17
Asannal ǝn tassaq n Amaɣlol d Ibrahim
1 As iga Abram tazayat tǝmǝrwen n awatay ǝd taza daɣ ǝddǝnet inafalal-as-du Amaɣlol, inn-as: «Nak Mǝššina Di Maqqaran: Sǝwǝl tarrayt-in ad tǝtagga faw awa oɣadan. 2 Ad agaɣ arkawal ǝn tassaq-in dǝr-ǝk, akfaq-qay ǝzzurrǝyya iknân igǝt.» 3 Issǝjad Abram, ilas Mǝššina iššewal inna: 4 «Arkawal ǝn tassaq-in dǝr-ǝk imos-tu as: ad tǝqqǝlaɣ ǝmaraw ǝn tǝmattiwen ǝknânen igǝt, 5 wǝr za tǝlǝsa ǝtǝwǝɣra s Abram, esǝm-nak ad iqqǝl Ibrahim fǝlas ǝmaraw ǝn tǝmattiwen ǝknânen igǝt a kay-z-aga. 6 A kay-akfaɣ ǝzzurrǝyya iknan igǝt, aginat daɣ-ak tawšeten a daɣ z'agin mǝnokalan.
7 A dak-ǝttǝfaɣ arkawal iɣlâlan ǝn tassaq-in, ǝttǝfaq-qu y ǝzzurrǝyya-nak har hayawan ǝs hayawan dǝffǝr-ǝk, fǝl ad ǝqqǝla Ǝmǝli-nak kay d ǝzzurrǝyya-nak. 8 A kay-akfa kay d ǝzzurrǝyya-nak akal wa daɣ tǝnnǝftaɣa, a t-imosan akal kul wa n Kanan. Akal wa ad iggǝz tǝla n ǝzzurrǝyya-nak har faw, ǝqqǝla Ǝmǝli-nasan.»
9 Inna Mǝššina y Ibrahim: «Ǝmǝrǝdda, kay d ǝzzurrǝyya-nak har hayawan ǝs hayawan ad tǝttǝfam arkawal ǝn tassaq-in dǝr-wan. 10 Ǝnta da tǝmǝwit tas za tǝttǝfaɣ arkawal ǝn tassaq-in dǝr-wan, kay d ǝzzurrǝyya-nak: I daɣ-wan imosan yay kul ad ammankad. 11 Imos ǝmǝnkǝd en asannal n arkawal ǝn tassaq-in dǝr-wan. 12 As daɣ-wan iga barar wa n yay ǝttam adan ǝd tǝhǝwt tǝsǝmmǝnkǝdam-tu gǝr za daɣ azzaman win, wala win dǝffǝr-san. Ad tǝsamankadam deɣ bararan n eklan gǝr za win ǝhunen daɣ nan-nawan wala win du-tǝzzǝnzam. 13 Daɣ adi ǝššil eklan-nawan kul ad ammankadan gǝr win ǝhunen daɣ nan-nawan wala win d-ǝnzanen. Ǝmmǝk en daɣ as ilmawan-nawan, a tan-iggǝz asannal n arkawal iɣlâlan ǝn tassaq-in dǝr-wan. 14 Yay kul wa wǝr nǝmmǝnkad ad itǝwǝkkǝs daɣ aytedan-net fǝlas arkawal ǝn tassaq-in a iɣtas.»
15 Inna Mǝššina y Ibrahim: «Tantut-nak a tat-wǝr-tǝlǝsa teɣaray ǝs Saray, esǝm-net ad iqqǝl Sarata. 16 A daɣ-as agaɣ albaraka, akfaq-qay dǝr-ǝs barar. A daɣ-as agaɣ albaraka fǝl a daɣ-as-aginat tawšeten šiyyad n ǝddǝnet a du-z-ǝgmǝdan mǝnokalan.» 17 Ilas Ibrahim ǝsǝjǝd. As isammadran daɣ awen idza, inna daɣ man-net: «Manǝmmǝk as z'ileɣ barar, nak igan temeday n awatay? Sarata deɣ tǝgat tazayat tǝmǝrwen n awatay, manǝmmǝk as za tilu barar?» 18 Tǝzzar inna Ibrahim i Mǝššina: «Igd-i ad iddâr Ismaɣil, tǝssâna daɣ-as.» 19 Inn-as Mǝššina: «Kala kala, tantut-nak Sarata a za tǝgrǝwat barar as za tagaɣ esǝm Isǝhaq. A das-ǝttǝfaɣ arkawal iɣlâlan ǝn tassaq-in dǝr-ǝs ǝnta d ǝzzurrǝyya-net. 20 Amaran Ismaɣil ǝqbâla mansay-nak y-as: a daɣ-as aga albaraka, ǝssǝgǝtaɣ awa t-id-igmadan, agaq-qu a wǝr nǝla ǝket. A t-id-ǝgmǝdan maraw mǝnokalan d ǝššin, agaq-qu ǝmaraw ǝn tawšet tǝknât igǝt. 21 Mišan arkawal ǝn tassaq-in ǝttafaq-qu y Isǝhaq a za tǝgrǝwaɣ ǝd Sarata azzaman a da âẓnin.» 22 As iɣrad Mǝššina awal y Ibrahim, iggaz-as ǝtǝnkul.
23 Inkar Ibrahim s Ismaɣil d eklan-net kul win ɣur-ǝs ǝhunen ǝd win d-izzǝnza, xasil yayyan n ahan-net kul, isammankad-tan ǝzǝl wen da, s ǝmmǝk was t-omar Mǝššina. 24-25 Ibrahim tazayat tǝmǝrwen n awatay-net ǝd taza daɣ ǝddǝnet, barar-net Ismaɣil imos aw maraw elan ǝd karad, as ǝmmǝnkadan. 26-27 Immǝnkad Ibrahim d Ismaɣil ǝzǝl wen da ǝntanay ǝd yayyan kul n aɣaywan n Ibrahim, gǝr za eklan-net win ɣur-ǝs ǝhunen wala win d-izzǝnza daɣ tǝsǝdag.