30
1 As tǝnay Raxil arat wa, ǝggaznat-tat tǝsmiten ǝn tǝmǝqqart-net, tǝnna i Yaqub: «Akf-i bararan madeɣ ib-i.» 2 Iggaz-tu alham-net inn-as: «Nak wǝrgeɣ Mǝššina a mosa? Ǝnta a dam-igdalan tǝla ǝn bararan.» 3 Tǝnn-as: «Ǝkfeq-qay taklit-in Bilxa, tǝggǝza fall-as, tile dǝr-ǝs bararan, a tan-ǝssǝdwǝla, agaq-qan bararan-in, ileɣ bararan nak da.» 4 Iqbal Yaqub awa das-tǝnna Raxil. Tǝkf-ay Bilxa, isawwahay-tat, iggaz fall-as. 5 Tǝga Bilxa tadist tǝla barar ǝd Yaqub. 6 Tǝzzar tǝnna Raxil: «Mǝššina izazzalalaɣ-i ǝššǝriɣa, iqbal tǝwatray-nin, ikf-i barar». Adi da fǝl das-tǝga esǝm Dan. 7 Tǝlas Bilxa igi ǝn tǝdist tǝla barar wa n ǝššin ǝd Yaqub. 8 Tǝnna Raxil: «Ǝgeɣ ǝmǝgǝr issohen ǝd tǝmǝqqart-in, orne-du.» Tǝga i barar wen esǝm Naftali.
9 As din-tǝgra Leyya as ǝnta tǝmmǝzzay d ara tǝkfa Yaqub taklit-net Zilfa a tat-isǝwwǝhǝy. 10 Tǝzzar tǝla Zilfa, barar ǝd Yaqub. 11 Tǝnna Leyya amaran: «Annasara-nin osa-du!» Adi a fǝl das-tǝga esǝm Gad. 12 Dǝffǝr awen tǝla Zilfa, barar wa n ǝššin ǝd Yaqub. 13 Tǝnna Leyya: «Iket tǝdǝwit ǝgeq-qat! Tǝdǝwit-in a tat-ǝmǝlnat tǝdoden.» Tǝzzar tǝg-as esǝm Aššer.
14 Ǝzǝl iyyan ewây Ruben d ǝsuf, daɣ azzaman n ǝmilǝy n alkama har inay aratan n annabat wa išatan aššahwat immigal y ǝggǝgru. Eway-tan-du y anna-net Leyya. Tǝzzar tǝnna Raxil i Leyya: «Are daɣ-am a di-du-takfa daɣ-san» 15 Tǝnn-as Leyya: «Awak wǝr dam-igda as daɣ-i tobazaɣ alǝs-in? Ǝmǝrǝdda tareɣ ad tǝssǝrtǝyaɣ awen d aratan n annabat win d-omad barar-in da?» Tǝnn-as Raxil: «Ǝnǝy! Sǝmmǝskǝl-ana. A dam-ayya Yaqub a ɣur-ǝm ansu ahada, takfaɣ-i aratan n annabat wa d-omad barar-nam.»
16 As d-edwa Yaqub almǝz ifâl-du tǝmǝdint tǝssǝlkad-as Leyya, tǝnn-as: «Nak a ɣur tǝnassaɣ ahada. Etǝs-nak ǝzzinzaq-qu aratan n annabat a d-omad barar-in.» Tǝzzar insa ɣur-ǝs ahad wen. 17 Iga Mǝššina i Leyya tara-net. Tǝga tadist, tǝla ǝd Yaqub barar wa n sǝmmos. 18 Tǝlas tǝnna: «Mǝššina irzâm-i tehakkay ta ǝgeɣ taklit-in, y alǝs-in.» Tǝga i barar wa ihǝwan den esǝm Issakar. 19 Tǝlas igi ǝn tǝdist, tǝla ǝd Yaqub barar wa n sǝdis. 20 Amaran tǝnna: «Mǝššina ikf-i tǝhǝkkut tǝhossayat. Ǝmǝrǝdda a di-issǝɣmǝr alǝs-in almaqam id sǝdis bararan ǝn yayyan a t-ǝkfeɣ. Adi da fǝl tǝga i barar en esǝm Zǝbulun.» 21 Dǝffǝr awen tǝgraw tabarart, tǝg-as esǝm Dina.
22 Mǝššina ikittǝw Raxil. Iqbal tǝwatray-net, ikf-et as tǝggaz šin tǝla ǝn bararan. 23 Tǝga tadist tǝgraw barar tǝnna: «Mǝššina ikkas-i daɣ takarakit.» 24 Awen da a fǝl tǝga i barar wen esǝm Yusǝf fǝlas tǝnna: «Ya Amaɣlol tǝššotaɣ-i iyyan barar!»
Tǝgǝrgist ǝn Yaqub daw Laban
25 Ihǝw Yusǝf ɣas, inna Yaqub i Laban: «Sallam-i ad akkaɣ aytedan-in daɣ akal-nana. 26 Ayy-i ad idawaɣ ǝd tǝdoden-in, ǝd bararan-in s ǝddǝlil-nasan a fǝl dak-ǝšɣala, ad agla, tǝssâna kay iman-nak as ǝgêɣ-ak ǝššǝɣǝl olaɣan.»
27 Inn-as Laban: «Are daɣ-ak a di-tǝttǝfaɣ udǝm n ad tagla tǝlle ɣur-i dada. Ǝnaya daɣ gazan-in as ǝddǝlil-nak a fǝl di-iga Amaɣlol albaraka. 28 Ǝmǝl-i alxaq-nak, a dak-k-ǝrzǝma.» 29 Inn-as Yaqub: «Kay iman-nak tǝssânaɣ awa dǝr ola ǝššǝɣǝl wa dak-ǝge, d awa dǝr togda tǝttǝyt n aharay-nak daɣ ǝfus-in. 30 Amaran tǝssânaɣ as dat assa-nin tǝla nak wǝr tǝggǝt. Mišan ǝmǝrǝdda tǝga tǝttǝyt tagget. A kay d-oseɣ itagg-ak amaɣlol albaraka. Ǝmǝrǝdda ewad-du alwaq wa n ad ǝšɣǝlaɣ ǝgmǝya tǝnfa ǝn man-in nak da.» 31 Inn-as Laban: «Ma kay-z-akfa?» Inn-as Yaqub: «Wǝrgeɣ ǝrruzmatan a di-za-taga. Ǝqbǝl ǝššǝrǝd wa dak-z-aga da ad aglaɣ ogâzaɣ eharay-nak. 32 A di-tayya, ǝrzǝgaɣ eharay-nak azalada, ǝskǝta d-ijamaran kul win šaɣarnen ǝd win bardaɣnen madeɣ win kawalnen, ǝd sagayan kul win šaɣarnen ǝd win bardaɣnen, ǝqqǝlan alxaq-in. 33 Dǝffǝr awa as tǝssǝɣradaɣ alxaq-in ad tǝssǝnaɣ as nak alɣadil a mosa: as tǝgrawa daɣ aharay-nin asagay wǝr nǝšaɣar madeɣ wǝr nǝbardaɣ, madeɣ ǝjemar wǝr nǝkawal, tǝssǝnaɣ as šikra a tan-d-ǝge.» 34 Inn-as Laban: «Ǝnta ǝddi da! Ǝrdeɣ s awa tǝnne.»
35 Mišan ǝzǝl wen da ad iskat Laban daɣ aharay-net izulaɣ kul win golǝnditan ǝd win bardaɣnen, ǝd wǝlli kul šin šaɣarnen ǝd šin bardaɣnen, almaɣna texsay kul ta ǝhanat tǝmǝllawen daɣ aharay-net. Iskat deɣ daɣ ayfǝd kul šin kawalnen. Iga eharay wa daɣ fassan ǝn maddanǝs. 36 Isaggalat-tan s adag as ǝllân karad adan ǝn teklay gar-es ǝd Yaqub. Innǝttaf Yaqub d awa d iqqiman daɣ aharay ǝn Laban.
37 Iɣtas-du Yaqub ilǝgwan ǝbdagnen daɣ karad ǝzzǝnǝfan n eškan ǝmosnen libne, ǝd Luz d ermon. Tǝzzar ig-asan izalwakan mallolnen s ǝzǝnzǝf. 38 Issǝns-en daɣ ǝɣlalan win daɣ issasu aharay-net. Id d-ikka aharay edag ǝn tassay, ǝssibdarnat tǝntawen-net, 39 har ǝzzagnat dat lǝgwan win issǝnsa Yaqub da, a du-tarawnat iwayyan ǝgânen igolǝnditan, ǝd wiyyad šaɣarnen ǝd wiyyad bardaɣnen. 40 Tǝzzar izammazzay Yaqub iwayyan win-net ǝd win Laban. As ǝdwalan wayyan win ad zazag Yaqub tǝntawen n ǝsǝgǝn wa n Laban dat šin-net kawalnen ǝd šin mallolnen n ǝlkǝzan. Inkar Yaqub ǝs maddanǝs ǝn tazzog ta, iskat-tan iga sǝr-san ǝsǝgǝn ǝn man-net. 41 Id ǝssǝbdarnat taɣsiwen šin hossaynen ad assansu daɣ ǝɣlalan win daɣ sassinat ilǝgwan win zalwakan mallolnen fǝl ad ǝzǝgnat hannaynat-tan. 42 Mišan wǝr tan-isǝnsu dat šin ǝnšašnen. Tǝmǝwit ten da as iqqal aharay kul wa inšašan in Laban, wa ihossayan amaran il-ay Yaqub.
43 Tǝzzar iga Yaqub tǝgǝrgist tagget. Ila isǝgan zawwarnen n aharay wa ǝndarran, ǝd mǝnas d ǝzdan, ila eklan ǝd taklaten.