27
1 As waššar Isǝhaq igmad-tu asawad-net. Ǝzǝl iyyan iɣra aɣafadday-net Ezaw, inn-as: «Barar-in», ikkǝwan-as, inn-as: «Nak da». 2 Inn-as Isǝhaq: «Nak ǝmǝrǝdda waššara, wǝr ǝssena da daɣ-i tǝlla tamattant. 3 Daɣ adi ǝmǝrǝdda ǝgmâya daɣ-ak ad tǝdkǝla tǝganzay nak ǝd marran-net tǝggǝzaɣ ǝsuf tanɣaɣ-i-du isan ǝn tawaqqast. 4 Tassaŋŋaɣ-i amensay izodan s ǝmmǝk was tareɣ amaran tawǝyaɣ-i-t-id ad t-atša fǝl a dak-ǝttǝraɣ a kay-ikfan albaraka harwa ǝddara.»
5 Wa iššewal Isǝhaq y Ezaw den tǝssisam-asan Raqqiyetu. Igla Ezaw, igmar. 6 Tǝnna Raqqiyetu i Yaqub: «Ǝmǝrǝdda ad ǝsleɣ y abba nak iššewal y ǝmaqqar nak Ezaw, inn-as: 7 "Awǝy-i-du isan ǝn tawaqqast tagaɣ-i amensay izodan a z'atša a a dak-ǝttǝraɣ a dak-ǝttǝraɣ s Amaɣlol a kay-ikfan albaraka harwa ǝddara." 8 Daɣ adi barar-in ǝmǝrǝdda sǝsǝm-i tagaɣ arat iman-net wa dak-z-anna. 9 Aglu barar-in takkaɣ eharay wa ǝndǝrran tabǝza-du daɣ-as ǝššin sagayan a daɣ-san aknaɣ amensay izodan y abba-nak s ǝmmǝk was t-ira. 10 Amaran tawǝyaɣ-as-tu a t-atšu fǝl a dak-ittǝr s Amaɣlol a kay-ikfan albaraka harwa ad iddâr.»
11 Mišan inna Yaqub y anna-net Raqqiyetu: «Ǝmaqqar-in ya ijibandal s anzadan, nak amaran kǝrkǝra. 12 As di-idas abba-nin, issan as bahu a das-ǝge, adi abǝz daɣ tǝkaddilt issǝwǝr-i allaɣanat edag n a di-ittǝr a di-ikfan albaraka».
13 Tǝnn-as mas «Tǝwǝret-i allaɣanat-nak. Kay sǝsǝm tagla tagaɣ awa dak-ǝnne.» 14 Igla obaz-du ǝššin sagayan, ilway-tan-du y anna-net tǝkna daɣ-san amensay wa izodan s ǝmmǝk was t-ira abba-net. 15 Dǝffǝr adi tǝdkal-du Raqqiyetu isǝlsa n Ezaw win ǝhossaynen as kala da ǝhân ehan-net tǝssǝls-en i Yaqub. 16 Tǝssǝlsa tawšeten-net d iri-net agašek ǝn sagayan, 17 amaran tǝkf-ay amensay wa izodan ǝd tǝgǝlla win du-tǝkna den.
18 Eway-tan y abba-net, as t-in-osa inn-as: «Abba-nin». Inn-as Isǝhaq: «Un, Barar-in. Ma tǝmosa? Awak Ezaw meɣ Yaqub?» 19 Inn-as Yaqub: «nak Ezaw, aɣafadday-nak. Ǝgeɣ awas di-tǝnneɣ. Qamu, tatšaɣ awa d-ǝgrawa daɣ tǝgmǝrt-in tǝttǝraɣ-i a di-ikfan albaraka.» 20 Inn-as Isǝhaq: «Barar-in, ma tǝgeɣ as du-tǝgrawaɣ awaqqas s ǝtrub ogdan d awa?» Inn-as: «Amaɣlol Ǝmǝli-nak a t-id-ewayan sǝr-i.» 21 Inna Isǝhaq i Yaqub: «Ihaz-i-du barar-in a kay-ǝdǝsa ad ǝssǝna kud tidǝt daɣ as kay Ezaw wala.» 22 Ihoz-t-idu, idaz-tu Isǝhaq, inna: «Ǝmǝsli za in Yaqub mišan ifassan in Ezaw». 23 Igmad-as Yaqub tazdǝyt fǝlas ifassan-net ǝlsanen anzadan šilat ǝn win ǝlsanen Ezaw. Innǝyat Isǝhaq a das-ittǝr a t-ikfan albaraka. 24 Mišan ilas-tu ǝsǝstan inn-as: «Tidǝt daɣ as kay Ezaw?» Inn-as Yaqub: «Awalla» 25 Inn-as amaran: «Ǝnden awa du-tǝnɣe daɣ tǝgmǝrt ad t-atša a dak-ǝttǝraɣ a kay-ikfan albaraka.» Ikf-ay-du Yaqub amensay, itš-ay, ikf-ay-du deɣ esmad n alɣanab išwa daɣ-as.
26 Dǝffǝr adi inn-as Isǝhaq: «Ihaz-i-du, tǝzǝlǝmmeɣ i barar-in.» 27 Ihoz-t-id izalammat-tu iwat Isǝhaq aḍu ǝn sǝlsa win izlag, ittar-as a t-ikfan albaraka inna:
«Hay aḍu ǝn barar-in ola d aḍu ǝn sǝgyakan
win daɣ igar Amaɣlol albarakatan
28 Akfet-kay Mǝššina ikonakan
aget imǝdlan-nak kul idǝɣran
akf-ik tilwat s alkamatan
d esmad n alɣanab tileq-qu wa aynayan
29 Šimattiwen kul a dak-ikkǝwanan
Iɣǝrfan deɣ a dak-ǝssǝjǝdan
Imǝdrayan-nak a daw-ǝk ǝrǝsan
Aytmak kul a dak-ǝzzǝnǝzan
Ilɣan Ǝmǝli i kay-ilɣânan
Itǝwǝbǝrrǝk i kay-ibarrakan.»
30 Dada ɣas ad iɣrad Isǝhaq šiwatriwen a ikfan Yaqub albaraka, iqqab Yaqub, ǝnta a d-osa ǝmaqqar-net Ezaw ifâl-du tagmǝrt. 31 Ikna-du ǝntada amensay izodan eway-tu y abba-net inn-as: «Qam abba-nin tatša awa d-igmadan tagmǝrt-in, tǝttǝraɣ-i a di-ikfan albaraka». 32 Inn-as šis Isǝhaq: «Ma tǝmosa barar-in?» Inn-as: «Nak Ezaw, aɣafadday-nak.» 33 Irmaɣ Isǝhaq har iqqim issiwal ǝs taysǝst, inna: «Daɣ adi ma imos wa d-inɣan awaqqas eway-i-t-id ǝtšeq-qu dat assa-nak, ǝttaraɣ-as a t-ikfan albaraka albaraka, igraw-tu.» 34 As isla Ezaw y awa inna abba-net igmad-tu ǝmǝsli labasan ǝn tǝrǝmmeq zǝwwǝrat, ad itansay abba-net igann-as: «Abba-nin, ǝttǝr-i a di-ikfan albaraka-nak da, abba-nin.» 35 Mišan inn-as Isǝhaq: «Amadray-nak a di-ikkǝrrasan irkab tǝwatray-nak, igraw albaraka was ihor a tu-tǝgrǝwa.» 36 Inn-as Ezaw: «Wǝrgeɣ bannan iga esǝm Yaqub. Sanatat tǝkkǝrrǝs adi iga: ta tazzarat as daɣ-i irkab almaqam-in wa n tišit n aɣafadday, ta n sanatat as daɣ-i irkab albaraka was ihor as nak a tu-z-igrǝwan.» Ilas Ezaw tǝnna i šis: «Awak wǝr tu-tǝlla tǝwatray iyyat a di-za-tagaɣ a di-ikfan albaraka?» 37 Inna Isǝhaq y Ezaw: «Ǝmǝrǝdda Yaqub ǝgeq-qu mǝššik, ǝgeɣ daw-ǝs deɣ išǝqqaɣan-net kul, ǝššilwaq-qu s alkama d esmad n alɣanab wa aynayan. Daɣ adi mas ǝfragaɣ a dak-t-aga barar-in?» 38 Inn-as Ezaw: «Wǝr tǝleɣ abba-nin ar tǝwatray iyyadda n albaraka? Abba-nin ǝttǝr-i nak da a di-ikfan albaraka.» Iggaz Ezaw šin tala. 39 Tǝzzar inn-as abba-net Isǝhaq:
«Ǝnǝy, kay tǝmǝɣsurt-nak akal ǝn manna,
Ǝššǝɣǝl n amadray-nak kul a tu-takna
Har taffallaga y a tu-tarna
Tasaddarfaɣ iman-nak tǝla a tat-tarza.»
Ǝtǝggǝr ǝn Yaqub ǝd targǝt-net daɣ Betel
41 Igzar Ezaw Yaqub fǝl ǝddǝlil ǝn tǝwatray ta das-iga abba-net a t-ikfan albaraka. Inna daɣ man-net: «Abba-nana wǝr tu-tǝggug tǝmattant, amaran as t-aba ad agaɣ iman n amadray-nin Yaqub.» 42 Ittǝmal i Raqqiyetu awa isamarkas aɣafadday-net ezaw. Tǝsassaɣra-du Yaqub, tǝnn-as: «Ǝmaqqar-nak Ezaw ira a daɣ-ak izzǝzǝl, s ad agu iman-nak. 43 Sǝsǝm-i barar-in: Ǝnkǝr ǝmǝrǝdda taddarraga s ǝmaqqar-in Laban ihân akal ǝn Xaran, 44 taqqama ɣur-ǝs har tismad taɣašašit n ǝmaqqar-nak. 45 As t-igmad alham-nak, ittǝw-in awa das-tǝɣšada, a din-assaglaɣ awedan a dǝr-ǝk d-iddewan. Kala kala wǝr ǝfregaɣ a kay-anɣu Ezaw ǝnta deɣ itǝwǝnɣu, tǝgmǝdam-i ketnawan daɣ ǝzǝl iyyanda.»
46 Aššet Xitatan šin tǝdulen-in da, ǝkkâsnat-i tenbay n ǝddǝnet. Ma ǝkkeɣ i tǝmǝddurt as izlaf Yaqub da iyyat daɣ-asnat, daɣ akal a.