31
Tǝzrek ǝn Yaqub fǝl Laban
1 Igraw Yaqub isalan as ǝgannin maddanǝs ǝn Laban: «Yaqub itaɣu tǝkarzay n abba-nana» 2 Inay Yaqub as Laban immittay fall-as. 3 Iššewal Amaɣlol i Yaqub inn-as: «Ǝqqǝl akal ǝn marawan-nak, ɣur aɣaywan n abba-nak, ǝssâna daɣ-ak.»
4 Iɣra-du Yaqub Raxil ǝd Leyya s ǝsuf wa iha ǝnta d aharay-net wa ǝndǝrran. 5 Inn-asnat: «Ǝgrêɣ-in as šimǝtǝkwǝyen n abba-nakmat ǝmmittaynat, mišan ill-ay dǝr-i Ǝmǝli n abba-nin. 6 Tǝssânmat iman-nakmat as wǝr din-ǝglema daɣ tǝɣurad-in wala, y ǝššǝɣǝl n abba-nakmat. 7 Mišan iyyǝwan-i tǝkaddilt, iyyǝwan ǝsǝmmǝttǝy n alxaq-in har marawat taklaten. Eges wǝr t-ikfa Mǝššina turagat n a di-agu tǝkma. 8 Fǝlas inna iwayyan win šaɣarnen a mosnen alxaq-in, tǝzza erawnat-du tǝntawen kul n aharay iwayyan šaɣarnen, dǝffǝr adi inna iwayyan win golǝnditan a mosnen alxaq-in erawnat-du tǝntawen iwayyan ǝgânen igolǝnditan. 9 Daɣ adi Mǝššina iman-net as d-obaz eharay n abba-nakmat ikf-i-tu. 10 Tamert ta n sabdar ǝn tǝmenesen ad ǝnaya daɣ tǝrgǝt isawalan ǝgânen igolǝnditan ǝd wiyyad šaɣarnen ǝd wiyyad farfoznen, as ǝzagan tǝntawen n aharay a. 11 Inn-i angalos ǝn Mǝššina daɣ tǝrgǝt "Yaqub". Ǝnneɣ-as "Un". 12 Inn-i: "Ǝdkǝl asawad-nak, ad taggaɣ isawalan kul win ǝzagnen tǝntawen n aharay ǝgân igolǝnditan, šaɣera madeɣ farfoza. Adi wǝr t-id-eway ar as ǝnayaɣ awa dak-iga Laban. 13 Nak Ǝmǝli wa n Betel s ǝnta a dak-d-inafalalan daɣ Betel, edag wa daɣ tǝnɣala widi fǝl tǝhunt tǝdkalaɣ-i daɣ-as arkawal. Ǝmǝrǝdda, ǝnkǝr, ǝgmǝd akal a, tǝqqǝlaɣ akal ǝn marwan-nak."»
14 Tǝnna Raxil ǝd Leyya i Yaqub: «Wǝrgeɣ tǝdagart a nǝla daɣ tǝkasit n abba-nana. 15 Fǝlas idkâl-ana šilat ǝn tǝmagaren id inazzan a danaɣ-in-iga, itša azrǝf wa din-nǝnza, as nakkanay as immǝkkan a tu-nǝgrǝw. 16 Daɣ adi tǝgǝrgist kul ta d-ibaz Mǝššina daɣ abba-nana šin maddanǝna. Ǝmǝrǝdda agu arat kul wa dak-inna Mǝššina.»
17 Tǝzzar issǝwan Yaqub maddanǝs ǝd tǝdoden-net olaman, iggǝlat. 18 Izzǝrgaz ihǝrwan-net, igla d ǝrrǝzǝɣ kul wa sǝr-ǝs d-iggazan daɣ akal ǝn Mezobotamǝya, ikka šis Isǝhaq ihân akal wa n kanan. 19 As ǝggǝlen, Laban iglâ y ad azzalzu tǝduft fǝl aharay-net, tokar Raxil ǝssǝnǝman-net dǝffǝr-ǝs. 20 Tǝmǝwit ten da as iɣdar Yaqub Laban wa n iyyan daɣ Aramitatan iggǝlat wǝr das-imel. 21 Awa ila Yaqub kul iddǝrrag dǝr-ǝs, iɣras agarew wa n Efrat, innǝmad akal n ǝdɣaɣan win Gilhad.
22 As ǝzǝl wa n karad igraw Laban isalan n ǝdǝrrǝg ǝn Yaqub. 23 Ilkam as ǝnta ǝd meddan ǝn šǝqqaɣan-net, as ǝgan ǝssa adan ewadan-tu daɣ ǝdɣaɣan win Gilhad. 24 As iga ahad inafalal Mǝššina i Laban daɣ tǝrgǝt inn-as: «Ǝnkǝd y ad taga batu waliyyat i Yaqub gǝr za tolaɣ wala tǝbrar.» 25 Ewad Laban Yaqub ikrâs aɣaywan-net daɣ akal n ǝdɣaɣan wa n Gilhad. Izzǝbbat Laban ǝnta d ǝšikǝl-net daɣ ǝdɣaɣan en da.
26 Inna Laban i Yaqub: «Ma tǝge da? Tǝɣdaraɣ-i, tewaya šibararen-in as tanna ǝmosnat šikefǝlen? 27 Mas di-tǝɣdara tǝtadarraga wǝr di-tǝmela? Ǝnnar di-tǝmâla ayyaq-qay tagla-du tǝddǝwe taggan sakkan, tǝwat tende ǝd tǝhǝrdant. 28 Wǝr di-toyyeɣ ǝgeɣ šiwatriwen ǝd hayawan-in, ǝd tǝbararen-in, nǝsǝɣlǝfa dǝr-san. Tǝgeɣ tǝmǝtǝkwǝyt n ǝmmǝskǝl! 29 Ǝleɣ fǝrregat n a dawan-ǝɣšada. Mišan ǝndod iššewal-i Ǝmǝli n abba-nak, inn-i: "Ǝnkǝd y ad tannaɣ arat i Yaqub gǝr za olâɣ wala ibrâr." 30 Ǝgreɣ tara-nak teklay, fǝlas aɣaywan n abba-nak as kay-iha ǝsuf-net, mišan ǝssǝnǝman-in mas daɣ-i tan-tǝtakara?»
31 Inna Yaqub i Laban: «Ǝdǝrrǝg a ǝgeɣ fǝl tǝksǝda n a daɣ-i tabǝzaɣ aššek. 32 Ǝssǝnǝman-nak amaran i ɣur tan-du-tǝgrawa ammatet! Sǝffǝtǝktǝk ilalan-in kul tǝdkǝla daɣ-san awa tǝle dat tǝgǝyyawen n aytedan-nana!» As igannu Yaqub awen wǝr issen as tokâr-tan-du Raxil.
33 Igla Laban isaffataktak ehan wa n Yaqub, d ahan wa n Leyya ǝd wa n tǝwahayen-net a n sanatat, wǝr daɣ-san igrew ǝssǝnǝman-net. Issǝlkam s ahan wa n Raxil. 34,35 Ǝnta Raxil a tǝdkalat ǝssǝnǝman ǝn Laban tǝzzar tǝɣbar-tan daɣ tǝxawit-net, tǝqqim daɣ-as. Adi da fǝl tǝnna y abba-net assaɣa wad iggaz šin ǝsǝffǝtǝktǝk n ahan-net: «Ad wǝr tǝššǝkaɣ abba-nin as dak-wǝr-ǝbdeda fǝlas alɣadat a di-tǝgrawat.» Isaffataktak Laban ehan-net kul mišan wǝr igrew ǝssǝnǝman-net.
36 Iggaz alham Yaqub immǝstan ǝd Laban inna: «Ma imos awa ǝɣšada? Ma imos awa ǝɣšada as dǝffǝr-i tozala, as tanna ǝmosaɣ ǝmǝggi ǝn man? 37 Ǝmǝrǝdda ad tǝsaffataktakaɣ ilalan-in kul ma imos arat wa du-tǝgrawa tǝleq-qu? Sakn-ay y aytedan-in ǝd win-nak ad aggayyen fǝl awa illan gar-ena! 38 Sanatat tǝmǝrwen n awatay a ǝgeɣ ǝlle ɣur-ǝk. Wǝr kala ǝgarnat ayfǝd-nak za wala wǝlli-nak. Wǝr kala ad ǝtšeɣ ijǝɣal n ǝsǝgǝn-nak. 39 Texsay ta ǝtšan wǝxsan wǝr dak-kat-du-tiwǝyaɣ awa daɣ-as d-iqqiman, kalar nak a tat-irazzaman daɣ tǝɣurad-in. Tǝzarzamaɣ-i deɣ ihǝrwan win ǝmmokarnen, gǝr za ehad wala ezal. 40 Tǝkaggay-i tǝfuk s azal, inaqq-i asamed s ahad, faw immokar etǝs-in. 41 Daɣ sanatat tǝmǝrwen n awatay šin ɣur-ǝk ǝge, maraw elan d ǝkkoz n ǝššǝɣǝl ǝqqalan taggalt ǝn tǝbararen-nak sanatat, ǝgeɣ sǝdis elan win hadatnen ǝdânaɣ-ak. Tǝyyǝwanaɣ ǝsǝmmǝttǝy n alxaq-in har marawat taklaten. 42 Kundaba as Ǝmǝli n abba-nin, Ǝmǝli n Ibrahim, s ǝnta Ǝmǝli wa iksud abba-nin Isǝhaq as ǝheɣ taɣlift-net, illikan as ǝmǝrǝdda tǝstâɣaɣ-i ǝqquran fassan-in. Mišan Mǝššina inây arkanay-nin d ǝket n ǝššǝɣǝl issohen wa dak-ǝge, adi da a fǝl dak-irɣam ǝndod daɣ batu-nin.»
43 Inna Laban i Yaqub: «Šibararen a šibararen-in a mosnat, bararan a deɣ bararan-in amosan, eharay a i-nu, awa tǝhannaya da kul i-nu. Mišan, ǝmǝrǝdda, wǝr ǝle batu fǝl tǝbararen-in ǝd bararan-nasnat. 44 Daɣ adi nǝnǝmǝdkǝlet arkawal ǝn tassaq ad iqqǝl tǝgǝyya gǝr-i dǝr-ǝk.»
45 Tǝzzar idkal Yaqub tǝhunt issǝɣt-et ǝs tǝzzǝgrǝt-net ig-et isaktan. 46 Inna Yaqub y aytedan-net: «Amǝdat-du šihun!» Ǝgan-tanat tǝdǝbǝyyǝka, ǝtšan den da. 47 Iga Laban i tǝdǝbǝyyǝka ten daɣ awal-net esǝm Yǝgar-Sahaduta (almaɣna tǝdǝbǝyyǝka ta n tǝgǝyya), Yaqub deɣ ig-as esǝm daɣ awal-net Galed (s ǝnta da almaɣna-net tǝdǝbǝyyǝka ta n tǝgǝyya). 48 Inna Laban i Yaqub: «Tǝdǝbǝyyǝka a ǝn tǝhun a, ǝnta a tǝmosat tǝgǝyya gǝr-i dǝr-ǝk azalada», adi da fǝl tǝga esǝm Galed. 49 Tǝga deɣ esǝm Misfa (almaɣna edag n aggal), fǝlas Laban a innan: «Aglet Amaɣlol ewâl-ana a nǝga daɣ ǝnǝmǝggag. 50 As tǝjajjargana šibararen-in madeɣ tǝzlafa šiyyad šidoden šiyyad, taktaɣ âs Mǝššina a iggǝyyen arkawal wa nǝnamadkal, wǝrgeɣ awedan!»