23
Inazzan n adag wa daɣ tǝnbal Sarata.
1 Temeday n awatay ǝd sanatat tǝmǝrwen d ǝssa a tǝga Sarata dăɣ ǝddǝnet. 2 Aba-tat daɣ ǝɣrǝm ǝn Kirǝyat-Arba s ǝnta as itawannu ǝmǝrǝdda Xebron, daɣ akal ǝn Kanan. Tǝga tǝfǝyyawt ǝn Sarata fǝl Ibrahim, ila fall-as. 3 Tǝzzar igmad edag wa tǝha alzanazat ǝn tǝntut-net, ikka Xitatan inn-asan:
4 «Nak ǝnaftaɣ a mosa a daɣ-wan iɣsâran, ǝgrǝwat-i edag daɣ akal-nawan a daɣ ǝnbala alzanazat-in.» 5 Ǝnnan-as Xitatan: 6 «Sǝsǝm-ana, mǝššikkana, awedan a tǝmosaɣ ikfa Mǝššina almaqam ɣur-na, ǝnbǝl alzanazat ǝn tǝntut-nak daɣ adag wa n tǝfrǝnt daɣ zǝkwan-nana, wǝr danaɣ-iha i dak-igdalan edag ǝn zǝkwan-net y ad tǝnbǝlaɣ alzanazat-nak.» 7 Inkar Ibrahim issǝjad dat-san. 8 Amaran iššewal-asan ǝnta da inn-asan: «Azzama tǝrdam s ad ǝnbǝlaɣ alzanazat a ǝkkǝsaq-qat dat šittawen-in, wǝdi are daɣ-wan a di-tansǝyam Efron ag Soxar, 9 a di-ardu a ɣur-ǝs azzanza ǝɣǝɣi a n Makfela, ihan tǝla-net daɣ tama ǝn tawagost-net. A di-t-azzanzu ǝlqimat-net daɣ ǝzrǝf, fǝl ad iqqǝl tǝla-nin daɣ akal-nawan.»
10 Awen as itaggu, Efron iman-net iha ǝljǝmaɣat ǝn Xitatan ten, inna y Ibrahim dat Xitatan win d-osanen imi n ǝɣrǝm en: 11 «Kala kala, mǝšši, sǝsǝm-i! Ǝkfeq-qay tawagost, ǝkfeq-qay akazam wa tat-ihan. Ǝkfeɣ-ak-kan dat šittawen ǝn tamattay-nin: ǝnbǝl alzanazat ǝn tǝntut-nak.»
12 Issǝjad Ibrahim dat kǝl akal, 13 amaran inna y Efron: «Ǝgmaya daɣ-ak a di-tǝssǝsǝma! Ǝqbǝl a kay-akfaɣ ǝlqimat ǝn tawagost, a daɣ-as ǝnbǝlaɣ alzanazat ǝn tamahharak-in.» 14 Inna Efron y Ibrahim: 15 «Sǝsǝm-i mǝšši! Amadal n ǝkkozat tǝmad ǝn tafelt n ǝzrǝf ma z'iqqǝl gǝr-i dǝr-ǝk? Ǝnbǝl alzanazat ǝn tǝntut-nak.»
16 Igra Ibrahim, irda, ikat azrǝf was inna Efron dat šittawen ǝn Xitatan imos ǝkkozat tǝmad ǝn tafelt n ǝzrǝf wa ǝššǝšɣalan mazanzan n azzaman en. 17 Tǝggaz tawagost n Efron ta tǝhat Makfela dagma ǝn Mamre, d akazam d eškan kul win ǝhanen tawagost ǝd win gogasan-net, 18 tǝla n Ibrahim dat šittawen ǝn Xitatan win d-osanen imi n ǝɣrǝm.