32
1 Iga-du Laban tanakra tǝnzâyat ad itǝzǝlǝmmit ihayawan-net ǝd tǝbararen-net, ig-asan šiwatriwen, iqqal aɣaywan-net.
2 Igla Yaqub daɣ tǝzregen-net. Tǝzzar ǝssǝlkadan-as d angalosan. 3 As tan-inay Yaqub, inna: «Awa aɣaywan ǝn Mǝššina!» Adi da fǝlas iga y adag en esǝm Maxanayim (almaɣna ǝššin ɣawnatan).
Ǝsǝmmutǝg ǝn Yaqub y ǝmǝnǝy n Ezaw
4 Izzozar-in Yaqub inammazalan s ǝmaqqar-net Ezaw daɣ ǝdɣaɣan ǝn Sehir, daɣ akal n Edom. 5 Omar-tan, inn-asan: «Anniwat i mǝšši Ezaw awa: "Inn-ak ǝkli-nak Yaqub: nak ǝqqimaɣ-in ɣur Laban har azalada! 6 Ǝkraza šitan, d ǝzdan, d aharay wa ǝndǝrran, d eklan ǝd taklaten. Ǝzzozaraɣ-in sǝr-ǝk inammazalan-in a dak-ǝmǝlan mǝšši, fǝl a ɣur-ǝk ǝgrǝwaɣ ǝlqǝbulat."»
7 Ǝqqalan-du nammazalan Yaqub, ǝnnan-as: «Nos-in ǝmaqqar-nak Ezaw, ǝnta iman-net issilkad-ak-du, iddêw d ǝkkozat tǝmad n alǝs.»
8 As isla Yaqub y awen, tǝggaz-tu tasa wǝllen, inkad, izun aytedan-net d aharay-net wa ǝndǝrran ǝd šitan ǝd mǝnas, ig-en ǝššin ɣawnatan. 9 Fǝlas inna daɣ man-net as ikǝnnas Ezaw d iyyan daɣ aɣaywan, wa hadan ad igmǝd. 10 Tǝzzar ittar Yaqub inna: «Ya Mǝššina, Ǝmǝli n abba-nin Ibrahim, Ǝmǝli n abba-nin Isǝhaq, ya Amaɣlol, kay a di-innan: "Ǝqqǝl akal-nak, ɣur marwan-nak a dak-agaɣ alxer!" 11 Ǝlluɣ kul wa di-tǝssǝkna d iduf wa di-tǝgeɣ arkawal, wǝr dǝr-san ǝnnǝha. As ǝɣrasaɣ agarew wa n Yordan tǝburǝk ɣas a ǝttafa, mišan azalada nak da a d-iqqalan da ǝmosaɣ ǝššin ɣawnatan. 12 Onsayaq-qay a di-tagǝza daɣ ǝmaqqar-in Ezaw fǝlas ǝksudaɣ a di-isrǝy ihlǝk-i nak ǝd tǝdoden ǝd bararan. 13 Id kay iman-nak a di-innan: "A dak-agaɣ tǝnfa tagget, ǝssǝgeɣ ǝzzurrǝyya-nak šilat ǝn tǝblalen n amadal a wǝr nǝla medan".»
14 Insa den da ahad wen. Isannafran daɣ tǝkarzay-net ta tu-tǝhozat a iga susay y ǝmaqqar-net Ezaw. 15 Isannafran sanatat tǝmad ǝn taɣat ǝd sanatat tǝmǝrwen n ǝzolaɣ, sanatat tǝmad ǝn tilay ǝd sanatat tǝmǝrwen n akar, 16 karadat tǝmǝrwen ǝn talamt ǝd waran-nasnat, ǝkkozat tǝmǝrwen ǝn tǝst ǝd maraw zǝgran, sanatat tǝmǝrwen ǝn tajat ǝd maraw bangitan. 17 Izammazzay isǝgan en issodaf-tan y eklan-net, inn-asan: «Izarat-i-in, amaran tagim taffawt gar-ewwan.» 18 Tǝzzar omar akli-net wa izzǝrgazan ǝsǝgǝn wa azzaran: inn-as: «As tǝmmǝnaya d ǝmaqqar-in Ezaw isǝstan-kay inn-ak: "Ma kay-ilan? Mǝnis tǝdaga? Ma ilan eharay wa tǝzzǝrgaza da?" 19 Tannaɣ-as: "In mǝšši, akli-nak Yaqub. Isǝgan a susay a ǝmosan i mǝšši Ezaw. Yaqub iman-net ilkâm-ana-du."» 20 Inna awen da y eklan-net kul win ǝzzǝrgaznen isǝgan win iga da susay. 21 Inn-asan deɣ a das-annin: «Akli-nak Yaqub izay-du.» Iga Yaqub ǝnnǝyat n as susay wa din-azzaran, ad isǝhhǝdǝrrǝt alham n Ezaw. As z'ammanayan da mijas igrâw ɣur-ǝs ǝlqǝbulat. 22 Issǝgla Yaqub isǝgan win iga da susay y ǝmaqqar-net a das-in-izaran, ǝnta amaran iqqim-du ɣur aɣaywan ahad wen.
Tǝbǝllant ǝn Yaqub daɣ Fǝnǝyel
23-24 Inkar-du ahad wen da iddew ǝd tǝdoden-net a n sanatat, ǝd tǝwahayen-net a n sanatat ǝd bararan-net a n maraw d iyyan, issǝɣras-tan angǝy wa n Yaboq. Dǝffǝr adi iɣrad ǝsǝɣrǝs n awa ila kul 25 iqqim-du ɣas-net. Tǝzzar os-ay d alǝs iyyan ibbǝllan dǝr ǝs har affaw. 26 As inay alǝs wa as Yaqub izmâr, idas-tu daɣ sǝmmǝɣras win daɣ in tǝggaz taɣma tǝtoɣast, irrǝffat-du ǝduf wa n taɣma-net daɣ tǝtoɣast-net igla Yaqub ittâf-tu. 27 Inna alǝs en i Yaqub: «Šalw-i ad agla, ezal iga!» Mišan inn-as Yaqub: «Wǝr kay-z-ayya iket wǝr di-tǝkfeɣ albaraka.»
28 Inn-as alǝs: «Ma esǝm-nak?» Inn-as: «Esǝm-in Yaqub.» 29 Amaran inn-as alǝs en: «Dǝffǝr azala, ab-as tǝgeɣ esǝm Yaqub id tǝbǝllant a tǝgeɣ ǝd Mǝššina ǝd meddan, tǝgle tǝzmâra. Adi da fǝlas ǝmǝrǝdda ad tagaɣ esǝm Israyil (almaɣna ibbǝllan ǝd Mǝššina).» 30 Tǝzzar issǝstan-tu Yaqub inn-as: «Onsayaq-qay a di-tǝmǝlaɣ esǝm-nak» Inn-as: «Ma fel tǝsastana d esǝm-in?» Tǝzzar ikf-ay albaraka. 31 Iga Yaqub y adag en esǝm Fǝnǝyel (almaɣna udǝm ǝn Mǝššina), id inna: «Ǝnaya Mǝššina udǝm s udǝm, ǝgleɣ, ǝddâra!»