28
1 Iɣra Isǝhaq Yaqub ittar-as a t-ikfan albaraka, amaran omar-tu inn-as: «Ad wǝr tǝzlǝfa tantut n akal ǝn Kanan. 2 Kalar abǝz tarrayt, takkaɣ aɣaywan n abba n anna-nak Bǝtuhel daɣ Mezobotamǝya, tǝzlǝfaɣ iyyat daɣ tǝbararen n aŋŋatmak Laban. 3 Mǝššina di Maqqaran a tǝkfeq-qay albaraka, akf-ik bararan, issǝgǝt ǝzzurrǝyya-nak, ag-ik ǝmaraw ǝn giman ǝn tǝmattiwen. 4 Mǝššina tǝkfeq-qay kay d ǝzzurrǝyya-nak albaraka, wa ikfa Ibrahim, tǝqqǝla mǝššis n akal wa daɣ tǝmosaɣ da amagar s ǝnta a ikfa Mǝššina Ibrahim.»
5 As dǝr-ǝs iɣrad Isǝhaq, issǝllam-tu, imatakway Yaqub ikka Laban wa n ag Bǝtuhel imosan iyyan daɣ Aramitatan ihân akal ǝn Mezobotamǝya. Laban en ǝmaqqar ǝn Raqqiyetu a imos s ǝnta a terawat Yaqub d Ezaw.
6 Issan Ezaw as Isǝhaq ittar i Yaqub a t-ikfan albaraka issok-ay Mezobotamǝya y a daɣ-as izlǝf, d âs ɣur tǝwatray ten omar-tu s ad wǝr izlef iyyat daɣ tǝdoden n akal wa n Kanan. 7 Issan deɣ as Yaqub ikkiwan y abba-net d anna-net, ikka Mezobotamǝya. 8 Den daɣ ad igra Ezaw as šidoden ǝn Kanan wǝr tanat-ira abba-net. 9 Tǝzzar ikka Ezaw Ismaɣil ag Ibrahim, izlaf elles Maxalat, tamadrayt ǝn Nǝbayot, issǝrtay-tat ǝd tǝdoden šin ila kala da.
10 Igmad Yaqub Ber-Šeba ikka Xaran. 11 As tu-tuda tǝfuk daɣ adag iyyan, idkal-du tǝhunt issomat-tat y ad ansu den da. 12 Insa deɣ da as orga, inay daɣ targǝt-net šisǝffǝttan ǝɣtânen daɣ amadal har jǝnnawan, d angalosan a tanat-fattannen tazabben-tanat-du. 13 Illa Amaɣlol ɣur tǝzǝrǝst-nasnat s afalla. Inna: «Nak Amaɣlol, Ǝmǝli n Ibrahim wa kay-isahhayawan, d abba-nak Isǝhaq. Amadal wa daɣ tǝnseɣ ǝddi ǝkfeɣ-ak-ku, kay d ǝzzurrǝyya-nak. 14 Ǝzzurrǝyya-nak ad iqqǝl arat aggen har agdu ǝd tǝblalen n amadal, ilal akal-net daɣ tǝsǝdag kul, gǝr dǝnnǝg d ataram ǝd tamasna d agala. Aytedan n ǝddǝnet kul ad ǝgrǝwan albaraka s ǝssǝbab-nak d ǝssǝbab n ǝzzurrǝyya-nak. 15 Ǝnǝy, ǝssana daɣ-ak. Edag tǝkkeɣ ogazaq-qay, a kay-d-ǝssuɣǝla deɣ amadal wa. A daɣ-ak ǝssǝna, assandaɣ arkawal wa dak-ǝdkala da.» 16 Inkar-du Yaqub, inna: «Zaɣnin Amaɣlol illa da, amaran nak wǝr ǝssena!» 17 Tǝggaz-tu tasa inna: «Edag wa i sǝksǝdan! Wǝr t-illa a iqqal ar ehan ǝn Mǝššina, ǝnta a imosan imi ǝn jǝnnawan.»
18 As affaw iga-du Yaqub tanakra tǝnzâyat idkal-du tǝhunt ta issomat, issǝɣt-et sas tǝzzǝgrǝt-net inɣal widi fǝl afalla-net ig-et isaktan n awa igan den. 19 Iga y adag en esǝm Betel (almaɣna ehan ǝn Mǝššina) s ǝstizarat esǝm-net Luz. 20 Tǝzzar idkal Yaqub arkawal inna: «As daɣ-i issân Mǝššina, ogâz-i daɣ ǝšikǝl a ǝge da, ikf-i a ǝtše d a ǝlse, 21 issoɣal-i deɣ aɣaywan n abba-nin alxer wǝdi ad iqqǝl Amaɣlol Ǝmǝli-nin. 22 Tǝhunt ta ǝssǝɣta da ǝs tǝzzǝgrǝt-net tǝmos isaktan, edag wa tǝha da ad iqqǝl edag n ǝlɣibada ǝn Mǝššina. Amaran arat kul wa di-ikfa Mǝššina, ad t-akfa tǝzunt-net ta n marawat.»