35
Tewaɣlay ǝn Yaqub Betel.
1 Inna Mǝššina i Yaqub: «Ǝbdǝd, takka Betel, tǝɣsǝra den da, tǝkrǝsaɣ-i edag ǝn tǝkutawen. Nak a dak-d-inafalalan as tǝddǝrraga y ǝmaqqar-nak Ezaw.» 2 Inna Yaqub y aɣaywan-net d aytedan kul win ɣur-ǝs ǝllanen: «Ǝɣrǝdat-in taggor n a imosan ǝssǝnǝm, tǝzzǝzdǝgam, tǝsǝmmǝttǝyam isǝlsa! 3 Ad nǝgmǝd edag a, nakku Betel s ǝnta a daɣ z'ǝkrǝsaɣ edag ǝn tǝkutawen i Mǝššina a di-isannaflayan assaɣa wad maɣatara, issân daɣ-i daɣ daggan kul win ose.» 4 Tǝzzar ǝkfan Yaqub ǝssǝnǝman win ǝlan kul, ǝd tǝzabaten šin ǝhanen šimǝzzugen-nasan, fǝlas ǝntanatay da ǝdrawnat arat d ǝssǝnǝman. Inbal-tan Yaqub daw ašǝk zagren illân dagma n ǝɣrǝm ǝn Šǝkem. 5 Dǝffǝr adi ǝggǝlen. Iga Mǝššina tasa labasat daɣ ɣǝrman win tan-ɣalayɣalaynen. Adi da fǝlas wǝr t-illa awedan ilkaman i maddanǝs ǝn Yaqub.
6 Ewad Yaqub ǝnta d aytedan kul win dǝr iddew edag igân esǝm Luz, (s ǝnta as itawannu Betel), daɣ akal ǝn Kanan. 7 Ikras Yaqub den da edag ǝn tǝkutawen ig-as esǝm El-Betel (almaɣna-net Ǝmǝli ǝn Betel) fǝlas den da a das-inafalal Mǝššina assaɣa wad iddǝrrag y ǝmaqqar-net Ezaw. 8 Aba Dǝbora tǝmosat taklit ta tǝssǝnkasat Raqqiyetu, tǝtawanbal daw ašǝk zagren izigadayan daw Betel, (igân esǝm elon daɣ tǝlɣibrit) awen da a fǝl das-itawagga esǝm Elon wa n Tala. 9 Ilas-du Mǝššina ǝnǝfilal i Yaqub ɣur tawaɣalay-net Mezobotamǝya, ikf-ay albaraka. 10 Inn-as: «Esǝm-nak Yaqub mišan dǝffǝr azala ad tagaɣ esǝm Israyil.» Adi da a fǝl itawagga i Yaqub esǝm Israyil. 11 Tǝzzar inn-as Mǝššina: «Nak Mǝššina di Maqqaran. Igatet ǝzzurrǝyya-nak wǝllen, iqqǝlet aɣrǝf, aginat fall-as tǝmattiwen aggotnen agin daɣ-as mǝnokalan. 12 Akal wa ǝkfeɣ Ibrahim d Isǝhaq, a dak-t-akfa kay da, akfaq-qu y ǝzzurrǝyya-nak dǝffǝr-ǝk.»
13 Dǝffǝr adi igmad Mǝššina edag wa daɣ iššewal i Yaqub den. 14 Issǝɣta Yaqub daɣ adag wa daɣ-as iššewal Mǝššina da tǝhunt ǝs tǝzzǝgrǝt-net, inɣal fall-as tatukay tǝmosat esmad n alɣanab, issǝlal-tat widi, tǝqqal isaktan. 15 Tǝzzar iga y adag wa daɣ-as iššewal Mǝššina den esǝm Betel (almaɣna Ehan ǝn Mǝššina).
Tǝhǝwt ǝn Benyamin d iba ǝn Raxil, d iba n Isǝhaq
16 Iggǝlat Yaqub d aɣaywan-net daɣ Betel. Ǝhân tarrayt n ǝɣrǝm n Efrata a daq-qu ǝggugan, as tǝggaz Raxil šin iguz n ǝmzur a das-wǝr-nǝlǝmmid. 17 A fall-as tǝssas talɣa tǝnn-as tǝntut ta n tǝnakbalt: «Dawat, barar iyyan ǝn yay a tǝgrawa!» 18 Mišan as iga di da tǝlla ɣur-ǝs tamattant. Adi a fǝl das-tǝga esǝm Benoni (almaɣna ag talawayt-in), mišan abba-net ig-as esǝm Benyamin (almaɣna ag ǝɣil). 19 Aba Raxil. Tǝtawanbal fǝl afay ǝn tarrayt ta tǝkkat aɣrǝm n Efrata, aɣrǝm en itawagg-as esǝm Betlexem. 20 Issǝɣta Yaqub tǝhunt tǝqqal tǝmǝtirt fǝl tasaskawt-net. Tǝmǝtirt en tǝmmun fǝl tasaskawt ǝn Raxil har azala.
21 Dǝffǝr awen iggǝlat Israyil, ikras aɣaywan-net dǝnnǝg Migdal-Eder. 22 Iɣsar Israyil daɣ amadal wa da, as iggaz Ruben šin šikra ǝn Bilxa tǝmosat tawahayt n abba-net. Isla abba-net awen.
Maraw meddan d ǝššin a ila Yaqub. 23 Ila ǝd Leyya Ruben, aɣafadday-net, ǝd Šimǝɣon, ǝd Lebi, ǝd Yahuda, d Issakar ǝd Zǝbulun 24 Ila ǝd Raxil Yusǝf ǝd Benyamin. 25 Ila ǝd Bilxa, ta n tǝklit ǝn Raxil Dan ǝd Naftali. 26 Ila ǝd Zilfa, ta n taklit ǝn Leyya, Gad d Aššer. Ǝntanay da da maddanǝs ǝn Yaqub win ila daɣ Mezobotamǝya.
27 Os-in Yaqub aɣaywan n abba-net Isǝhaq daɣ Mamre, dagma n ǝɣrǝm ǝn Kirǝyat-Arba, s ǝnta a imosan ǝmǝrǝdda Xebron wa daɣ iga Ibrahim d Isǝhaq tǝmǝɣsurt a daɣ ǝmosan iɣǝrab. 28 Temeday n awatay d ǝttamat tǝmǝrwen a iga Isǝhaq daɣ ǝddǝnet, 29 as t-aba. Daɣ adi dǝffǝr tǝɣrǝst zagret ǝd tušaray a daɣ issiday, ad igmad aytedan, ilkam i marawan-net. Ǝnbalan-tu bararan-net Ezaw ǝd Yaqub.