34
Dina ǝd Šǝkem
1 Ǝzǝl iyyan tǝssǝɣlay Dina ta n elles ǝn Yaqub ǝd Leyya y a du-tǝnǝy šidoden n akal. 2 Inay-tat Šǝkem wa n iyyan daɣ Xiwitatan, imosan ag Xamor wa n ǝmǝnokal n akal, irkab-tat uda fall-as. 3 Tǝzzar tǝggaz Dina iman ǝn Šǝkem, ig-as tara n Iblis ad igammay awas tu-za-tiru. 4 Inna Šǝkem y abba-net Xamor: «Are daɣ-ak a di-tǝzzǝzlǝfa tabarart en.»
5 Isla Yaqub as tabarart-net tǝtiwajajargan, mišan dad zamas maddanǝs ǝhan ǝsuf d aharay iffǝsta, wǝr inna arat har d-ǝqqalan. 6 Ikka Xamor wa n šis ǝn Šǝkem Yaqub y a dǝr-ǝs ammagrad daɣ batu ten. 7 As d-ǝfalan maddanǝs ǝn Yaqub ǝsuf ǝgrawan isalan n awa igan. Ǝɣšadan man-nasan, iggaz-tan alham labasan fǝlas ǝmazal wa dasan-iga Šǝkem den, imosan agadal fǝl tamadrayt-nasan Dina, isifallas Kǝl-Israyil. Ǝmazal wa wǝr t-illa i tu-z-iqbǝlan. 8 Inn-asan Xamor: «Barar-in, Šǝkem ikna tara ǝn tabarart-nawan. Ǝgmâya daɣ-wan a das-tat-takfim a tat-izlǝf. 9 Nazlafatana. Akfat-ana aššekkawan, a kawan-nakfu šin-nana. 10 Tǝham ǝlxǝyyar n ad tǝɣsǝram ɣur-na. Akal ǝddi tǝggǝzam-tu, tǝllǝmam daɣ-as dad tǝram, tagim daɣ-as šiɣawšiwen-nawan, tilem daɣ-as ǝrrǝzǝɣan.» 11 Šǝkem iman-net inna i Yaqub ǝd mǝqqaran ǝn Dina: «Are daɣ-wan ad tǝqbǝlam arat wa daɣ-wan ǝgmaya da, a kawan-akfaɣ arat kul wa daɣ-i tǝgmayam. 12 Ǝgmǝyat daɣ-i taggalt zǝwwǝrat ǝd tǝnufa aggotnen. A kawan akfaɣ awa dǝr tǝssǝstanam kul. Are daɣ-wan ɣas a di-takfim tabarart a, a tat-ǝzlǝfa!»
13 Tǝzzar ǝgan maddanǝs ǝn Yaqub i Šǝkem ǝd šis Xamor aljawab imosan tǝkǝrrest-nasan, fǝlas ǝjǝjjǝrgǝn a iga Šǝkem tǝmadrayt-nasan Dina. 14 Ǝnnan-asan: «Wǝr nǝfreg ad nakfu tamadrayt-nana alǝs wǝr nǝmmǝnkad izlǝf-tat, id adi tǝkarakit a ɣur-naɣ imos. 15 Wǝr dawan-za-nardu, ar s-ad-tǝsimankadam yayyan kul win ǝzdaɣnen aɣrǝm a. 16 Ǝddi a kawan-za-nakfu aššekana, nǝzlǝf šin-nawan, nǝnǝmǝɣsǝr dǝr-wan, nǝqqǝl aɣrǝf iyyanda. 17 Mišan as wǝr tǝqbelam ad tammankadam ad nawǝy tamadrayt-nana, naglu.»
18 Ǝljǝmat ten oggam-tat Xamor ǝd rures Šǝkem. 19 Tǝzzar iga Šǝkem tarmad awa daɣ-san itawagmayan den, fǝlas idgaz daɣ elles ǝn Yaqub. Ǝnta amaran ikna tǝla ǝn batu daɣ ahan-nasan. 20 Ikka Xamor ǝd rures Šǝkem edag wa n ǝmǝnǝy daɣ ǝmi n ǝɣrǝm, ǝmmǝgradan i meddan-nasan, ǝnnan-asan: 21 «Meddan en ǝnnǝyen-ana alxer, ayyat-anaq-qan ad ǝɣsǝran daɣ akal-nana, ǝllǝman daɣ-as dad ǝran ǝhan ǝššǝɣǝlan-nasan. Akal elwa fall-ana nakkanay dǝr-san! Ad nǝzlǝf aššessan, ǝzlǝfan šin-nana. 22 Mišan meddan en ǝgân ǝššǝrǝd n as wǝr z'ǝqbǝlan tartǝyt dǝr-na, nǝqqǝl aɣrǝf iyyanda ar s ad ǝmminkadan yayyan-nana kul awa ǝgan ǝntanay da. 23 As dǝr-na namaɣsaran, ihǝrwan-nasan d ǝrrǝzaɣan-nasan ad ǝqqǝlan i-nana. Daɣ adi ardat-ana s ǝššǝrǝd-nasan a dǝr-san nǝnǝmǝɣsǝr.» 24 Ǝqbalan meddan en kul awa dasan-inna Xamor ǝd rures Šǝkem, tawasamankadan.
25 Mišan as ǝzǝl wa n karad, a daɣ ǝknan yayyan win ǝmmǝnkadnen den tǝzzurt, ǝnkaran-du ǝššin daɣ mǝqqaran ǝn Dina, ǝmosnen Šimǝɣon ǝd Lebi, ǝdkalan šikabiwen-nasan, ǝggazan aɣrǝm wǝr nǝnked ad ǝnaqqan yayyan kul win t-ǝhanen. 26 Ǝnɣan Xamor iman-net ǝd rures Šǝkem, ǝkkasan-du Dina daɣ ahan ǝn Šǝkem, ǝglan dǝr-ǝs. 27 Osan-du maddanǝs ǝn Yaqub win hadatnen saffaykan šimǝɣsa, oɣan aɣrǝm wa ijajjarganan tamadrayt-nasan. 28 Oɣan eharay wa ǝndǝrran ǝd wa zǝwwǝran, d ǝzdan, d aharay kul wa ihan aɣrǝm d ǝsuf-net. 29 Oɣan awa ǝlan kul. Oɣan bararan-nasan ǝd tǝdoden-nasan, d awa ihan inan-nasan kul.
30 Inna Yaqub i Šimǝɣon ǝd Lebi: «Tǝgam-i daɣ aššawaša, fǝlas tǝgam-i arat a fǝl di-z-ǝgzǝran Kananitatan ǝd Fǝrizitatan. Nak wǝr ǝleɣ ar tǝkǝbǝzzet ǝn meddan. As fall-i namannakan, ǝsrayan-i, a di-ǝhlǝkan nak d aɣaywan-in.» 31 Mišan ǝnnan-as maddanǝs: «Awak ad nayyu tǝmadrayt-nana tǝtǝwǝggu zun tǝkarwat?»