33
Ǝmǝnǝy ǝn Yaqub d Ezaw
1 Idkal Yaqub asawad-net ogga Ezaw izay-t-idu iddêw d ǝkkozat tǝmad n alǝs, tǝzzar izun Yaqub bararan gǝr Leyya, ǝd Raxil ǝd tǝwahayen-net a n sanatat. 2 Iga šiwahayen-net ǝd maddanǝsnat daɣ aɣaf, issǝlkam-asnat Leyya ǝd maddanǝs, amaran Raxil ǝd rures Yusǝf amaran ig-en daɣ ǝlǝqqam. 3 Ǝnta iman-net azzar-asan kul. As din-ihoz Yaqub ǝmaqqar-net ig-in sǝr-ǝs ǝssa sǝjudan.
4 Ozal Ezaw issǝlkad-as, izalammat-tu igabarrat iri-net ad hallan fǝl awa ǝgan daɣ tǝdǝwit. 5 As inay Ezaw šidoden ǝd bararan issǝstan Yaqub inn-as: «Ma mosan za aytedan win dǝr tǝddewa da?» Inn-as Yaqub: «Awa bararan win ikfa Mǝššina daɣ ǝllǝllu-net akli-nak.» 6 Ewadnat-du tǝwahayen ǝssǝjadnat ǝntanatay ǝd maddanǝsnat y Ezaw. 7 Dǝffǝr adi tewad-du Leyya tǝssǝjad-as ǝnta ǝd maddanǝs. As d-ǝɣradan aggad ketnasan, ilkam-asan-du amaran Yusǝf ǝd maṣ Raxil ǝssǝjadan y Ezaw ǝntanay da.
8 Issǝstan-tu Ezaw inn-as: «Mas tǝleɣ ǝnnǝyat n a tu-taga ǝs sǝgan win dǝr ǝmmǝnaya?» Inn-as Yaqub: «A areɣ a dak-kan-aga susay mǝšši fǝl a ɣur-ǝk ileɣ udǝm.» 9 Inn-as Ezaw «Ǝlêɣ ǝrrǝzǝɣ aggen amadray-nin, ǝttǝf awa tǝle.» 10 Eges inn-as Yaqub: «Kala, onsayaq-qay kud ǝleɣ ɣur-ǝk udǝm, ad tǝqbǝlaɣ susay-nin, fǝlas šišalaɣ anay-nak d anay ǝn Mǝššina, id tǝqbâlaɣ-i. 11 A daɣ-ak are, ad tǝqbǝla susay wa dak-d-immewayan id Mǝššina issikn-i ǝllǝllu-net, ikf-i arat kul was ǝddǝrara.» Idgaz-tu Yaqub wǝllen har iqbal Ezaw susay-net. 12 Inna Ezaw: «Ǝndawat za ad ǝggǝzaɣ eɣaf-nawan tǝlkǝmam-i.» 13 Inn-as Yaqub: «Tǝssana mǝšši as bararan ǝrkaman, ǝnnittafa deɣ d ayfad ǝd wǝlli ǝd šitan sankasnen as di-tǝha tǝhanit-nasnat. As dǝr-ǝsnat iga awedan tǝzrek a tanat-tǝdgâzat kuddeɣ ǝzǝl iyyanda, ad ammatinat. 14 Onsayaq-qay, mǝšši, a di-tizara, ǝlkǝmaɣ-ak-in sollan, ǝttâfaɣ ǝs tǝɣǝllǝt ǝn hǝrwan win ǝzzǝrgaza, ǝd tǝɣǝllǝt ǝn bararan har din-awǝda aɣaywan-nak daɣ Sehir.» 15 Inn-as Ezaw: «Are daɣ-ak a ɣur-ǝk d-ayya arat daɣ meddan-in.» Inn-as Yaqub: «Wǝr sǝr-san ǝddǝrara, mǝšši. Igd-i as ɣur-ǝk ǝgrâwaɣ udǝm.»
16 Ibaz Ezaw tarrayt ǝzǝl wen da, iqqal Sehir. 17 Yaqub amaran ǝnta ikka edag igan Sukkot, ikras daɣ-as ehan, iga ifǝrgan y aharay-net. Adi da fǝl itawagga y adag en esǝm Sukkot (almaɣna ifǝrgan).
18 Ɣur tawaɣalay ǝn Yaqub ifâl-du akal ǝn Mezobotamǝya, ewad-du daɣ alxer aɣrǝm wa n Šǝkem ihan amadal ǝn Kanan, izzǝbbat dat ǝɣrǝm. 19 Izzǝnza Yaqub ɣur maddanǝs ǝn Xamor, wa n šis ǝn Šǝkem, amadal wa daɣ ikras aɣaywan-net temeday ǝn tafelt n ǝzrǝf. 20 Ikras daɣ-as edag ǝn tǝkutawen, ig-as esǝm El-Elohe-Israyil (almaɣna, Mǝššina ǝnta Ǝmǝli n Israyil).