19
Ǝtǝwǝhlak ǝn Sǝdom ǝd Gamora
1 Amadal ǝn tǝdwit a din-osan angalosan win ǝššin Sǝdom. As itaggu awen Lot iqqim daɣ ǝmi n ǝɣrǝm. Da da ɣas a tan-ogga, a dasan-issǝlkad, issǝjad-asan. 2 Inn-asan: «Onsâyaq-qawan, mǝssawi, ad tǝmmǝram ehan-in, tǝšširǝdam idaran-nawan, tansim ɣur-i, tufat tǝnzǝyam, tǝggǝzam tarrayt-nawan.» Ǝnnan-as: «Kala kala! Edag wa n asammanay n aytedan daɣ ammas n ǝɣrǝm a daɣ za nansu.» 3 Mišan idgaz Lot wǝllen har ǝrdan s iki n ahan-net. Ig-asan imensewan, issǝŋŋ-asan tagǝlla, ǝtšan.
4 Harwa da wǝr ǝnsen as ǝɣalayɣalayan meddan kul ǝn Sǝdom ehan-net, a d-ibazan ɣur win madrornen har win ǝɣmaran. Wǝr din-iqqim waliyyan. 5 Ǝɣran Lot ǝnnan-as: «Ma ǝgan meddan win d-edwanen ehan-nak? Sǝqqǝb-anaq-qan-du a dǝr-san nagu ǝzzǝna.» 6 Iqqab-du Lot dat ahan ihar-t-idu dǝffǝr-ǝs. 7 Tǝzzar inn-asan: «Kala, kala, imidawan-in, ad wǝr tagim ark-ǝmazal di. 8 Ǝlêɣ šibararen sanatat wǝr nǝzday meddan, a dawan-tanat-akfa, tagim-asnat awa taram. Mišan meddan win inaftaɣan-in a ǝmosan, ǝhân taɣlift-in, a dasan-wǝr-tǝɣšǝdam arat.»
9 Ǝnnan-as «Ǝgmǝd adi! Kay imosan ǝɣǝrib, a iran ad tǝqqǝlaɣ ǝmašraɣ-nana? Adi a dak-nagu talbast togarat ta dasan-za-nagu!» Ǝbdaɣan-in Lot ǝs tǝɣurad ǝhozan-du imi n ahan y at t-arzin. 10 Tamazayt tenda a din-ǝbazan angalosan win ǝššin, Lot, ǝgan-t-id daɣ ammas n ahan tǝzzar ǝlasan-tu tǝmǝhirt. 11 Amaran meddan win ǝllanen dat ahan ǝɣradan-tan ǝsǝddǝrɣǝl, a d-ibazan ɣur win madrornen har win ǝɣmaran. Awa ǝgan daɣ taddarɣalt, ab-asan imi n ahan.
12,13 Ǝnnan angalosan win i Lot: «Kud aɣrǝm a ǝhan-tu aytedan-nak wiyyad tǝkkǝsaq-qan daɣ-as. A daɣ-as du-wǝr-aqqam waliyyan daɣ aytedan-nak, gǝr za bararan-nak, wala šibararen-nak, wala meddan-nasnat, fǝlas ahluk a tu-za-nagu. Awa sǝr-ǝs itawannin i labasan, amaran ewad-in Amaɣlol, issok-anaq-q-id a tu-nǝhlǝk.» 14 Lot deɣ ikka meddan ǝn tǝbararen-net, inn-asan: «Tarmad ǝgmǝdat aɣrǝm a fǝlas ahluk a tu-z-agu Amaɣlol.» Mišan wǝr ǝɣilan iglay daɣ awa inna den.
15 As d-iftaz azal, ǝdgazan angalosan Lot fǝl ad aglu. Ǝnnan-as: «Ǝbǝz tarrayt! Idaw ǝd taɣurǝk ǝd tǝbararen-nak a n sanatat, amǝr wǝr iga adi ad tammarsalam daɣ ǝhluk wa z'agu ǝɣrǝm fǝl ǝddǝlil ǝn talbast ta daɣ-as tǝtawamazalat.» 16 As ǝnayan angalosan win ǝššin a as Lot isimǝsǝndid, ǝbazan ifassan-net ǝnta ǝd taɣurǝs ǝd tǝbararen-net a n sanatat ǝkkasan-tan daɣ ǝɣrǝm, fǝlas Amaɣlol a ihanatten i Lot. 17 As tan-ǝkkasan daɣ ǝɣrǝm inna iyyan daɣ-san i Lot: «Daggag tǝgmǝdaɣ ǝd man-nak, a du-wǝr-tǝswǝda dǝffǝr-ǝk, wala tǝllule daɣ amadal a. Daggag s ǝdɣaɣ made tǝhlǝka.»
18 Inna Lot: «Kala, kala, Ǝmǝli-nin, ad wǝr tǝgmǝya daɣ ǝkli-nak adi! 19 Ǝssânaɣ as ǝgrawa ɣur-ǝk tǝla n udǝm, amaran tǝssiknaɣ-i ǝlluɣ-nak aggen s agadal wa di-tǝgeɣ ahluk. Dǝr iga adi da wǝr ǝfregaɣ azzal s ǝdɣaɣ en awǝdaq-qu wǝr di-ewed albas ihlǝk-i. 20 Tǝhannaya awen ǝn tǝɣrǝmt en? Tǝkna ihǝz, ǝfragaɣ a sǝr-ǝs azǝla. Taɣrǝmt ǝndǝrrat a tǝmos, ǝgmaya daɣ-ak a di-tayyaɣ a daɣ-as ǝlɣǝsa ǝgmǝdaɣ ǝd man-in.» 21 Inn-as: «Ǝnta ǝddi da. Taɣrǝmt tas tǝnneɣ ǝddi, wǝr tat-z-igrǝw wala. 22 Aglu tarmad, ǝlɣǝs, fǝlas wǝr z'antu ǝhluk iket wǝr teweda.» Tǝmmǝdrǝyt ǝn tǝɣrǝmt ta ǝnta a fǝl das-itawagga esǝm Sohar. 23 Tǝtagazzay tǝfuk as din-ewad Lot Sohar.
24 Amazay wen da a d-issofay Amaɣlol daɣ jǝnnawan adaɣas-ǝn-tahart ibilaglagan fǝl Sǝdom ǝd Gamora. 25 Issǝba tamayyamayt ǝn ɣǝrman win, d aytedan win tan-ǝzdaɣnen, ihlak deɣ aɣlal ketnet wa ǝhan d annabatan-net. 26 Tǝswad-in tǝntut ǝn Lot dǝffǝr-ǝs tǝqqal ǝwelwel n ǝsalǝɣ iɣtan.
27 As ǝzǝl wa hadan inzay Ibrahim s adag wa daɣ d-iqqal dǝffǝr Amaɣlol as dǝr-ǝs immǝgrad. 28 Iswad daɣ anamod ǝn Sǝdom ǝd Gamora d ǝɣlal kul, ogga ǝhu itagazzay ǝs jǝnnawan olâ awen d eqqad zǝwwǝran. 29 Mǝššina ikittǝw Ibrahim assaɣa wad ihlak iɣǝrman win tǝha tǝmǝxsurt ǝn Lot, d ǝɣlal wa ǝhan. Adi daɣ a fǝl iɣlas Lot daɣ ǝhluk.
Ǝnǝtti n Ǝzzurrǝyya ǝn Lot.
30 Iggǝlat Lot daɣ Sohar iɣsar daɣ ǝdɣaɣ, ǝnta ǝd tǝbararen-net, id fǝlas tǝh-ay tasa daɣ Sohar. Izdaɣ ǝɣǝɣi ǝnta ǝd tǝbararen-net a n sanatat. 31 Tǝnna tabarart-net ta waššarat i ta ǝndǝrrat: «Abba-nana i waššaran, amaran wǝr t-ǝllen meddan daɣ ǝhazi ǝngǝm akkin-ana-du ǝzlǝfan-ana nilu bararan. 32 Ǝndam ad nǝsǝmmǝswǝd abba-nana, a dǝr-ǝs nǝnǝmǝnsu fǝl a tu-nakfu ǝzzurrǝyya.» 33 Tǝzzar sammaswadnat abba-nasnat ahad wen da s aman n alɣanab ikkizaman, tǝnamansa dǝr-ǝs ta waššarat wǝrmad ila iggi y iguz wa fall-as in-tǝga, za wala agamad wa fall-as du-tǝga. 34 As ǝzǝl wa hadan tǝnna i tamadrayt-net: «Ǝndod nimansa d abba-nin, sǝmmǝswǝd-anaq-qu ahada da, tǝnǝmǝnsa dǝr-ǝs kam fǝl a tu-nakfu ǝzzurrǝyya.» 35 Ahad wǝdi ǝnta da sammaswadnat abba-nasnat tǝnamansa dǝr-ǝs ta ǝndarrat, wǝrmad ila iggi y iguz wa fall-as in-tǝga, za wala agamad wa fall-as du-tǝga. 36 Ǝmmǝk wa da as ǝganat tǝbararen ǝn Lot a n sanatat šidusen s ǝnǝmǝnsa wa ǝganat ǝd šissanat. 37 Ta waššarat tǝgraw barar tǝg-as esǝm Mowab (almaɣna igmad-du abba). Barar wa ǝnta a d-ǝgmadan Mowabitatan har win ǝmǝrǝdda. 38 Ta ǝndǝrrat ǝnta da tǝgraw barar tǝg-as esǝm Ben-Hammi (almaɣna ag ǝmaraw-nin). Barar wa, ǝnta a d-ǝgmadan Hamonitatan har win ǝmǝrǝdda.