16
Tǝhǝwt n Ismaɣil
1 Saray wǝr tǝla d Abram a imosan barar. Amaran tǝla taklit tǝmosat wǝlǝt Masar tǝgât esǝm Hajara. 2 Tǝnna Saray y Abram: «Azzama Amaɣlol igdal-i tǝla ǝn barar wǝdi agu taklit-in daɣ ahan, mijas a sǝr-ǝs ǝgrǝwa barar.» Irda Abram ǝs tanat ǝn Saray. 3 Tǝnkar Saray ǝs taklit-net Hajara ta n wǝlǝt Masar, tǝkf-et y alǝs-net Abram, ig-et daɣ ahan, itag awen dǝffǝr as ǝgân maraw elan daɣ akal ǝn Kanan.
4 Iga Abram Hajara daɣ ahan, tǝga tadist. As tǝssan as tǝga tadist ab'as tǝssǝfrar massas. 5 Tǝzzar tǝnna Saray y Abram: «Kay a fǝl z'iqqǝl iba ǝn tidǝt wa di-itawaggan da! Nak iman-in as ǝgeɣ taklit-in gǝr fassan-nak, amaran ǝmǝrǝdda ad tǝga tadist ab'as di-tǝssǝfrar. Amaɣlol ya tǝssikna daɣ-na wa wǝr nǝga tidǝt, nak dǝr-ǝk!» 6 Inna Abram i Saray: «Taklit-nam tǝlla gǝr fassan-nam, ag-as arat was ɣur-ǝm iga as olâɣ.» Tǝzzar tǝga Saray i Hajara tarnǝttuft, tas har fall-as tǝddǝggag. 7 Inafalal-as Angalos n Amaɣlol, tǝlla dagma ǝn šat n aman iyyat daɣ taneray, daɣ tarrayt n ǝɣrǝm ǝn Šur. 8 Inn-as: «Hajara, taklit ǝn Saray mǝnis du-tǝhe? Mǝnis tǝdaga?» Tǝnn-as: «Ǝdǝggǝg a ǝgeɣ fǝl massi, Saray.» 9 Inn-as Angalos n Amaɣlol: «Ǝqqǝl massam tabbardagaɣ-as.» 10 Inn-as deɣ: «Ad ǝssǝgǝtaɣ ǝzzurrǝyya-nam wǝllen har as wǝr z'itǝwǝfrǝg ǝšidǝn-net fǝl igǝt.» 11 Ilas Angalos n Ǝmǝli inn-as:
«Kam da tǝgat tadist da,
ad tǝgrǝwa barar
tagaɣ-as esǝm Ismaɣil (almaɣna, Mǝššina isla)
Ad azzangat aytedan kul,
ǝntanay da azzangen-tu,
iwǝr aganna daɣ mǝdrayan-net kul.»
13 Tǝga y Amaɣlol a das-iššewalan da s esǝm Atta-El-Roy, (almaɣna: tǝmosa Mǝššina di-ihannayan), fǝlas a tǝnna: «Awak wǝrge da da ad ǝnaya wa di-ihannayan?» 14 Adi da a fǝl itawagga y anu wen esǝm Ber-Laxay-Roy (almaɣna: anu ǝn wa iddaran di-ihannayan), anu wa illa gǝr Kadeš ǝd Bered.