24
Azalaf n Isǝhaq
1 Igla Ibrahim har iqqal aɣmar waššaran. Ig-as Amaɣlol albaraka daɣ arat kul.
2 Ǝzǝl iyyan inna Ibrahim y ǝkli-net wa n asahaw-net, s ǝnta a inǝttafan ǝd tǝla-net kul: «Are daɣ-ak ad tagaɣ ǝfus-nak daw taɣma-nin, 3 tǝhǝdaɣ-i s Amaɣlol, Ǝmǝli ǝn jǝnnawan ǝd mǝdlan, as du-wǝr-za-tǝzzǝzlǝfa barar-in iyyat daɣ Kananitatan a daɣ ǝɣsara da, 4 kalar ad takkaɣ akal-in tǝsǝnnǝfrǝna-du daɣ aɣaywan-nana tantut i barar-in Isǝhaq.»
5 Inn-as ǝkli-net: «Kud za tugay tǝntut s a dǝr-ǝs d-idawaɣ ǝs kallan a. Meqqal ad idawaɣ ǝd barar-nak s akal wa du-tǝgmada?»
6 Inn-as Ibrahim: «Kaššeday fǝl tidawt ǝd barar-in s akal en! 7 Amaɣlol, Ǝmǝli ǝn jǝnnawan, a di-d-ikkasan daɣ ahan n abba-nin ǝd marwan-in, iššewal-i idkal-i arkawal, inn-i: " Akal a ad t-akfa y ǝzzurrǝyya-nak", daɣ ǝnta iman-net as z'assaglu angalos-net izar-ak, tǝsǝnnǝfrǝna-du daɣ akal en tantut i barar-in. 8 As tugay tǝntut s a dǝr-ǝk du-tidaw tǝfâl-kay tǝhuday ta di-tǝge da. Kala kala a tu-wǝr-imǝl a z'agin tidawaɣ ǝd barar-in s akal en.»
9 Iga ǝkli ǝfus-net daw taɣma ǝn mǝššis Ibrahim, ihad as as ad ammazal awa das-inna. 10 Isannafran-du maraw olaman daɣ mǝnas ǝn mǝššis, issǝwǝr-tan ǝssilxaten n Ibrahim šin ǝlanen ǝlqimat. Innǝmad ifallatan a n Mezobotamǝya, ikka aɣrǝm wa iha ahan ǝn Naxor wa n amadray n Ibrahim.
11 As din-ewad issǝgan olaman-net dagma šat n aman tǝhât tama n ǝɣrǝm, itaggu awen takǝst, alwaq wa daɣ du-zarragnat tǝdoden. 12 Tǝzzar ittar inna: «Amaɣlol, Ǝmǝli ǝn mǝšši Ibrahim, ǝgmaya daɣ-ak a di-taknaɣ ǝšikǝl-in azalada, tǝsǝnnǝfilǝlaɣ ǝlluɣ-nak i mǝšši Ibrahim s a das-taga tara-net. 13 Nak da ɣur ǝmǝšwi a, amaran šibararen n ǝɣrǝm a d-ǝzrǝgnat. 14 Ad ǝgmǝya daɣ iyyat daɣ-asnat a di-du-takfu ǝtǝkin-net ad ašwa, as di-tǝnna: " Yay ašǝw, amaran olaman-nak da a tan-aššašwa", ad ǝssǝnaɣ as tǝbarart tǝdi ǝnta a tǝfrana y ǝkli-nak Isǝhaq. Ǝmmǝk wǝdi daɣ as z'ǝssǝnaɣ as tǝsinafalalaɣ ǝlluɣ-nak i mǝšši.»
15 Harwada wǝr iɣred tǝwatray, as ogga Raqqiyetu ta n elles ǝn Bǝtuhel wa n ag ǝn Milxa ǝd Naxor wa n amadray n Ibrahim, tǝzzay-du tǝssiwar ǝtǝkin ǝzir-net. 16 Tǝmos tǝmawat tǝgât šihussay šin ǝqqǝtasnen, ǝs harwada wǝr tǝzday meddan. Tǝras-du fǝl šat en, tǝdnay ǝtǝkin-net, tǝggǝzzay tǝktar. 17 Ozal ǝkli issǝlkad-as, inn-as: «Ǝgmaya daɣ-am a di-taššašwa daɣ ǝtǝkin-nam.» 18 Tǝnn-as: «Ašǝw, mǝšši!» Tarmad as das-tǝsaggatta ǝtǝkin y ad ašǝw. 19 As išwa, tǝnn-as: «Ad ǝlkǝwa y olaman-nak har ašwin ketnasan.» 20 Tǝnɣal ǝtǝkin-net tarmad daɣ ǝɣlal, ad tǝtazal tǝdannay-t-id har tǝššǝšwa olaman ketnasan. 21 A tat-itayyad alǝs en, wǝr inna wala, ira ad issǝn kud Amaɣlol a das-iknan ǝšikǝl-net wala.
22 As ǝšwan olaman, idkal-du tǝzǝbit n urǝɣ tǝgât ǝzuk n ǝdinar ikf-as-tat, idkal-du deɣ ǝššin ǝlkǝzan n urǝɣ s akkiyyan iga ǝzuk ǝn maraw dinaran ǝd sǝmmos, iqqan-as-tan. 23 Inn-as: «Ma kam-erawan? Are daɣ-am a di-tu-tǝmǝla. Awak ill-ay adag daɣ ahan-nawan a daɣ ǝnseɣ ahada nak d ǝšikǝl-in?» 24 Tǝnn-as: «Nak elles ǝn Bǝtuhel, rures ǝn Milxa ǝd Naxor. 25 Awalla ehan-nana ih-ay ǝlǝmmuz aggen d a ǝtšan olaman-nak, ih-ay deɣ adag a daɣ tǝnsam.»
26 Issǝjad ǝkli y Amaɣlol, iggoday-as. 27 Inna: «Ǝggodayaɣ-ak Amaɣlol, Ǝmǝli ǝn mǝšši Ibrahim! Tǝsannafalalaɣ Amaɣlol ǝlluɣ-nak ǝd tǝlɣudǝla-nak i mǝšši. Kay Amaɣlol a di-d-izazzalalaɣan daɣ ǝšikǝl-in ǝs marwan ǝn mǝšši.»
28 Tozal tǝmawat ten y ad tagu isalan y anna-net. 29,30 Ǝnta Raqqiyetu tǝla amaqqar igân esǝm Laban. As inay tǝzǝbit d ǝlkǝzan daɣ ǝfus ǝn tamadrayt-net, isl-as deɣ tǝgannu: «Awa a di-inna alǝs», iqqab-du, ozal, ikka akli n Ibrahim, os-ay-in ibdâd illa ɣur olaman-net dagma ǝn šat n aman. 31 Tǝzzar inn-as: «Iyyaw kay wa ikfa Amaɣlol albaraka. Mas du-wǝr-tewedaɣ ehan? Nak simatagaɣ-ak ehan tǝggaza, d adag y olaman-nak.»
32 Ewad-du ǝkli ehan, izazzabbat Laban ilalan fǝl olaman, ikf-en a ǝtšan. Ikfa-du akli ǝd meddan win dǝr iddew aman as ǝššoradan idaran-nasan. 33 Dǝffǝr awen ǝmmewayan-as-du mensewan. Mišan inna ǝkli n Ibrahim: «Nak wǝr z'atša iket wǝr ǝmelaɣ arat wa di-d-ewayan.» Inn-as Laban: «Šiwǝl!» 34 Inna: «Nak akli n Ibrahim. 35 Amaɣlol ikfa mǝšši albaraka ǝd fǝrregat, ikf-ay imǝnas ǝd šitan, ǝd wǝlli d ayfǝd d ǝzdan, d ǝzrǝf d urǝɣ, d eklan ǝd taklaten. 36 Sarata tantut ǝn mǝšši, tǝla dǝr-ǝs barar daɣ tušaray-net; tǝzzar ikf-ay Ibrahim awa ila kul. 37 Issǝhad-i mǝšši as wǝr du-za-sǝnnǝfrǝnaɣ i barar-net tantut daɣ Kananitatan, a ǝhanen akal wa tǝha tǝmǝɣsurt-net. 38 Kalar inn-i ad akkaɣ ehan n abba-net ǝd marwan-net sǝnnǝfrǝna-du i barar-net tantut. 39 Ǝnneɣ i mǝšši: "Kud za tugay tǝntut s a dǝr-i du-tidaw?" 40 Inn-i: "Amaɣlol s ǝnta as ǝlkamaɣ i tara-net, a d-assaglu angalos-net idaw dǝr-ǝk. Tǝzzar akn-ak-du ǝšikǝl-nak tǝsǝnnǝfrǝna-du i barar-in tantut daɣ aɣaywan ǝn marwan n abba-nin. 41 As din-toseɣ imarwan-in a kay-tǝfǝl tǝhuday ta di-tǝge, gǝr za tǝgrawaq-qat wala." 42 As d-oseɣ dagma n ǝmǝšwi azalada, ǝgeɣ tǝwatray ta, ǝnneɣ: "Amaɣlol, Ǝmǝli ǝn mǝšši Ibrahim, tǝkneɣ ǝšikǝl a ǝgeɣ da. 43 Ǝmǝrǝdda ad ǝlle ɣur ǝmǝšwi a ad ǝgmǝya daɣ tǝmawat ta du-tǝzragat a di-taššašu daɣ ǝtǝkin-net." 44 As di-tǝnna: "Ašǝw! Amaran a dak-aššašwaɣ olaman-nak," ad ǝssǝnaɣ as ǝnta tantut ta tǝfranaɣ i rures ǝn mǝšši. 45 Harwa da wǝr ǝɣreda tǝwatray daɣ man-in, as du-tǝgmad Raqqiyetu, tǝssiwar ǝtǝkin ǝzir-net tǝras fǝl šat tǝlkaw d aman. Ǝnneɣ-as: "Šašw-i-du, tǝbarart-in." 46 Tarmad as di-du-tǝzzal ǝtǝkin-net, tǝnn-i: "Ašǝw, amaran as tǝšwe a dak-aššašwaɣ olaman-nak." As ǝšwe, tǝššǝšw-i olaman-in. 47 As tat-ǝssǝstanaɣ ǝd wa tat-erawan, tǝnn-i: "Nak elles ǝn Bǝtuhel, wa n ag Naxor ǝd Milxa." Ǝddi ad ǝge tǝzǝbit daɣ tanjart-net, ǝgeɣ ilkǝzan daɣ fassan-net. 48 Ǝssǝjadaɣ y Amaɣlol, Ǝmǝli ǝn mǝšši Ibrahim, ǝggodayaɣ-as, as di-izazzalalaɣ s adag wa daɣ du-za-sǝnnǝfrǝnaɣ i rures ǝn mǝšši tantut tǝmosat elles ǝn tagazay ǝn mǝšši. 49 Ǝmǝrǝdda ǝmǝlat-i kud tǝqbâlam ǝs man ardanen awa ira mǝšši. As wǝr iga adi tǝmǝlam-i ad ǝgmǝya s adag iyyan.»
50 Ijjǝwwab-as Laban ǝd Bǝtuhel ǝnnan-as: «Awa igi n Amaɣlol iman-net daɣ adi wǝr nǝfreg tǝnna daɣ-as arat. 51 Raqqiyetu da, dat-ǝk da, idaw dǝr-ǝs. Tǝqqǝlet tantut ǝn rures ǝn mǝššik, s ǝmmǝk was t-inna Amaɣlol.» 52 As isla ǝkli n Ibrahim i batu ten, issǝjad, iggoday y Amaɣlol. 53 Tǝzzar ikkas-du daɣ lalan-net uɣǝnan n ǝzrǝf d urǝɣ ǝd tǝbǝddaɣ ikf-en i Raqqiyetu. Ikfa deɣ ǝmaqqar-net d anna-net šinufa šiyyad ǝlânen ǝlqimat.
54 Itša ǝkli n Ibrahim ǝnta d ǝšikǝl-net, ǝšwan, ǝnsan. As affaw ɣur tanakra-nasan inna y ǝmaqqar ǝn Raqqiyetu d anna-net: «Sallamat-i ad ǝqqǝlaɣ aɣaywan ǝn mǝšši.» 55 Ǝnnan-as «Tabarart a ɣur-na taqqam har tagu edag ǝn maraw adan, amaran tidawa dǝr-ǝs». 56 Inn-asan ǝkli: «A di-wǝr-tǝsǝllulem ǝmǝrǝdda ad ikna Amaɣlol ǝšikǝl-in. Sallamat-i ad akkaɣ aɣaywan ǝn mǝšši.»
57 Ǝnnan: «Aɣratana tabarart ad nǝssǝn awa tǝnna.» 58 Ǝɣran-du Raqqiyetu, ǝssǝstanan-tat ǝnnan-as: «Tareɣ tidawt n alǝs a?» Tǝnna-asan: «Awalla.» 59 Amaran ǝssǝglan Raqqiyetu ǝššedawan-tat ǝd tǝklit-net ta tat-tǝssǝdwalat tǝgla tǝddew d ǝkli n Ibrahim d ǝšikǝl-net. 60 Ǝttaran i Raqqiyetu a das-igan albaraka, ǝnnan:
«Kam tamadrayt-nana, tǝqqǝlaɣet mas ǝn giman ǝn giman n aytedan.
Arnet ǝzzurrǝyya-nam izǝnga-net.»
61 Tǝwan Raqqiyetu ǝnta ǝd taklaten-net olaman, ǝddewnat d ǝkli. Ǝmmǝk wa da as iddew ǝkli n Ibrahim ǝd Raqqiyetu.
62 Ifâl-du Isǝhaq anu igân esǝm Ber-Laxay-Roy, ihozan edag wa daɣ iɣsar daɣ amadal ǝn Negab. 63 Iwilallag daɣ ǝsuf takǝst, as ogga aytedan ǝwânnen olaman ǝzayan-t-id. 64 As togga Raqqiyetu Isǝhaq, tǝtaraggat-du aḷam, 65 Tǝzzar tǝssǝstan akli tǝnn-as: «Ma imos alǝs wa dǝr za nammanay daɣ ǝsuf da?» Inn-as ǝkli «Awen mǝšši». Tǝbaz-du afǝr-net amazay wen da tǝlsa daɣ-as.