esǝm Šela. As ihǝw barar wa, Yahuda iha aɣrǝm ǝn Kǝzib.
6 Izzǝzlaf Yahuda aɣafadday-net Er tantut tǝgât esǝm Tamar. 7 Mišan Er itaggu imazalan wǝr ira Amaɣlol, tǝzzar eway-du sǝr-ǝs Amaɣlol tamattant. 8 Tǝzzar inna Yahuda y Onan: «Aglu, ǝggǝz fǝl tǝntut ta ɣur aba ǝmaqqar-nak, fǝl ad tassandaɣ ǝzuk wa iwaran ǝlǝggus, tagaɣ deɣ ǝzzurrǝyya y amaqqar-nak.» 9 Onan issanan as ǝzzurrǝyya wa wǝrgeɣ i-net, adi a fǝlas id inamansa fǝl tǝntut ta d-oyya ǝmaqqar-net den, ad issǝnɣǝl daɣ amadal fǝl ad wǝr agu ǝzzurrǝyya y ǝmaqqar-net. 10 Ǝmazal wa itaggu Onan da, wǝr t-ira Amaɣlol, tǝzzar eway-du sǝr-ǝs Amaɣlol tǝmattant ǝnta da. 11 Inna Yahuda i tǝdaggalt-net Tamar: «Akku aɣaywan n abba-nam taga daɣ-as tǝmǝɣsurt ta n tǝntut as aba alǝs-net, har idwǝl barar-in Šela.» Awen ig-ay Yahuda fǝlas iksud ad agu barar-net Šela tamattant ta ǝgan mǝqqaran-net. Tǝkka Tamar šis, tǝɣsar ɣur-ǝs.
12 As tǝga tamert tagget dǝffǝr awen aba taɣur Yahuda, elles ǝn Šuwa. As tu-tokay tǝrǝmmeq n iba ǝn taɣurǝs, ikka Timna y ad azzalzu tǝduft n ayfad-net, iddew d ǝmidi-net Xira wa n ǝɣrǝm n Adulam. 13 Tǝsla Tamar as ǝdaggal-net Yahuda ikka Timna y ad azzalzu tǝduft n ayfǝd-net. 14 Tǝzzar tǝkkas isǝlsa win tǝzallag tǝntut as aba alǝs-net, tǝssǝwar afǝr fǝl ad tǝgmǝd tazdǝyt. Tǝgla tǝqqim fǝl afay ǝn tarrayt ǝn Timna, daɣ ihǝz n ǝmi n ǝɣrǝm wa n Enayim, fǝlas tǝnây as Šela idwal, mišan harwa da wǝr tat-itawazazlaf.
15 As tat-inay Yahuda iɣil tǝkarwat fǝlas udǝm-net a tǝssǝlsa. 16 Ikk-et fǝl afay ǝn tarrayt inn-as: «Ǝndam a dǝr-ǝm nǝmǝnsa» fǝlas wǝr issen as awa tǝdaggalt-net. Tǝnn-as: «Ma di-za-takfa tǝnǝmǝnsa dǝr-i?» 17 Inn-as: «A dam-d-ǝssǝwǝtaɣ aynǝs daɣ aharay-nin.» Tǝnn-as: «Ǝrdeɣ mišan dǝr ǝššǝrǝd n a ɣur-i du-tayyaɣ arek iyyan a z'iqqǝlan tǝmǝtirt har di-t-idu-tǝssǝwǝta.» 18 Inn-as: «Ma imos za arat wa ɣur-ǝm du-z-ayya?» Tǝnn-as: «A di-takfaɣ ejwal-nak ǝd tǝzarkaten-net, ǝd tǝburǝk a tǝttafa da.» Ikf-as-tan. Tǝzzar inamansa dǝr-ǝs, tǝxmal. 19 Tǝbdad, tǝgla, tǝkkas afǝr wa tǝssǝwar, tǝqqal isǝlsa-net win tǝlassu tǝntut as aba alǝs-net.
20 Issǝwat Yahuda aynǝs ǝmidi-net wa n Adulam fǝl a d-awǝy ɣur tǝntut ilalan win tǝttaf daɣ adag n aynǝs wa das-imal Yahuda. Mišan wǝr tat-in-ogez. 21 Issǝstan dǝr-ǝs aytedan win ǝɣsarnen Enayim. Inn-asan: «Ma tǝga tǝkarwat as kala tǝwar efay ǝn tarrayt ta?» Ǝnnan-as: «Wǝr kala a tu-tǝmal tǝkarwat da.» 22 Iqqal Yahuda imal-as as wǝr tat-igrew, amaran aytedan da ǝnnan wǝr tǝha a imosan tǝkarwat akal en. 23 Inna Yahuda: «Tǝttǝfet ilalan win ɣur-ǝs ǝllanen. As nǝgla nǝsastan dǝr-ǝs a danaɣ-in-agrin aytedan agin-ana tadaza. Aynǝs za ǝssǝwataɣ-ak-ku y as wǝr tat-in-togeza.»
24 As ǝganat karadat tǝlil dǝffǝr adi ittǝmal i Yahuda as tǝdaggalt-net Tamar tǝssǝxram, tǝga tadist. Inna Yahuda: «Tǝtǝwǝkkǝset-du, tǝtǝwǝsǝbǝlǝglǝget.» 25 As du-tǝtawasardaɣ, tǝzammazal s ǝdaggal-net tǝnn-as-in: «Awedan wa ilan ilalan di ǝnta a di-igan tadist, ǝgmaya daɣ-ak ad tǝssǝna kud tǝzdayaɣ ejwal di ǝd tǝzarkaten-net ǝd tǝburǝk di, tǝmǝlaɣ-i-du mǝššissan.» 26 Izday-tan Yahuda inna: «Tantut ta tǝla fall-i tidǝt fǝlas a ihoran a tat-ǝzzǝzlǝfaɣ i barar-in Šela, mišan wǝr das-ǝgeɣ awen.» Wǝr kala a fall-as ilas Yahuda iguz dǝffǝr was kala a fall-as t-iga.
27 As tǝnamahaz d iguz n ǝmzur itawassan as eknewan a za tilu. 28 As tǝggaz šin iguz n ǝmzur igmad-du ǝfus n iyyan daɣ bararan tǝdkal-du tǝntut ta n tǝnakbalt tenallay zaggaɣat tǝqqan-tat daɣ tawšet ǝn barar en fǝl ad tǝssusǝn as ǝnta a d-azzaran. 29 Mišan issoɣal-in ǝfus-net, azzar-as-du ǝmidi-net tǝhǝwt. Tǝzzar tǝnn-as tǝnakbalt: «Kay tǝrze-du tarrayt i man-nak!» Adi da fǝlas itawaggu esǝm Farǝs. 30 Ihǝw-du ǝmidi-net, was tǝqqan tenallay zaggaɣat daɣ tawšet-net, itawagg-as esǝm Zarax.