21
Tǝhǝwt n Isǝhaq
1 Iga Amaɣlol arraxmat-net i Sarata s ǝmmǝk was das-iga arkawal n awen. 2 Tǝzzar tǝga Sarata tadist, as iga adi Ibrahim waššar. Tǝgraw barar daɣ alwaq wa das-imal Mǝššina. 3 Iga Ibrahim i rures wa igraw ǝd Sarata da esǝm Isǝhaq. 4 Isammankad-tu ǝzǝl wad iga ǝttam adan ǝd tǝhǝwt, imos awen arat as t-omâr Mǝššina.
5 Iga Ibrahim ɣur tǝhǝwt n Isǝhaq temeday n awatay. Temeday n awatay a iga Ibrahim daɣ ǝddǝnet as ihǝw Isǝhaq. 6 Tǝnna Sarata: «Izzidz-i Mǝššina. Aytedan kul win ǝslanen tǝhǝwt n Isǝhaq ad agin tadaza ta ǝgeɣ. 7 Ma imos wa z'issudǝfan Ibrahim as Sarata ilkâm daɣ-as ǝsǝnkǝs ǝn bararan? Ǝnta ǝkfeq-qu barar daɣ tušaray-net.»
Ǝtǝwǝstaɣ ǝn Hajara d Ismaɣil
8 Idwal Isǝhaq. Ǝzǝl wad tǝmmǝzay Sarata d ǝsǝnkǝs-net iga Ibrahim saksas zǝwwǝran. 9 Tǝnay Sarata barar ǝn wǝlǝt Masar ta tǝgat Hajara, wa tǝla d Ibrahim, itajab daɣ barar-net Isǝhaq. 10 Tǝnna y Ibrahim: «Ǝstǝɣ taklit a ǝnta ǝd rures. Barar wa, wǝr z'inǝmǝkusǝt ǝd barar-in Isǝhaq» 11 Batu ta tǝɣšad iman n Ibrahim wǝllen fǝlas Ismaɣil da rures a imos. 12 Mišan inna Mǝššina y Ibrahim: «Ad wǝr ǝɣšǝdan man-nak daɣ batu ǝn barar-nak ǝd tawahayt-nak. Ardu s awa dak-tǝnna Sarata ǝddi. Id fǝlas aganna wa n Isǝhaq a daɣ z'agu ǝzzurrǝyya-nak. 13 Amaran barar wa n tawahayt ad iqqǝl ǝnta da ǝmaraw ǝn tamattay iyyat, id ǝnta da rurek.»
14 As affaw ǝzǝl wa hadan iga-du Ibrahim tanakra tǝnzâyat iga i Hajara allaw ǝn tǝgǝlla, izzǝzlag deɣ ǝzir-net anwar idnâyan aman, ikf-et barar, issǝgl-et. Tǝgla, teway ǝd taneray ǝn Ber-Šeba, wǝr tǝssen sas tǝdag. 15 As ǝɣradan aman daɣ ǝnwar, toyya-du rures daw tǝfsǝq iyyat. 16 Tǝzzar tǝkk-as sǝdi tǝqqim, fǝlas tǝnna: «Wǝr areɣ ad hannaya barar-in itiba-tu.» Tǝqqim sen da ad tǝhallu.
17 Isla Mǝššina i tala ǝn barar, tǝzzar iɣra-du Angalos ǝn Mǝššina Hajara daɣ jǝnnawan issǝstan-tat inn-as: «Ma kam igrawan, Hajara? Ad wǝr tǝrmǝɣa. Mǝššina islâ i tala ǝn barar daɣ adag wa daq-q in-toyye. 18 Ǝbdǝd! Ǝdkǝl barar-nam, tǝssǝna daɣ-as, id ad t-agaɣ ǝmaraw ǝn tamattay tagget.» 19 Olam Mǝššina šittawen ǝn Hajara togga anu. Tǝgla tǝdnay anwar-net tǝššǝšwa barar-net.
20-21 Idwal barar daɣ tǝɣlift ǝn Mǝššina, iqqal ǝnandab ǝn tǝganzay n amassadas. Iɣsar daɣ taneray ǝn Faran. Tǝzzǝzlaf-tu mas wǝlǝt Masar.
Tassaq n Ibrahim d Abumalǝk
22 Azzaman en da a daɣ d-osa Abumalǝk Ibrahim iddew ǝd Fikol wa n ǝmǝnokal ǝn nammagaran-net. Inna Abumalǝk y Ibrahim: «Igmâd aššak as Mǝššina ill-ay dǝr-ǝk daɣ awa tǝtagga kul. 23 Ǝmǝrǝdda ǝhǝd-i ǝs Mǝššina as wǝr di-za-takkaddala nak wala bararan-in wala ǝzzurrǝyya-nin. Ǝmmǝk was dak-ǝmmozala s ǝlluɣ, mazal-i sǝr-ǝs kay da, nak d akal a daɣ tǝɣsara da.» 24 Inn-as Ibrahim «Ǝhadaɣ-ak sǝr-ǝs».
25 Den daɣ ad išaššawad Ibrahim tala-net Abumalǝk daɣ batu n anu wa ǝrkaban eklan n Abumalǝk daɣ win-net. 26 Inn-as Abumalǝk: «Wǝr ǝssena wa igan adi. Kay iman-nak wǝr di sǝr-ǝs tǝnneɣ arat, amaran wǝr ǝsleɣ y i sǝr-ǝs immigradan dat azalada.» 27 Idkal Ibrahim eharay wa ǝndǝrran ǝd šitan ikf-en y Abumalǝk, namadkalan arkawal ǝn tassaq. 28 Iskat Ibrahim šibǝgag ǝssayat daɣ aharay-net. 29 Inn-as Abumalǝk: «Ma fǝl ǝnsanat ǝssayat tǝbǝgag šin tǝskata da?» 30 Inn-as Ibrahim: «Ǝssayat tǝbǝgag šin are daɣ-ak a tanat-tǝqbǝlaɣ ǝgmadnat-in ǝfus-in, ǝmosnat tǝgǝyya n as nak a iɣazan anu di.» 31 Adi a fǝl iga adag en esǝm Ber-Šeba, almaɣna: «anu wa n tǝhuday» fǝlas ǝššin essan as fall-as ǝhadan.
32 Dǝffǝr as nimadkalan arkawal ǝn tassaq daɣ Ber-Šeba iqqal Abumalǝk akal ǝn Filistinatan, ǝnta ǝd Fikol wa n ǝmǝnokal ǝn nammagaran-net. 33 Inbal Ibrahim ašǝk igân esǝm tamaris daɣ Ber-Šeba, iɣbad Ǝmǝli, Mǝššina di n Amaɣlol daɣ adag wen. 34 Iɣsar Ibrahim daɣ akal en da ǝn Filistinatan en har tǝga tǝrut.