20
Tǝmǝɣsurt n Ibrahim ɣur Abumalǝk.
1 Iggǝlat Ibrahim ǝs taneray ǝn Negab. Iɣsar gǝr Kadeš ǝd Šur. Daɣ azzaman win iga Ibrahim daɣ Gǝrar, 2 a igannu y aytedan Sarata ta n tǝntut-net tǝmadrayt-net a tǝmos. Inkar Abumalǝk ǝmǝnokal ǝn Gǝrar inna a das-du-tammaway Sarata. 3 Ahad wen da ad inafalal Mǝššina y Abumalǝk daɣ tǝrgǝt, inn-as: «A kay-iba fǝl ǝddǝlil ǝn tǝntut ta dak-du-tǝmmewayat ǝddi fǝlas tǝzlâf.» 4 As iga awen Abumalǝk harwada wǝr tat-ides, tǝzzar inna: «Ǝmǝli-nin, nak ǝd tamattay-nin a dana-tǝhlǝka da nǝɣdâl? 5 Awak wǝrgeɣ ǝnta da a di-innan tamadrayt-net a tǝmos? Ǝnta iman-net tantut tǝnn-i amaqqar-net a imos. Adi da fǝl ǝgeɣ adi s ǝnnǝyat toɣadat, wǝr ǝmmozala tǝkma waliyyat.»
6 Ijjǝwwab-as Mǝššina daɣ tǝrgǝt inn-as: «Ǝssânaɣ iman-in as ǝnnǝyat toɣadat as tǝgeɣ adi, adi da a fǝl areɣ a kay-agǝza daɣ igi n abakkad, taqqama da wǝr tat-tǝdesa. 7 Suɣǝl tantut di alǝs-net ǝmǝrǝdda! Ǝnnǝbi a imos, amaran a dak-ansǝy Mǝššina a dak-igdalan ahluk iba-kay. As tat-wǝr-tǝssoɣalaɣ illikan as a kay-iba, kay d aytedan-nak.»
8 As affaw iga-du Abumalǝk tanakra tǝnzayat, isassaɣra-du imaššaɣalan-net ig-as isalan kul. Tǝzzar ǝggaz-tan tasa zǝwwǝrat aytedan. 9 Iɣra-du Abumalǝk Ibrahim inn-as: «Ma dana-tǝge da? Ma dak-ǝɣšada as dana-tǝge, nak ǝd taɣmar-in, as dana-tǝtaggaɣ ǝssǝbab n igi n abakkad igân tǝzzǝwwǝrt a da? Ǝmazal wa di-tǝge da, wǝr itǝwǝggu! 10 Ma tǝnnǝye daɣ igi n ǝmazal a?» 11 Inn-as Ibrahim: «A ǝɣila wǝr t-illa i iksudan Mǝššina daɣ akal a da, ǝksudaɣ ad tǝwǝnɣa fǝl ǝddǝlil ǝn tǝntut-in. 12 Amaran tidǝt as tamadrayt-in a tǝmos, fǝlas nǝdraw abba, wǝr nǝdrew anna, ǝzlafaq-qat. 13 Assaɣa wa di-d-ikkas Mǝššina daɣ akal n abba-nin, ǝnneɣ i tǝntut-in: "Are daɣ-am as: Edag nosa tanna nak ǝmaqqar-nam a ǝmosa."»
14 Tǝzzar issoɣal Abumalǝk Sarata alǝs-net Ibrahim, ikf-ay deɣ ayfǝd ǝd wǝlli ǝd šitan d eklan ǝd taklaten. 15 Inn-as: «Akal-in ǝddi. Ǝɣsǝr daɣ-as daɣ adag wa ǝran man-nak.» 16 Amaran inna i Sarata: «Tǝhannaya! Ǝkfeɣ agim ǝn tafelt n ǝzrǝf amaqqar-nam: imos awen tǝgǝyya dat aytedan-nam kul n as wǝr tǝle lahan daɣ batu a.» 17,18 Isaggagra Mǝššina šidoden n ahan n Abumalǝk fǝl ǝddǝlil n awa igrawan Sarata. Onsay Ibrahim Mǝššina, iqbal tǝwatray-net, izzay Abumalǝk, ǝd tantut-net ǝd taklaten-net, okay-tanat albala wa n ǝggǝgru.