11
Aɣrǝm wa n Babel
1 Azzaman en awal iyyanda a itawašawalan daɣ ǝddǝnet ketnet. 2 Ǝmalan-tu aytedan tagalatnen a d-ǝhânen sas dǝnnǝg. Ǝgrawan azawaɣ iyyan daɣ amadal ǝn Šinar, ǝɣsaran daɣ-as. 3 Namannan gar-essan: «Ǝndawat, ad nagu bargitan, nassaŋŋ-en.» Ǝkrasan sǝr-san daɣ adag ǝn tǝhun, sannamadɣaran-tan ǝs kolta. 4 Tǝzzar ǝnnan: «Ǝndawat, ǝkrǝsatanaɣ aɣrǝm d ogga a d-isakaradan ijǝnnawan, ilatanaɣ esǝm ad wǝr nǝwǝziwǝz fǝl tasayt n amadal.»
5 Izzǝbbad-du Amaɣlol y ad inǝy aɣrǝm d ogga win karrasan maddanǝs n Adǝm. 6 Tǝzzar inna Amaɣlol: «Ǝntanay da ǝqqalnen da tamattay iyyadda, ǝššewalan awal iyyanda. Kud awa da as ǝssǝntan wǝdi ilkam as wǝr t-illa a dǝr z'ǝgmǝyan arn-asan. 7 Daɣ adi zabbatatana, ad nǝsǝnnǝffǝy awal-nasan fǝl ad ibas tinǝmǝsǝsǝgrin gar-essan.» 8 Den da a tan-izawwazawaz Amaɣlol fǝl tasayt n amadal kul, tǝzzar ǝmmǝzzayan d akaras n ǝɣrǝm. 9 Adi da fǝl iga ǝɣrǝm en esǝm Babel fǝlas den da ad isannaffay Amaɣlol awal ǝn maddanǝs n Adǝm, amaran den da a tan-izawwazawaz fǝl tasayt n amadal.
Ǝzzurrǝyya ǝn Šem
10 Ǝnta da ǝzzurrǝyya ǝn Šem: Šem temeday n awatay-net daɣ ǝddǝnet as eraw Arfakšad, imos awen ǝššin elan dǝffǝr ǝlwabil. 11 Iga Šem sǝmmosat tǝmad n awatay dǝffǝr tǝhǝwt n Arfakšad, itilu bararan ǝd tǝbararen.
12 Arfakšad as iga karadat tǝmǝrwen n awatay ǝd sǝmmos eraw Šela. 13 Iga Arfakšad ǝkkozat tǝmad n awatay ǝd karad dǝffǝr tǝhǝwt ǝn Šela, itilu bararan ǝd tǝbararen.
14 Šela karadat tǝmǝrwen n awatay-net daɣ ǝddǝnet as eraw Eber. 15 Iga Šela ǝkkozat tǝmad n awatay ǝd karad dǝffǝr tǝhǝwt n Eber, itilu bararan ǝd tǝbararen.
16 As iga Eber karadat tǝmǝrwen n awatay d ǝkkoz daɣ ǝddǝnet eraw Feleg. 17 Iga Eber ǝkkozat tǝmad n awatay ǝd karadat tǝmǝrwen dǝffǝr tǝhǝwt ǝn Feleg, itilu bararan ǝd tǝbararen.
18 As iga Feleg karadat tǝmǝrwen n awatay daɣ ǝddǝnet eraw Ru. 19 Iga Feleg sanatat tǝmad n awatay ǝd taza dǝffǝr tǝhǝwt ǝn Ru, itilu bararan ǝd tǝbararen.
20 As iga Ru karadat tǝmǝrwen n awatay d ǝššin daɣ ǝddǝnet, eraw Sǝrug. 21 Ru iga sanatat tǝmad n awatay d ǝssa dǝffǝr tǝhǝwt ǝn Sǝrug, itilu bararan ǝd tǝbararen.
22 As iga Sǝrug karadat tǝmǝrwen n awatay daɣ ǝddǝnet eraw Naxor. 23 Iga Sǝrug sanatat tǝmad n awatay dǝffǝr tǝhǝwt ǝn Naxor, itilu bararan ǝd tǝbararen.
24 As iga Naxor sanatat tǝmǝrwen n awatay ǝd taza daɣ ǝddǝnet eraw Terax. 25 Iga Naxor temeday n awatay ǝd maraw ǝd taza dǝffǝr tǝhǝwt ǝn Terax, itilu bararan ǝd tǝbararen.
26 As iga Terax ǝssayat tǝmǝrwen n awatay daɣ ǝddǝnet eraw Abram, ǝd Naxor ǝd Haran.
Attarix n Ibrahim
Attarix ǝn Terax, ǝd tǝzrek-net
27 Ǝnta da ǝzzurrǝyya ǝn Terax. Terax eraw Abram, ǝd Naxor, ǝd Haran. Haran eraw Lot. 28 Haran aba-tu daɣ akal wa daɣ ihǝw, immignat-as abba-net Terax daɣ ǝɣrǝm-nasan Ur wa n Kašdaytan. 29 Izlaf Abram ǝd Naxor: Abram za izlaf Saray, amaran Naxor izlaf Milxa ǝs ketnasnat aššes ǝn Haran a mosnat. 30 Saray wǝr tǝla barar waliyyan fǝlas ǝggǝgru a tǝga. 31 Iddew Terax ǝd rures Abram d ahaya-net Lot ag Haran ǝd tǝdaggalt-net Saray tantut ǝn rures Abram. Ǝgmadan aɣrǝm n Ur wa n Kasdaytan s akal ǝn Kanan. Ǝglan har osan aɣrǝm ǝn Xaran, ǝɣsaran daɣ-as.
32 As tewad tǝɣrǝst ǝn Terax sanatat tǝmad n awatay ǝd sǝmmos, aba-tu daɣ Xaran.