22
Ǝtǝwǝjǝrrab n Ibrahim
1 Dǝffǝr awen ijjǝrrab Mǝššina Ibrahim, inn-as: «Ibrahim!» Ikkǝwan-as Ibrahim, inna: «Nak da!» 2 Inn-as Mǝššina: «Ǝdkǝl barar-nak Isǝhaq, imosan barar-nak a n iyyanda tǝknêɣ tara, takka dǝr-ǝs akal ǝn Morǝyya, fǝl adɣaɣ a kay-z-assakna, tagaɣ-i-tu takutay ta tǝtirǝkǝmmet.»
3 As affaw iga-du Ibrahim tanakra tǝnzayat, isaffardat eškan, iggǝgga ajad-net, ǝbazan tarrayt ǝnta ǝd barar-net Isǝhaq d ǝššin daɣ eklan-net. Ikka edag wa das-imal Mǝššina. 4 As ǝzǝl n Ibrahim wa n karad ogga edag wa ikka daɣ ǝsǝswǝd. 5 Inna y eklan: «Ɣamiwat da da tagǝzam ajad, nak ǝd barar ad nakku afalla n ǝdɣaɣ ad nǝɣbǝd Mǝššina, nǝqqǝl-kawan-du da da.»
6 Issǝwar Ibrahim barar-net Isǝhaq eškan, ǝnta amaran eway šimakaten ǝddarnen d ǝlmoši. Ǝddewan ǝglan fǝl ǝššin essan jiwanken. 7 Inna Isǝhaq y abba-net Ibrahim: «Abba-nin!» Ikkǝwan-as Ibrahim inn-as: «Nak da, barar-in! Ma igan?» Inn-as Isǝhaq: «Temsay d eškan da. Mǝni za texsay ta n tǝkutay ta tǝtirǝkǝmmet?» 8 Inn-as Ibrahim: «Mǝššina a du-z-igrǝwan texsay ǝn tǝkutay ta tǝtirǝkǝmmen, barar-in.» Ǝglân ǝddewan fǝl ǝššin-essan, jiwanken.
9 As din-osan edag wa das-imal Mǝššina, ikras Ibrahim edag ǝn tǝkutay, isammasansa fall-as eškan. Tǝzzar ikrad barar-net Isǝhaq issǝwar-tu edag ǝn tǝkutay fǝl afalla n eškan win, 10 amaran izzal ǝfus-net idkal-du ǝlmoši y ad igzǝm rures. 11 Tamazayt ten daɣ ad t-iɣra Angalos n Amaɣlol daɣ jǝnnawan, inn-as: «Ibrahim! Ibrahim!» Ikkǝwan-as inna: «Nak da!» 12 Inn-as: «Ad wǝr awǝd ǝfus-nak barar! A das-wǝr-tǝɣšǝdaɣ arat! Id ǝmǝrǝdda ǝssanaɣ as tǝksuda Mǝššina. Wǝr di-tǝgdela wala barar-nak a n iyyanda.» 13 Idkal Ibrahim asawad-net ogga ajaɣol iyyan daɣ tǝfsǝq itiwattaf s ǝskawan. Tǝzzar ikk-ay ilway-t-idu, ig-ay takutay ta tǝtirǝkǝmmet daɣ adag ǝn barar-net.
14 Iga Ibrahim y adag en den esǝm: «Amaɣlol a du-z-igrǝwan.» Adi fǝl itawannu har azala: «Adɣaɣ wa n Amaɣlol, a fǝl du-z-itǝwǝgrǝw.» 15 Ilas-du Angalos n Amaɣlol teɣaray n Ibrahim daɣ jǝnnawan, 16 inn-as: «Amaɣlol inna: "Dad zamas wǝr tǝgdela barar-nak a n iyyanda, 17 illikan as a daɣ-ak sǝnnǝhǝlaɣ igi n albaraka ǝssǝgǝtaɣ deɣ ǝzzurrǝyya-nak, šilat n etran daɣ jǝnnawan madeɣ šiblalen n amadal, amaran ǝzzurrǝyya-nak ad arnu imagzaran-net. 18 Šimattiwen n ǝddǝnet kul ad ǝgrǝwnat albaraka s ǝssǝbab n ǝzzurrǝyya-nak fǝlas takawent a di-tǝge."»
19 Iqqal Ibrahim eklan-net, ǝddewan ǝqqalan Ber-Šeba. Igla Ibrahim iɣsâr daɣ Ber-Šeba.
Ǝzzurrǝyya ǝn Naxor
20 Dǝffǝr awen, osan-du salan Ibrahim as: «Milxa tǝla meddan d amadray-nak Naxor. 21 Aɣafadday-net esǝm-net Utǝs, amadray-net Buz, iyyan Kǝmuhel šis n Aram, 22 ǝd Kesed, ǝd Xazo, ǝd Fildaš, ǝd Yidlaf ǝd Bǝtuhel.» 23 Bǝtuhel eraw Raqqiyetu. Ǝntanay da da maddanǝs ǝn Milxa a n ǝttam tǝla ǝd Naxor wa n amadray n Ibrahim. 24 Takna ǝn Milxa tǝgât esǝm Rǝhuma, ǝntada tǝla ǝd Naxor meddan ǝmosnen: Tebax, ǝd Gaxam, ǝd Taxaš ǝd Mahaka.