9
1 Iga Mǝššina albaraka daɣ Nux ǝd maddanǝs, inn-asan: «Ǝggǝzat šin n ara tǝttǝyam tǝdkǝram tesayt n amadal. 2 Tawaqqast ǝd hǝrwan ǝd gǝdad ǝd lumǝt-lumǝt ǝd dǝmǝrdǝmaran, ǝd kifitan, ketnasan a tan-tǝggǝz tasa-nawan, iksadan-kawan wǝllen, tǝggǝz tanat-nasan ifassan-nawan. 3 Awa iddaran itimǝtǝkwǝy kul a dawan-iqqǝl išǝtša. Ǝkfeɣ-awan-tan kul zun d ǝmmǝk as kawan-ǝkfeɣ annabatan kul.
4 Mišan ad wǝr tǝtattim isan iha ǝzni, fǝlas isan di wǝr tan-ǝgmedan man. 5 Azzama azni-nawan ǝnta iman-nawan wǝdi ǝssǝnat as a dǝr-ǝs ǝssǝstǝna a iqqal wa igan iman-nawan, gǝr za ǝmudar wala awedan. A iqqal awedan wa igan iman n ǝmidi-net at t-ǝssǝstǝna dǝr-san. 6 I inɣalan azni n awedan, ad itǝwǝnɣǝl ǝzni-net fǝlas awedan šaššelan ǝn Mǝššina as d-itawaxlak. 7 Amaran ǝggǝzat šin ara, tǝttǝyam, tǝdkǝram tesayt n amadal, tǝwǝziwǝzam fall-as.»
8 Inna Mǝššina tolas i Nux ǝd maddanǝs: 9 «A dawan-ǝssǝbdǝdaɣ arkawal ǝn tassaq-in dǝr-wan kawanay d ǝzzurrǝyya-nawan 10 ǝd mudaran kul win dǝr-wan ǝddewnen, gǝr za igǝdad, wala ihǝrwan, wala tawaqqast wala lumǝt-lumǝt wala deɣ idǝmǝrdǝmaran, ǝmosnen imudaran kul win dǝr du-tǝnnǝgmadam aɣlal. Imudaran win, ǝntanay a tu-z-ǝmǝlnen daɣ ǝddǝnet. 11 A dawan-ǝssǝbdǝdaɣ arkawal ǝn tassaq-in dǝr-wan imosan as: "wǝr za tǝlǝs tǝxlǝk a tǝqqal ahluk s ǝlwabil. Wǝr du-z-ilǝs ǝlwabil a z'ihlǝkan ǝddǝnet assa."» 12 Ilas inna: «Ǝnta da asannal n arkawal ǝn tassaq ta dǝr-wan z'aga daɣ tǝzzǝgrǝt n ǝddǝnet, kawanay ǝd tǝxǝllak kul. 13 Ad aga tǝzzǝl-adar daɣ jǝnnawan tǝqqǝl asannal n arkawal ǝn tassaq-in d ǝddǝnet. 14 Id šammašadawa šignawen daɣ jǝnnawan, tǝnafalal-du daɣ-asnat tǝzzǝl-adar, 15 a dat-i d-imǝl arkawal ǝn tassaq-in dǝr-wan, kawanay ǝd tǝxǝllak kul. Amaran wǝr tu-z-ilǝs alwabil a z'ihlǝkan šixǝllak kul emel. 16 I du-tǝnafalal tǝzzǝl-adar daɣ tǝgnawen a daɣ-as ǝswǝda imǝl-du dat-i nak Mǝššina, arkawal iɣlâlan ǝn tassaq-in ǝd tǝxǝllak kul n ǝddǝnet. 17 Ǝnta ǝddi da asannal n arkawal ǝn tassaq-in ǝd tǝxǝllak kul n ǝddǝnet.»
Maddanǝs ǝn Nux
18 Maddanǝs ǝn Nux win d-ǝgmadnen aɣlal ǝmosan Šem, ǝd Xam ǝd Yafet. Xam ǝnta a erawan Kanan. 19 Maddanǝs ǝn Nux a n karad a, ǝntanay a d-ǝgmadan aytedan kul n ǝddǝnet. 20 Nux ǝmagyak a imos. Ǝnta a azzaran anabal n alɣanab. 21 Išwa esmad n alɣanab, immǝswad, ǝfalan-tu sǝlsa-net. Izalallat daɣ ahaket-net izzâf. 22 Xam, s ǝnta a erawan Kanan, as inay šis izzâf igla imal i mǝdrayan-net a n ǝššin. 23 Tǝzzar idkal Šem ǝd Yafet afǝr ǝssǝwaran-tu izeran-nasan ad zimǝzǝnkizan dǝffǝr-san har ǝssǝlsan šissan, mišan wǝr ǝnayan izuf wa iga da, fǝlas ǝssidagan asawad-nasan sas wǝr illa. 24 As okay ǝmǝswǝd Nux issan daɣ arat wa das-iga barar-net wa ǝndǝrran, Xam. 25 Tǝzzar inna Nux:
«Tǝwǝret allaɣanat Kanan.
Iqqǝlet akli wa irasan
daɣ eklan ǝn mǝdrayan-net.»
26 Inna deɣ:
«Igrǝwet Amaɣlol, Ǝmǝli ǝn Šem adkul!
alwet akal-net, ahharaget ǝd Šem,
amaran iqqǝlet Kanan akli ǝn Yafet ǝntada.»