26
Iguz n Isǝhaq Gǝrar
1 Ilas laz igi daɣ akal šilat ǝn wa nad igan daɣ azzaman n Ibrahim. Inkar Isǝhaq iggǝlat s ǝɣrǝm ǝn Gǝrar s ǝnta a daɣ iɣsar Abumalǝk wa n ǝmǝnokal ǝn Filistinatan. 2 Dǝffǝr adi inafalal Amaɣlol, inn-as: «Ad wǝr tǝrǝsa Masar. Agu awa dak-ǝnne, 3 taqqama daɣ akal wa da. A daɣ-ak ǝssǝna zǝzzǝbbe-du fall-ak albaraka fǝlas kay d ǝzzurrǝyya-nak a z'akfaɣ ikallan win, s ǝmmǝk iman-net was ǝhada fǝl adi y abba-nak Ibrahim. 4 Ad ǝssǝgǝtaɣ ǝzzurrǝyya-nak šilat n etran, akfaq-qu imǝdlan a kul. Šimattiwen n ǝddǝnet kul ad ǝgrǝwnat albaraka s ǝssǝbab n ǝzzurrǝyya-nak. 5 Arat wǝdi ad t-aga fǝlas ǝbǝrdǝg a di-iga Ibrahim, ilkâm y arat kul was t-omara, d awa ǝnne kul, d arat kul wa t-ǝssosana.»
6 Tǝzzar iɣsar Isǝhaq daɣ Gǝrar. 7 As t-ǝggazan meddan n akal en šin ǝssǝstan ǝd tǝntut-net Raqqiyetu inn-asan: «Tamadrayt in a tǝmos». Iksud âs as dasan-inna tantut-net a tǝmos ad t-anɣin fǝl ǝddǝlil-net, ǝnta tǝkna šihussay. 8 As iga Isǝhaq tamert tagget daɣ Gǝrar, iswad-in ǝmǝnokal ǝn Filistinatan ǝs fǝnetǝr ǝzǝl iyyan ogga Isǝhaq itaggu šeɣat ǝd Raqqiyetu. 9 Isassaɣr-ay-du Abumalǝk inn-as: «Zaɣnin tantut-nak awa! Mas tennê tamadrayt-nak a tǝmos?» Inn-as Isǝhaq: «Tǝksǝda a ǝgeɣ ad tǝwǝnɣa fǝl ǝddǝlil-net». 10 Inn-as Abumalǝk: «Ma dana-tǝgeɣ da? Azzama iggaz iyyan daɣ meddan-nana fǝl tǝntut-nak, tǝzzar tawǝya-du sǝr-na a danaɣ-iwǝr abakkad». 11 Omar Abumalǝk tamattay kul inna: «Awedan wa idasan alǝs a ǝnta wala tǝntut-net wǝdi a das-tǝtǝwǝxkǝm tamattant».
12 Igyak Isǝhaq daɣ akal wa tǝzzar olay-du awatay wǝdi temeday n ǝnǝtfus n awa igyak fǝlas Amaɣlol a daɣ-as igan albaraka. 13 Ad tǝtittǝy tǝkarzay n Isǝhaq har ikna tǝgǝrgist wǝllen. 14 Ila eharay wa ǝndarran ǝd wa zǝwwǝran d eklan aggotnen. Eway-du awen as t-ǝmmǝzzaɣan Filistinatan. 15 Ǝnbalan enwan kul win ǝɣazan eklan n Ibrahim, daɣ azzaman-net, sallamamasan fall-asan amadal. 16 Tǝzzar inna Abumalǝk y Isǝhaq: «Ǝnkǝr tugagaɣ-ana, fǝlas kay tǝqqalaɣ alǝs a danaɣ-ogaran assahat». 17 Iggǝlat Isǝhaq izzǝbbat daɣ ǝɣlal wa n Gǝrar iɣsar daɣ-as.
18 Ijajjarakkat Isǝhaq enwan win i iɣaz šis Ibrahim ǝnbalan-tan Filistinatan dǝffǝr iba-net, ig-asan ismawan win da dasan-iga abba-net. 19 Jarakken eklan n Isǝhaq anu daɣ ǝɣlal, ǝgrawan daɣ-as šat n aman tolâɣat. 20 Tǝnkar tamazaq gǝr madanan win Isǝhaq ǝd win Gǝrar. Ad gannin win Gǝrar: «Anu-nanaɣ awa» Adi da fǝl iga Isǝhaq y anu en esǝm Eseq (tamazaq) fǝlas tamazaq a fall-as ǝgan. 21 Jarakken eklan-net anu iyyan as ǝnta da tǝga fall-as tamazaq tǝzzar ig-as Isǝhaq esǝm Sitna (gezzar). 22 Iggǝlat Isǝhaq daɣ adag wen, izzǝbbat iyyan edag iɣaz daɣ-as anu wa fǝl wǝr za tagu tamazaq ig-as esǝm Rǝxobot (almaɣna tǝnaflǝyt) fǝlas inna: «Amaɣlol ǝmǝrǝdda isannaflay-ana ikf-ana tǝkarzay daɣ akal a.»
Iguz n Isǝhaq Ber-Šeba ǝd tassaq-net d Abumalǝk
23 Ilas Isǝhaq tǝzrek ǝs Ber-Šeba. 24 Ahad wen da a das-d-inafalal Amaɣlol inn-as: «Nak Ǝmǝli n abba-nak Ibrahim. A kay-wǝr-tǝggǝz tasa fǝlas ǝssâna daɣ-ak. A daɣ-ak agaɣ albaraka, ǝssǝgǝtaɣ ǝzzurrǝyya-nak fǝlas ǝgêɣ arkawal n adi y ǝkli-nin Ibrahim». 25 Ikras Isǝhaq daɣ adag wen da edag ǝn tǝkutawen iɣbad Amaɣlol. Ikras aɣaywan-net den da, ǝɣazan eklan-net anu.
26 Ǝzǝl iyyan ifăl-du Abumalǝk Gǝrar iggǝdaz-du Isǝhaq iddêw d ǝmǝššewwǝr-net Axuzut, d ǝmuzar ǝn nammagaran-net Fikol. 27 Inn-asan Isǝhaq: «Ma sǝr-i du-tǝgmayam tǝgzâram-i, tǝstâɣam-i-du daɣ akal-nawan?» 28 Ǝnnan-as: «Aššak a nǝkkas daɣ as issân daɣ-ak Amaɣlol. Adi a fǝl nǝnamanna gar-ena: Tǝmǝlet-tu tassaq gar-ena dǝr-ǝk, nǝnǝmǝgget dǝr-ǝk arkawal ǝn tassaq. 29 Ǝhǝd-anaɣ as wǝr dana-za-tǝɣšǝdaɣ arat, ǝmmǝk as nakkanay da wǝr dak-ku-nǝɣšed, nǝg-ak aharog olâɣan noyy-ik tǝgle daɣ alxer. Illikan as ǝmǝrǝdda ikf-ik Amaɣlol albaraka-net.»
30 Ig-asan Isǝhaq ǝsǝmmǝguri olâɣan ǝtšan ǝšwan. 31 Ǝgan-du tanakra tǝnzayat ǝnamasadafan arkawal. Intak-kan Isǝhaq ǝglan ǝfalan-tu daɣ alxer.
32 Ǝzǝl wen da a d-osan eklan n Isǝhaq ewâyan-as-du isalan n anu wa ǝɣazan ǝnnan-as: «Nǝgraw daɣ-as aman». 33 Ig-as Isǝhaq esǝm Šiba (almaɣna tassaq). Adi a fǝl itawagga y ǝɣrǝm wa esǝm Ber-Šeba (almaɣna anu ǝn tassaq) har azala.
Šidoden n Ezaw