29
Assa ǝn Yaqub Laban
1 Ilas Yaqub abbaz ǝn tarrayt iddǝnnag. 2 Iššokal Yaqub den da as inay daɣ ǝsuf anu tǝhâr tǝhunt zǝwwǝrat. Anu en igân ɣur-ǝs aharay wa ǝndǝrran imosan karad sǝgan as faw da den daɣ ad sassin. 3 As d-ǝddewan sǝgan kul ad ǝbdǝɣan madanan ta tǝhharat imi n anu, as ǝššǝšwan ǝssuɣǝlan-tat edag-net.
4 As din-ewad Yaqub anu issǝstan imadanan inn-asan: «Ma imos aɣaywan-nawan, išǝqqaɣan-in?» Ǝnnan-as «Nakkanay in ǝɣrǝm ǝn Xaran». 5 Inn-asan harwa: «Awak tǝzdayam Laban wa n ahaya ǝn Naxor?» Ǝnnan-as: «Awalla, nǝzdây-tu». 6 Inn-asan Yaqub: «Ma ixlak?» Ǝnnan-as: «Alxer ɣas, amaran ǝnak elles ta tǝgat Raxil a du-tǝzayat den tǝlkâm y aharay-nasan.» 7 Inn-asan: «Mas tǝqqalam za da? Ǝzǝl i zagren, wǝr iga alwaq n ǝsǝgǝn n aharay, šašwat-tu takkim dǝr-ǝs edag ǝn tǝmǝdint.» 8 Ǝnnan-as madanan: «Wǝr za nassantu ǝšǝšwi iket wǝr d-osen sǝgan kul, ǝddi ad za nǝbdǝɣ tǝhunt ta tǝharat imi n anu naššašǝw eharay.» 9 Iššewal-asan den da as du-tewad Raxil, tǝlkâm y aharay n abba-net, id ǝnta a tǝmosat tamadant-net. 10 Ogga Yaqub Raxil ɣas ta n elles n aŋŋatmas Laban tǝlkâm y aharay-net, ikka anu ibdaɣ tǝhunt ta tǝharat imi-net, iššǝšwa eharay n aŋŋatmas. 11 Dǝffǝr adi izalammat Raxil. Awa iga daɣ tǝdǝwit, iggaz šin tala. 12 Inna Yaqub i Raxil: «Nak tegazay n abba-nam, id rures ǝn Raqqiyetu a mosa.» Tǝzzar tǝga isalan y abba-net. 13 Da da ɣas ad isla Laban Yaqub, ǝnta ad ozal, issǝlkad-as, izalammat-tu. Iddew dǝr-ǝs s n ahan-net. Tǝzzar iga daɣ-as Yaqub isalan-net. 14a Inn-as Laban: «Illikan as kay azni-nin a tǝmosa.»
14b Imal ɣur-ǝs Yaqub har iga tallit. 15 Dǝffǝr awen inn-as Laban: «Nak za wǝr kay z'ǝššǝšɣǝla bannan kuddeɣ as tegazay-nin a tǝmosa. Daɣ adi ǝmǝl-i awa fǝl di-za-tǝšɣǝla.» 16 Ǝnta Laban ila šibararen sanatat, ta waššarat esǝm-net Leyya, ta ǝndǝrrat Raxil. 17 Leyya za hossaynat šittawen-net, amaran Raxil azzat-net d udǝm-net a hossaynen. 18 Yaqub Raxil a ira. Inna i Laban: «A dak-agaɣ ǝššǝɣǝl n ǝssa elan iqqǝl taggalt ǝn tabarart-nak ta ǝndǝrrat Raxil.» 19 Inn-as Laban: «Ǝssofaɣ ǝkfeɣ-ak-kat y a tat-akfaɣ y alǝs iyyan a du-wǝr-nǝgmed aɣaywan-nana. Ǝmǝl ɣur-i dada.» 20 Adi a fǝl iga Yaqub ǝššǝɣǝl n ǝssa elan fǝl ad igrǝw Raxil mišan awa das-iga daɣ tara ǝqqalan sǝr-ǝs elan en arat n adan.
21 Tǝzzar inna Yaqub i Laban: «Tǝmastant za tǝnda. Ǝmǝrǝdda akf-i tantut tas ǝrzama taggalt-net.» 22 Den daɣ a d-iššedaw Laban aytedan kul win ǝɣrǝm wen, ig-as takrǝst zǝwwǝrat. 23 Mišan as iga ahad issok-ay Leyya. 24 Iššedaw-tat ǝd tǝklit-net Zilfa fǝl a das-tǝšɣǝl. Iggaz Yaqub fǝl Leyya. 25 As affaw aɣora inay Yaqub as Leyya a t-id-itawakfan. Tǝzzar inna i Laban: «Ma imos awa di-tǝge da? Wǝrgeɣ ǝddǝlil ǝn Raxil a fǝl dak-ǝšɣala? Mas di-tǝtakarrasa?» 26 Inn-as Laban: «Adi wǝr itǝwǝggu daɣ-na. Tǝmadrayt wǝr tǝtizar i tǝmǝqqart azalaf. 27 Ǝɣrǝd tǝzzar ǝssa adan win tǝkrǝst ta n Leyya, ǝddi a kay-za-nakfu Raxil ǝntada tǝzlǝfaq-qat. Mišan a di-tagaɣ ǝssa elan wiyyad n ǝššǝɣǝl.»
28 Iga Yaqub awen da. As ǝɣradan ǝssa adan win tǝkrǝst ta n Leyya, ikf-ay Laban Raxil, izlaf-tat. 29 Raxil ǝnta iššedaw-tat abba-net ǝd tǝklit-net tǝgât esǝm Bilxa fǝl a das-tǝšɣǝl. 30 Iggaz Yaqub fǝl Raxil, ir-et, issof ǝnta Leyya. Išɣal i Laban har iga ǝssa elan.
Bararan ǝn Yaqub.
31 Inay Amaɣlol as Leyya wǝr tǝtawara ikf-et bararan, amaran Raxil ǝnta tǝggǝgra. 32 Tǝga Leyya tadist, tǝgraw barar, tag-as esǝm Ruben. Fǝlas, tǝnna: «Amaɣlol ogga arkanay-nin amaran ǝmǝrǝdda alǝs-in a di-iru.»
33 Tǝlas igi ǝn tǝdist, tǝgraw barar tǝg-as esǝm Šimǝɣon, fǝlas tǝnna: «Amaɣlol ihannay as wǝr ǝtawara, adi da fǝl di-ilas tehakkay ǝn barar.»
34 Tǝlas igi ǝn tǝdist, tǝgraw barar. Tǝnna: «Ǝmǝrǝdda alǝs-in a daɣ-i aknu ǝzǝzzǝwi, id karad bararan a dǝr-i ila.» Awen da fǝl tǝga i barar wen esǝm Lebi. 35 Tǝlas harwa igi ǝn tǝdist, tǝgraw barar, tǝnna: «Ǝmǝrǝdda ad agaɣ tǝmmalen y Amaɣlol.» Adi da fǝl das-tǝga esǝm Yahuda. Barar wa da a ɣur tǝmmǝzzay d ara.