15
Arkawal ǝn tassaq n Abram d Ǝmǝli
1 Dǝffǝr adi iššewal Amaɣlol y Abram daɣ targǝt, inn-as: «Abram a kay wǝr tǝggǝz tasa! Nak a imosan aɣǝr-nak amaran alak-nak ad igat wǝllen.» 2,3 Inn-as Abram: «Amaɣlol Ǝmǝli-nin, ma di-za-takfa? Nak wǝrge barar a ǝle ǝngǝm ikkusǝt-i. Wǝr di-tǝkfeɣ ǝzzurrǝyya. Akli-nin wa n asahaw a t-imosan Elǝyezer wa n Damas, a di-z-ikkusen.» 4 Inn-as Amaɣlol: «Wǝrge ǝnta a z'iqqǝlan amakkasu-nak, kalar barar ǝn tadist-nak a tu-z-iqqǝlan.» 5 Issǝrdaq-q-idu ehan, inn-as: «Ǝswǝd daɣ jǝnnawan tǝssǝna tǝfrâgaɣ ǝšidǝn n etran. Ǝntanay za a dǝr z'agdu ǝzzurrǝyya-nak.»
6 Izzǝgzan Abram y Amaɣlol, awen daɣ a fǝl t-ikfa tišit n alɣadil.
7 Inn-as: «Nak Amaɣlol, a kay d-ikkasan daɣ ǝɣrǝm n Ur wa n Kasdaytan fǝl a kay-akfa akal a tileq-qu.» 8 Inn-as Abram: «Amaɣlol Ǝmǝli-nin, mǝni awas z'ǝssǝnaɣ as ad iggǝz akal a tǝla-nin?» 9 Inn-as Amaɣlol: «Awǝy-du taɣit ǝn wǝlǝt karad elan, ǝd taɣat ǝn wǝlǝt karad elan, d akar n aw karad elan, ǝd tǝdabert n ǝsuf d ǝsoggad ǝn dǝbran win ǝɣrǝm.» 10 Tǝzzar eway-tan-du, igzam-tan, a tan-izamazzay daɣ ammas sas tǝzzǝgrǝt-nasan, akk ǝmudar isinamaswad izrutan-net, amaran igǝdad oyy-en da wǝr tan-iga izrutan. 11 Ad ǝġġaran nollaman isan en isattaq-qan Abram. 12 As tuda tǝfuk ibaz etǝs zǝwwǝran Abram, inay šiyyay labasnen a daɣ-as ǝganen tasa. 13 Inn-as Amaɣlol: «Ǝssǝn as ǝzzurrǝyya-nak ad anaftaɣ daɣ akal iyyan, iggǝz tǝla ad itawasaknu arkanay har agu ǝkkozat tǝmad n awatay. 14 Mišan nak ad ǝšrǝɣa tamattay ta tan-tǝgat eklan ǝgmǝdan-du akal wen, ǝdbâlan tǝgǝrgist tagget. 15 Kay a kay iba daɣ alxer tǝtǝwǝmuzǝlaɣ-in dǝffǝr as tǝgeɣ tušaray a daɣ tǝssidaya. 16 Amaran daɣ ǝzzurrǝyya-nak, ihayawan-nak win ǝkkoz a du-z-ǝqqǝlnen akal wa kay ǝkfe da, fǝlas tallabǝst n arak mazalan n Amoritatan harwada wǝr tewed da du-tǝraz, ǝngǝm tǝwǝwǝddǝban.»
17 As tuda tǝfuk ǝknanat šiyyay igi. Wala a ihogan nafalalnat tǝmakaten mihandarnen a daɣ tǝga tǝrorat n ǝhu, d abalagleg, ǝllaman gǝr dǝgran ǝn ṣan win izun Abram da. 18 Ǝzǝl wen da ad iga Amaɣlol arkawal ǝn tassaq-net d Abram inn-as: «Ǝkfeɣ akal a y ǝzzurrǝyya-nak a d-obazan ɣur agaraw wa n Masar har wa zǝwwǝran igân esǝm Efrat. 19 Akal wa imos in Qenitatan, ǝd Qenizitatan ǝd Qadmonitatan, 20 ǝd Xitatan ǝd Ferizitatan, ǝd Rafayitatan, 21 d Amoritatan, ǝd Kananitatan, ǝd Girgašitatan, ǝd Yebusatan.»