37
Ǝlqissat ǝn Yusǝf ag Yaqub
1 Iɣsar Yaqub daɣ akal ǝn Kanan s ǝnta as kala daɣ-as iɣsar šis.
Targǝten ǝn Yusǝf
2 Ǝnta da ǝlqissat ǝn maddanǝs ǝn Yaqub. Yusǝf imos abi n aw maraw elan d ǝssa. Faw iddân ihǝrwan-nasan itidaw ǝd mǝqqaran-net win maddanǝs ǝn Bilxa ǝd Zilfa. Immal i šis arak tǝnnawen šin taggin mǝqqaran-net. 3 Israyil (esǝm wahadan ǝn Yaqub) issof Yusǝf bararan-net kul win hadatnen fǝlas tušaray-net a daq-qu igraw. Ig-as takatkat tǝknât šihussay. 4 Ǝnayan mǝqqaran-net as issof-tan šissan Yusǝf, ǝgzaran-tu har as ab'as ǝfragan a das-agin batu tǝhossayat.
5 Iga Yusǝf targǝt, imal-asan-tat, tǝzzar ǝsannahalan-tu gezzar. 6 Ǝnta da awa dasan-inna: «Sǝsǝmat-i a dawan-ǝmǝla targǝt ta ǝgeɣ: 7 šiwǝgas a nǝha nǝtaqqan šibolasen n alkaman, wala a ihogan oggeɣ tǝbolast ta-nu tǝbdâd, ǝkkanat-tat-du šin-nawan ǝɣalayɣalaynat-tat, ǝssǝjadnat-as.»
8 Ǝnnan-as mǝqqaran-net: «Ǝngǝm kay a z'iqqǝlan ǝmǝnokal-nana, tǝxkǝmaɣ-ana?» Sannahalan-tu gezzar wǝllen fǝl targǝt ta sǝr-san iga da, d amel wa dasan-tat-iga.
9 Iga Yusǝf targǝt iyyat imal-tat i mǝdrayan-net. Inn-asan: «Ǝgeɣ targǝt iyyat tǝmosat as ǝnaya tǝfuk ǝd tǝllit d etran ǝmosnen maraw d iyyan, sajadan-i.» 10 Targǝt ta imal i mǝdrayan-net da, šis da imal-as-tat. Iharaššat-tu šis inn-as: «Ma imos almaɣna ǝn tǝrgǝt ta? Adis a dak-nǝssǝjǝd nak d anna-nak ǝd mǝqqaran-nak?» 11 Tǝzzar ǝmmǝnzaɣan-tu mǝqqaran-net mišan šis ǝnta immǝɣras-in ikittǝw targǝt ten.
Yusǝf itawazanz-in i mǝššukal ǝkkanen Masar
12 As ǝzǝl iyyan ǝglan mǝqqaran-net ǝdanan eharay ǝn šissan daɣ amadal ǝn Šǝkem. 13 Inna Israyil i Yusǝf: «Imǝqqaran-nak wǝrgeɣ ǝkkan tǝmǝdint ǝs Šǝkem? Iyyaw a kay-zǝmmizǝla sǝr-san.» Inn-as: «Nak da.» 14 Inn-as Yaqub: «Aglu ǝssǝn imǝqqaran-nak ǝhan alxer, ǝntanay d aharay-nasan, tǝqqǝla-du tǝmǝlaɣ-i.» Tǝzzar immozal Yusǝf, igmad aɣlal wa n Xebron ikka Šǝkem. 15 Ijiwankat daɣ ǝsuf as immǝnay d alǝs iyyan. Inay alǝs wen as axarak a iga Yusǝf, inn-as: «Mas tǝsaggada?» 16 Inn-as Yusǝf: «Imǝqqaran-in as ǝsaggada. Meqqal tǝssânaɣ edag wa daɣ ǝdanan.» 17 Inn-as alǝs wa: «Ǝgmadan amadal wa fǝlas ǝsallaɣ-asan as ǝnnan: "Ǝndawatanaɣ amadal wa n Dotan!"» Ilkam Yusǝf i mǝqqaran-net har tan-in-osa daɣ Dotan.
18 Izay-tan-du daɣ igǝg as t-oggan ǝgan tanat n ad t-anɣin. 19 Ǝnamannan gar-essan: «Ǝmǝggi ǝn targǝten den a d-izayan den. 20 Anɣiwatanaq-qu a tu-nǝgǝr daɣ iyyat daɣ tǝgaziwen a, ad nannu ǝmudar a t-itšan, ad nǝssǝn awa z'ǝqqǝlnat targǝten-net.» 21 Isl-asan Ruben, igmay d ǝsǝfsi-net inn-asan: «Ad wǝr nagu iman-net. 22 Ad wǝr tǝnɣǝlam azni-net, ǝgǝrat-tu ɣas daɣ tagaza a n ǝsuf a, taqqamim da wǝr tu-tǝdesam.» Arat wen inn-asan-tu Ruben fǝl ad t-assafsu issuɣǝl-tu i šis.
23 As d-ewad Yusǝf imǝqqaran-net ǝkkasan daɣ-as takatkat-net ta tǝknat šihussay. 24 Tǝzzar ǝdkalan-tu ǝgaran-tu daɣ tagaza wǝr ǝhen aman. 25 Ǝqqiman ad tattin. Wala a ihogan ǝdkalan isawadan-nasan oggan taɣlamt n Ismaɣelitatan a du-tǝfâlat amadal ǝn Galad. Ǝggiggan olaman-nasan ilalan ǝganen daɣ mǝglan d aḍutan ǝzodnen, ǝnnimadan Masar.
26 Tǝzzar inna Yahuda i mǝdrayan-net: «Ma dana-z-aknu ad nanɣu amadray-nana nǝɣbǝr tǝmattant-net? 27 Ǝndawat a t-in-nazzanzu y Ismaɣelitatan en, naqqam da wǝr tu-nǝdes, fǝlas amadray-nana a imos, arat iyyanda a dǝr-ǝs nǝmos.» Tǝzzar ǝrdan mǝqqaran ǝn Yusǝf ǝs batu ta. 28 Taɣlamt ten imassatagan n Ismaɣelitatan as itawannu Midǝyanitatan a daɣ tǝga. As d-ǝllaman den, ǝnkaran mǝqqaran ǝn Yusǝf ǝkkasan-t-id daɣ tagaza, ǝzzǝnzan-t-in y Ismaɣelitatan en sanatat tǝmǝrwen ǝn tafelt n ǝzrǝf, ewayan-tu ǝs Masar. 29 As din-iqqal Ruben tagaza inay as wǝr tat-iha Yusǝf. Tǝzzar izazzarrat isǝlsa-net fǝl awa iga daɣ tǝrǝmmeq. 30 Iqqal imǝdrayan-net, inn-asan: «Barar wǝr t-illa! Ma z'aga ǝmǝrǝdda?»
31 Tǝzzar ǝgzaman ǝzolaɣ ǝdkalan takatkat ǝn Yusǝf, ǝssǝlmaɣan-tat daɣ ǝzni-net. 32 Ǝsassawayan takatkat ta tǝknat šihussay en ǝs šissan, ǝnnan-as-in: «Adi da a din-nogaz ǝssǝn kud takatkat ǝn barar-nak adi wala.» 33 Izday-tat inna: «Awalla za tǝkadkat ǝn barar-in awa! Ǝmudar n ǝmǝtši a t-itšan! Barar-in Yusǝf iqqal idesan!» 34 Tǝzzar izazzarrat Yaqub isǝlsa-net fǝl tǝrǝmmeq, igaz isǝlsa ǝn bǝhu ad ihallu fǝl barar-net har iga adan aggotnen. 35 Ad gammayan bararan-net ǝd tǝbararen-net ketnasan d a tu-sǝssikǝyan tǝrǝmmeq mišan ugay, inna: «Kala kala, har faw ǝɣšadan man-in iket wǝr ǝlkemaɣ i barar-in s alaxirat.» Immǝɣras-in ihallu fall-as.
36 As itaggu awen Yusǝf ǝnta ǝzzǝnzan-t-in Midǝyanitatan daɣ akal ǝn Masar y alǝs igân esǝm Fotifar illan daw Firɣawna, imos ǝmuzar ǝn magazan-net.