12
Assa n Abram akal wa n Kanan
1 Inna Amaɣlol y Abram: «Ǝgmǝd akal-nak tǝfǝla imarwan-nak d aɣaywan n abba-nak takka akal wa kay z'assakna. 2 A daɣ-ak aga tamattay tagget, aga daɣ-ak albaraka, ǝzzǝzwǝra esǝm-nak, ǝgrǝwan sǝr-ǝk aytedan albaraka. 3 Ad agaɣ albaraka daɣ win dak-k-ǝranen, ǝlɣǝna win kay-ǝlɣannen; ǝgrǝwnat tawšeten kul n ǝddǝnet albaraka s ǝssǝbab-nak.»
4 Igla Abram iga awa das-inna Amaɣlol. Iddew dǝr-ǝs Lot. Abram igâ ǝssayat tǝmǝrwen n awatay ǝd sǝmmos daɣ ǝddǝnet as igmad Xaran. 5 Iddew Abram ǝd tǝntut-net Saray ǝd Lot imosan rures n amadray-net, ǝglan ǝd tǝla-nasan kul harkid eklan win ǝggaznen tǝla-nasan daɣ Xaran. Ǝglan ǝkkan akal ǝn Kanan. As t-in-osan, 6 ad itagalat Abram daɣ akal har d-osa aɣrǝm as itawannu Šǝkem, izzǝbbat daɣ adag iha ašǝk zagren as itawannu wa n More a daw tawasasaɣrin ǝddinan. Azzaman win den ǝxsaran Kananitatan daɣ amadal wen. 7 Inafalal Amaɣlol y Abram inn-as: «Akal wa at t-akfa y ǝzzurrǝyya-nak.» Tǝzzar ikras Abram daɣ adag en edag ǝn tǝkutawen y Amaɣlol a das-inafalalan den. 8 Dǝffǝr adi iggǝlat s akal n ǝdɣaɣan iddinnagan y ǝɣrǝm wa n Betel. Izzǝbbat gǝr Betel d ǝɣrǝm wa n Ay. Itram-as Betel, iddinnag-as Ay. Tǝzzar ikras edag ǝn tǝkutawen y Amaɣlol, iɣbad-tu. 9 Igla Abram itagalat sa sǝr agala, innimad teneray ta n Negab.
Iguz n Abram Masar
10 Iga laz daɣ akal ǝn Kanan. As idgaz laz ikka Abram Masar a daɣ-as din-agu tamert. 11 As ibuk Abram y iguz ǝn Masar inna i tǝntut-net Saray: «Kam tantut tǝhossayat a tǝmosa, 12 as kam-ǝnayan Kǝl-Masar ǝnnan taɣuri a tǝmosa, ad agin iman-in. 13 Daɣ adi ǝgmaya daɣ-am ad tanna tamadrayt-in a tǝmosa, fǝl ad afsa fǝl ǝddǝlil-nam tǝwǝsǝɣmǝra.» 14 As din-osa Abram Masar ǝnayan Kǝl-Masar tantut-net tǝkna šihussay. 15 Ǝnayan-tat mizwaran ǝn Firɣawna, a das-tat-ǝmmalan. Tǝzzar tǝmmeway-du tǝntut s aɣaywan ǝn Firɣawna. 16 Amaran Abram ǝnta ig-as Firɣawna iduf olâɣan fǝl ǝddǝlil ǝn Saray. Igraw Abram eharay wa ǝndǝrran ǝd šitan, d ǝzdan, d eklan, ǝd mǝnas. 17 Mišan izazzabbat-du Amaɣlol fǝl Firɣawna d aɣaywan-net tǝkmawen labasnen fǝl ǝddǝlil ǝn tǝntut n Abram Saray. 18 Tǝzzar isassaɣra-du Firɣawna Abram inn-as: «Ma di-tǝge da? Ma fǝl di-wǝr-tǝmela as tantut-nak awa? 19 Mas di-tǝnne tamadrayt-nak a tǝmos, har tat-ǝgeɣ daɣ ahan? Ǝmǝrǝdda tantut-nak da idaw dǝr-ǝs tugagaɣ-i.» 20 Inna Firɣawna y aytedan-net ad idawan d Abram har t-ǝkkǝsan daɣ akal-net, ǝnta ǝd tǝntut-net d awa ila kul.