18
Ǝtǝmǝl ǝn tǝhǝwt n Isǝhaq
1 Inafalal-du Amaɣlol y Ibrahim amazay a daɣ iqqim daɣ gǝrmuz n ahan-net ɣur tuksay n ǝzǝl, dagma n eškan zagrotnen n alǝs igan esǝm Mamre. 2 Idkal Ibrahim asawad-net ihin-in ogga karad meddan ǝbdâdan dat-ǝs daɣ ihǝz. Ozal-in ɣur ahan-net har tan-in-ewad, tǝzzar issǝjad-asan, 3 inna y iyyan daɣ-san: «Ǝmǝli-nin kud ǝgrâwa ɣur-ǝk udǝm ad wǝr tǝɣlǝyaɣ ehan n ǝkli-nak. 4 A dawan-d-ammawayan aman as tǝššoradam idaran-nawan, tassanfim daw ašǝk a, 5 awǝyaɣ-awan-du a tǝtšam ǝqqǝlnat-kawan-du tǝɣurad-nawan, amaran taglim daɣ tarrayt-nawan, fǝlas adi da a fǝl du-tǝmmaram akli-nawan.» Ǝnnan-as: «Ǝnta ǝddi da. Agu awas tǝnne!»
6 Iqqal Ibrahim ehan-net irrorad, inna i Sarata: «Tarmad, ǝdkǝl-du iyyat n ǝɣlal n agel-nam wa ofan taga šigǝlwen.» 7 Dǝffǝr awen ozal Ibrahim s aharay-net isannafran d ǝhǝri wa iddǝren, ikf-ay y iyyan daɣ maššaɣalan-net, ihaz daɣ amaknaw-net. 8 Idkal-du tawna d ǝx wa kafen d ǝhǝri wa itawasaŋŋan da, issǝns-en dat naftaɣan-net. Ad tattan, ibdâd ɣur-san Ibrahim daw ašǝk.
9 Tǝzzar ǝnnan-as: «Ma tǝga tamahharak-nak Sarata?» Inn-asan: «Tǝlla da, tǝha ammas n ahan.» 10 Inna iyyan daɣ-san: «Illikan as a kay-d-ǝqqǝla adan a da âẓnin, ǝddi da tamahharak-nak Sarata tǝla barar.»
Sarata ǝnta tǝlla dǝffǝr Ibrahim tǝssisam-asan daɣ gǝrmuz n ahan-net. 11 As itaggu awen, Ibrahim ǝd Sarata ǝgmadan-tan elan wǝllen, amaran Sarata tokây edag wa n tǝla n aratan. 12 Awen daɣ a fǝl tǝdza tǝnna daɣ man-net: «Ak nak ta tǝbbǝffet da, ǝmankay-nin deɣ ikna tušaray, adis tǝlkam daɣ-i ten da tǝfalawist?» 13 Inna Amaɣlol y Ibrahim: «Mas tǝdza Sarata, ad tǝgannu: "Immikkan ad ǝgrǝwa barar, nak igân tušaray a?" 14 Awak ill-ay arat imosan muxal fǝl Amaɣlol? A kay-d-asa daɣ tamert ta dak-ǝssǝbdada, ǝddi da Sarata tǝla barar.» 15 Tǝrmaɣ Sarata tǝga bahu tǝnna: «Kala wǝr ǝdze.» Mišan inn-as Amaɣlol: «Bahu-nam, tǝdzê!»
Šiwatriwen n Ibrahim i Sǝdom
16 Ǝggazan meddan tarrayt, ǝgan anamod n ǝɣrǝm ǝn Sǝdom har t-oggan, intâk-kan Ibrahim. 17 Inna Amaɣlol: «Awak, ad ǝɣbǝra y Ibrahim awa z'aga da? 18 Illikan as Ibrahim ad iqqǝl ǝmaraw ǝn tamattay tǝknât igǝt, tǝknâ assahat, amaran a sǝr-ǝs ǝgrǝwnat tǝmattiwen n ǝddǝnet kul albaraka. 19 Ǝnta a sannafrana y ad amǝr ǝzzurrǝyya-net s a di-abbardagan, ad tamazalan s awa oɣadan, ǝlkaman y ǝššǝriɣa-nin. Ǝddi a das-z-assandaɣ arkawal-in, nak Amaɣlol.»
20 Inna Amaɣlol y Ibrahim: «Awa itawannin ǝs Sǝdom ǝd Gamora i labasan, ibakkadan-nasan i zawwarnen. 21 A tan-asaɣ, ǝnǝyaɣ awa sǝr-san itawannin, ǝssǝna kud aššar wa sǝr-san itatamalan tidǝt daɣ a imos wala.» 22 Den da ad matakwayan ǝššin daɣ naftaɣan, ǝgan anamod ǝn Sǝdom, as iga awen Amaɣlol ǝnta harwada illa ɣur Ibrahim.
23 Ihoz-t-id Ibrahim, inn-as: «Ǝmǝli, awak ad tǝssǝrtǝyaɣ aytedan win alɣadilan, ǝd win tan-wǝr-nǝmos tǝhlǝkaq-qan? 24 Mijas aɣrǝm en ǝhanat-tu sǝmmosat tǝmǝrwen n alɣadil, awak a tan-tǝhlǝka? Awak wǝr za tǝssurǝfa y ǝɣrǝm en fǝl ǝddǝlil ǝn sǝmmosat tǝmǝrwen n alɣadil as iqqal as t-ǝhânat? 25 Kala kala wǝr t-illa ǝmmǝk as za tagaɣ wǝdi daɣ ǝmazal a t-imosan: ǝsǝrtǝy n aytedan ǝɣdalnen ǝd win aššarnen tǝšǝššilaq-qan s ǝhluk. Tǝnimaggaga d ǝmazal di! Awak Ǝmašraɣ n ǝddǝnet ad agu ǝmazal wǝr noɣed?» 26 Inn-as Amaɣlol: «As iqqal as aɣrǝm ǝn Sǝdom ǝhanat-tu sǝmmosat tǝmǝrwen n alɣadil, a das-ǝssurǝfa ketnet fǝl ǝddǝlil-nasan.» 27 Ilas Ibrahim inn-as: «Ǝmǝli-nin, nak da ihalan a sǝr-ǝk ǝlǝsaɣ awal da, ǝnta nak wǝr ǝmosa ar ǝgodrar d eẓǝd. 28 Kud z'iqqǝddar as alɣadilan win ǝhanen aɣrǝm en, ab-asan-in sǝmmos y ad awǝdan sǝmmosat tǝmǝrwen? Awak ad tǝhlǝkaɣ aɣrǝm wen azzamas ab-in sǝmmos alɣadilan win?» Inn-as Amaɣlol: «As iqqal as ǝhanat-tu ǝkkozat tǝmǝrwen n alɣadil ǝd sǝmmos, wǝr tu-z-ǝhlǝka.» 29 Ilas Ibrahim inna: «Mijas tu-wǝr-iha ar ǝkkozat tǝmǝrwen n alɣadil!» Inn-as Amaɣlol: «As iqqal as ǝhanat-tu ǝkkozat tǝmǝrwen n alɣadil, wǝr tu-z-ǝhlǝka.» 30 Ilas Ibrahim inna: «Ǝmǝli-nin a kay-wǝr-iggǝz alham n ǝkli-nak, fǝlas a dak-ǝlǝsaɣ awal! Aɣrǝm en mijas tu-wǝr-iha ar karadat tǝmǝrwen n alɣadil.» Inn-as Amaɣlol: «As iqqal as ǝhanat-tu karadat tǝmǝrwen n alɣadil, wǝr tu-z-ǝhlǝka.» 31 Inna Ibrahim: «Ǝmǝli-nin, surǝf-i taholat-in a sǝr-ǝk ǝlǝsaɣ awal. Aɣrǝm en mijas tu-wǝr-iha ar sanatat tǝmǝrwen n alɣadil!» Inn-as Amaɣlol: «As t-ǝhanat sanatat tǝmǝrwen n alɣadil, wǝr tu-z-ǝhlǝka.» 32 Ilas Ibrahim: «Ǝmǝli-nin a kay wǝr iggǝz alham n ad agu ǝkli-nak batu-net ta tǝlkamat! Aɣrǝm en mijas tu-wǝr-iha ar maraw alɣadilan.» Inn-as Amaɣlol: «As t-ǝhan maraw alɣadilan wǝr tu-z-ǝhlǝka.» 33 As iɣrad Amaɣlol amagrad d Ibrahim, igla, Ibrahim da iqqal-du aɣaywan-net.