Tǝsǝntit 13

Ǝmǝzzǝy n Abram ǝd Lot

¹ Adi da fǝl igmad Abram Masar, innǝmad teneray ta n Negab, ǝnta ǝd tǝntut-net d awa ila kul, iddew dǝr-ǝs Lot. ² Abram ikna tǝgǝrgist, tǝgât daɣ hǝrwan d ǝzrǝf d urǝɣ. ³ Inkar Abram ad itagalat gǝr Negab d ǝɣrǝm wa n Betel, har osa edag wa daɣ izzǝbbat dat awen, gǝr Betel d Ay, ⁴ edag wa ǝnta a daɣ ikras edag ǝn tǝkutawen dat awen y Amaɣlol, iɣbad-tu.

⁵ Lot a dǝr-ǝs iddewan, ǝnta da ila eharay wa ǝndǝrran ǝd wa zǝwwǝran, imos aɣaywan aggen. ⁶ Awa ǝgan hǝrwan-nasan daɣ igǝt ab'as tan-eway akal, izzǝwat-asan aharog. ⁷ A tu-tǝmmal tamazaq gǝr madanan n Abram ǝd win Lot. As itaggu awen Kananitatan ǝd Fǝrizitatan ǝntanay da ǝɣsâran daɣ akal wen. ⁸ Inna Abram i Lot: «A tu-wǝr-tǝmǝl tamazaq gǝr-i dǝr-ǝk wala gǝr madanan-in ǝd win-nak fǝlas imǝdrayan a nǝmos. ⁹ Akal ketnet illa dat-ǝk, daɣ adi nammazzayet. As tǝtrama nak ad addannaga, as tǝdǝnnaga nak ad ǝtrǝma.» ¹⁰ Idkal Lot asawad-net inay as amadal n agarew wa n Yordan ketnet har ǝɣrǝm ǝn Sohar, ola d aljannat madeɣ aɣlal n agarew wa n Ǝnnil. As itaggu awen harwada wǝr ihlek Amaɣlol aɣrǝm ǝn Sǝdom ǝd wa n Gamora. ¹¹ Isannafran Lot azawaɣ kul wa n Yordan, iggǝlat iddǝnnag. Esaway wa da as ǝmmǝzzayan mǝdrayan win. ¹² Abram iɣsar daɣ akal wa n Kanan. Lot amaran iɣsar daɣ ɣǝlǝyɣǝlayan ǝn ɣǝrman n azawaɣ wa n Yordan. Ibaz aɣaywan-net den da har ǝɣrǝm ǝn Sǝdom. ¹³ Kǝl-Sǝdom ark aytedan a mosan ǝn nasbakkadan labasnen dat Amaɣlol.

¹⁴ Inna Amaɣlol y Abram, dǝffǝr as immizzay ǝd Lot: «Ǝdkǝl asawad-nak tǝswǝda daɣ tamasna d agala ǝd dǝnnǝg d ataram. ¹⁵ Akal kul wa tǝhannaya da a dak-k-akfa kay d ǝzzurrǝyya-nak har faw. ¹⁶ Ad agaɣ ǝzzurrǝyya-nak šilat ǝn tǝblalen n amadal fǝl igǝt. Wǝr t-illa i ifragan ǝšidǝn ǝn tǝblalen n amadal, ǝmmǝk en daɣ as wǝr t-illa i z'ifrǝgan ǝšidǝn n ǝzzurrǝyya-nak. ¹⁷ Ǝbdǝd awǝy d akal sas ilwi-net ǝd tǝzzǝgrǝt-net fǝlas tehakkay a dak-ku-z-aga.» ¹⁸ Iggǝlat Abram ikras ihǝktan-net dagma n eškan zagrotnen n alǝs igan esǝm Mamre dagma n ǝɣrǝm wa n Xebron. Iɣsar den da. Ikras edag ǝn tǝkutawen y Amaɣlol.