25
Tilkamat ǝn tǝɣrǝst n Ibrahim
1 Ilas Ibrahim azalaf. Izlaf tantut tǝgât esǝm Kǝtura. 2 Ila dǝr-ǝs meddan ǝmosnen Zimran ǝd Yokšan ǝd Mǝdan ǝd Midǝyan d Išbak ǝd Šuhax, 3 Yokšan eraw Šǝba ǝd Dǝdan. Dǝdan en da a d-ǝgmadan Aššuritatan ǝd Lǝtušitatan ǝd Lǝhumitatan. 4 Midǝyan ǝntada eraw Efa d Efer ǝd Xanok d Abida d Elda. Aytedan win di kul Kǝtura a d-ǝgmadan, taɣur Ibrahim.
5 Ikfa Ibrahim awa ila kul y Isǝhaq. 6 Iga šinufa i maddanǝs win ila ǝd tawahayen-net, mišan harwada iddar as tan-issoka akal ǝn dǝnnǝg issǝgak-kan Isǝhaq.
7 Ibrahim temeday n awatay-net d ǝssayat tǝmǝrwen ǝd sǝmmos daɣ ǝddǝnet, 8 as t-aba. Daɣ adi dǝffǝr tǝɣrǝst zagret ǝd tušaray a daɣ issiday, igmad aytedan, ilkam i marawan-net. 9 Ǝnbalan-t-in bararan-net ǝmosnen Isǝhaq d Ismaɣil daɣ akazam wa n Makfela, ihan tawagost n Efron, ag Tǝsoxar wa n iyyan daɣ Xitatan, dagma n ǝɣrǝm ǝn Mamre. 10 Tawagost ta ǝnta a izzǝnza Ibrahim ɣur Xitatan inbal daɣ-as tantut-net Sarata.
11 Dǝffǝr iba n Ibrahim iga Mǝššina albaraka daɣ rures Isǝhaq, iɣsar dagma n anu igan esǝm Ber-Laxay-Roy.
Ǝzzurrǝyya n Ismaɣil
12 Ǝnta da ǝzzurrǝyya n Ismaɣil rures n Ibrahim, wa ila ǝd Hajara ta n wǝlǝt Masar tǝmosat taklit ǝn Sarata.
13 Ǝntanay da ismawan ǝn maddanǝs n Ismaɣil s ǝnǝmǝjwar-nasan: Aɣafadday-net esǝm-net Nebayot, ilkam-as Kedar, d Adǝbel, ǝd Mibsam, 14 ǝd Mišma, ǝd Duma, ǝd Massa, 15 ǝd Haddad, ǝd Tema, ǝd Yetur, ǝd Nafiš, ǝd Kedma. 16 Ǝntanay ǝddi da ismawan ǝn maddanǝs n Ismaɣil a n maraw d ǝššin s akk iyyan imos ǝmǝnokal ǝn tawšet, akkiyyan deɣ ǝgan fall-as ɣawnatan ǝd tǝɣarmaten.
17 As iga Ismaɣil temeday n awatay ǝd karadat tǝmǝrwen daɣ ǝddǝnet, aba-tu, ilkam i marawan-net. 18 Iɣsar ǝzzurrǝyya n Ismaɣil daɣ amadal wa gǝr Xabila ǝd Šur tǝddinnagat i Masar daɣ anamod n Aššur. Iwar aganna daɣ ǝzzurrǝyya wahadan n Ibrahim.
Ǝttarix n Isǝhaq ǝd Yaqub
Tǝhǝwt n Ezaw ǝd Yaqub
19 Ǝntada ǝttarix n Isǝhaq ag Ibrahim. 20 Isǝhaq ǝkkozat tǝmǝrwen n awatay-net daɣ ǝddǝnet as izlaf Raqqiyetu ta n tǝmadrayt ǝn Laban, wǝlǝt Bǝtuhel wa n iyyan daɣ Aramitatan win Mezobotamǝya.
21 Onsay Isǝhaq Amaɣlol a t-ikfan barar, fǝlas tantut-net a tǝggǝgrat. Tǝzzar tǝqbal tǝwatray-net, tǝga taɣurǝs Raqqiyetu tadist n eknewan.
22 Ad ǝtanazmaman bararan daɣ tǝdist-net, tǝzzar tǝnna: «Ma fǝl di-igarraw awa?» Tǝgmay daɣ Amaɣlol a tat-issusǝn awa imos awen. 23 Inn-as Amaɣlol:
«Sanatat tǝmattiwen a ǝhanen tadist-nam
Sanatat tawšeten wǝr nǝnamara a kam-du-z-ǝgmǝdnen.
Iyyat daɣ-asnat ad tarnu ta hadat.
Barar wa d-azzaran, a fall-as ixkǝm wa das-d-ilkaman.»
24 As d-ewad alwaq wa daɣ tǝggǝz amadal ittǝdda as eknewan a ǝhanen tadist-net. 25 Wa d-azzaran ihǝw-du ijigalgal alam-net s anzadan zaggaɣnen adi da fǝl as itawagga esǝm Ezaw. 26 Wa d-issǝlkaman ihǝw-du ittâf ǝfus-net erǝz n ǝmaqqar-net. Adi a fǝl das-itawagga esǝm Yaqub. Sǝdisat tǝmǝrwen n awatay n Isǝhaq daɣ ǝddǝnet as ǝhǝwan.
Inazzan win din-iga Ezaw almaqam-net wa n tišit n aɣafadday
27 Ǝdwalan bararan en. Iqqal Ezaw ǝnagmar isadasan irân ǝsuf. Yaqub amaran iqqal awedan sǝmmidan issofan tǝɣimit daɣ aɣaywan. 28 Issof Isǝhaq Ezaw fǝlas tara a iga isan ǝn tawaqqast Raqqiyetu amaran tǝssof Yaqub.
29 Ǝzǝl iyyan isaŋŋu Yaqub amensay iyyan as d-osa Ezaw igmad-du tagmǝrt ikna iduz ih-ay gǝlǝk. 30 Inna Ezaw i Yaqub: «Akf-id daɣ amensay di zaggaɣan di, laz a di-ihan ǝkneɣ iduz». Adi da fǝl itawagga y Ezaw esǝm Edom (almaɣna tǝzuɣay). 31 Inn-as Yaqub: «Taggaɣ-ak adi mišan s ǝššǝrǝd n a di-tazzanza almaqam nak wa n tišit n aɣafadday.» 32 Inn-as Ezaw: «Nak ǝmǝrǝdda laz a ibukan a di-anɣu, ma di-z-aknu almaqam-in wa n tišit n aɣafadday?» 33 Tǝzzar inn-as Yaqub: «Kundaba tǝhadaɣ-i ǝmǝrǝdda». Ihad-as Ezaw. Ǝmmǝk en da as din-izzǝnza Ezaw almaqam-net wa n tišit n aɣafadday i Yaqub. 34 Ikfa Yaqub Ezaw tagǝlla ǝd tanzant. Itša, išwa, ibdad, igla. Ǝmmǝk wa da as issǝkna Ezaw iban safrar n almaqam-net wa n tišit n aɣafadday.