14
Ǝsǝfsi wa iga Abram Lot
1 Daɣ azzaman n Amrafel wa n ǝttǝbǝl ǝn Šinar d Aryok wa n Ellasar ǝd Kǝdorlahomer wa n Elam ǝd Tidal wa n Goyim, 2 iga ǝmǝgǝr gǝr ǝkkoz ǝttǝbǝlan win ǝd sǝmmos mǝnokalan ǝmosnen Bera wa n Sǝdom ǝd Birša wa n Gamora ǝd Šinab wa n Adma ǝd Šemeber wa n Sǝboyim d ǝmǝnokal wa n ǝɣrǝm ǝn Bela. Aɣrǝm wa itawann-as deɣ Sohar. 3 Imǝnokalan win ǝgan eɣaf iyyanda, ǝmmǝnayan daɣ aɣlal ǝn Siddim s ǝnta a imosan azalada Agarew n Ǝsalǝɣ, ǝqqalan egan iyyanda. 4 Maraw elan d ǝššin a ǝgan azzar-asan ǝttǝbǝl Kǝdorlahomer. As awatay wa n maraw ǝd karad ǝffǝllagan fall-as.
5 Daɣ awatay wa n maraw d ǝkkoz irza Kǝdorlahomer d ǝttǝbǝlan win dǝr-ǝs ǝddewnen Rafayitatan daɣ ǝɣrǝm wa n Aštǝrot-Karnayim, ǝrzan Zuzitatan daɣ ǝɣrǝm wa n Ham ǝrzan Emitatan daɣ azawaɣ wa n Kirǝyatayim. 6 Ǝrzan Xoritatan daɣ akal-nasan, imosan idɣaɣan a n Sehir. Ǝssǝglan daɣ-san terazay har osan aɣrǝm wa n El-Faran illân dǝgma ǝn taneray. 7 Dǝffǝr adi ǝqqalan-du har d-osan aɣrǝm wa n En-Mišfat was itawannu ǝmǝrǝdda Kadeš. Ǝrzan akal kul wa n Amalekitatan ǝrzan deɣ Amoritatan win ǝɣsarnen daɣ ǝɣrǝm ǝn Xassǝson-Tamar.
8 Tǝzzar ǝgmadan-du mǝnokalan ǝmosnen wa n ǝɣrǝm ǝn Sǝdom ǝd wa n Gamora ǝd wa n Adma ǝd wa n Tǝsǝboyim ǝd wa n Bela (was itawannu Sohar). Ǝgan mǝnokalan win eɣaf iyyanda ǝmmǝgaran daɣ ǝɣlal ǝn Siddim 9 d ǝttǝbǝlan ǝmosnen Kǝdorlahomer wa n Elam, ǝd Tidal wa n Goyim, ǝd Amrafel wa n Šinar d Aryok wa n Ellasar. Ǝkkoz ǝttǝbǝlan win ǝmmǝgaran ǝd sǝmmos mǝnokalan. 10 Aɣlal ǝn Siddim idkâr enwan aggotnen a daɣ d-itawaɣaz madɣar ǝn kolta. As irrǝz ǝmǝnokal wa n Sǝdom ǝd wa n Gamora ǝlɣasan daɣ enwan win, awa hadan iwazawaz ilɣas daɣ ǝdɣaɣan. 11 As ǝrzan ǝttǝbǝlan win imǝnokalan win di, oɣan awa ihan Sǝdom kul ǝd Gamora, ǝglan deɣ d awa tan-ihan daɣ sudar. 12 Lot ag amadray n Abram, iɣsâran Sǝdom, ǝnta da oɣan-tu ǝglan dǝr-ǝs ǝnta ǝd tǝla-net.
13 Osa-du iyyan daɣ mǝrrǝza Abram wa n iyyan daɣ Ɣibritan imal-as-tu. Azzaman win di Abram iɣsâr dagma n eškan zagrotnen n iyyan daɣ Amoritatan igan esǝm Mamre imosan amadray n Eškol, imos deɣ amadray n Aner. Meddan win ketnasan ǝdhalan Abram. 14 As igraw Abram isalan n ǝtǝrmǝs ǝn rures n amadray-net isammatag-du karadat tǝmad n alǝs ǝd maraw d ǝttam win d-ǝnnǝfrannen, ǝhunen daɣ aɣaywan-net, tǝzzar ilkam y ǝttǝbǝlan win oɣanen Sǝdom ǝd Gamora. Iggaz ǝdǝriz-nasan sa sǝr tamasna har ǝɣrǝm ǝn Dan. 15 Den da ad iga egan-net tǝzunen, ǝdalan-tan. Irz-en istaq-qan har aɣrǝm ǝn Xoba ihân tamasna ǝn wa n Damas. 16 Ibaz-du daɣ-san awa oɣan kul iqqal-du ǝd Lot, ag amadray-net ǝnta d awa ila, ǝd tǝdoden ǝd kefǝlan win hadatnen.
Ǝmǝnǝy n Abram ǝd Malik-Assaddeq.
17 As d-iqqal Abram irzâ-du Kǝdorlahomer ǝd madahalan-net, ǝmosnen ǝttǝbǝlan win dǝr iddew, igmad-du ǝmǝnokal ǝn Sǝdom issǝlkad-as-in daɣ ǝɣlal ǝn Šafe as itawannu aɣlal n Ǝmǝnokal. 18 Eway-du Malik-Assaddeq wa n ǝmǝnokal ǝn Šalem tagǝlla d esmad n alɣanab y Abram. Malik-Assaddeq ǝlimam a imos ǝn Mǝššina di n Amadkol, 19 ittar y Abram a das-igan albaraka, inna:
«Ya Abram!
Ǝgmaya daɣ Mǝššina n Amadkol,
s ǝnta a d-ixlakan ijǝnnawan d amadal,
a kay-isassarnan izǝnga-nak.»
Tǝzzar ikfa Abram Malik-Assaddeq tǝzunt ta n marawat n awa d-oɣa kul. 21 Inna ǝmǝnokal ǝn Sǝdom y Abram: «Suɣǝl-i-du aytedan-in tǝttafaɣ-in ǝrrǝzǝɣan.» 22 Inn-as Abram: «Ǝhâda s Amaɣlol, Mǝššina di n Amadkol, s ǝnta a imosan ǝmaxlak ǝn jǝnnawan d amadal 23 as wǝr daɣ-ak z'ǝdkǝlaɣ wala tenallay za wala ǝzzǝmi ǝn ɣateman fǝl ad wǝr tanna: "Nak a daɣ iggǝrgas Abram." 24 Arat wa ǝtšan meddan-in ɣas as ǝrdeɣ as ǝgmada dǝr-ǝs. Amaran meddan win di-ǝdhalnen, ǝmosnen: Aner d Eškol, ǝd Mamre, ǝntanay ǝgrǝwanet adagar-nasan.»