8
1 Mǝššina ikittǝw Nux ǝd mudaran kul win dǝr-ǝs ǝnamahanen aɣlal. Tǝzzar issǝgar-du Mǝššina aḍu fǝl amadal, ǝggazan aman šin afanaz. 2 Ǝzzǝkken aman win sarrutan n amadal ǝd win jǝnnawan. Iffǝsta akonak. 3 As ǝgan aman temeday n ǝzǝl ǝd sǝmmosat tǝmǝrwen ǝggazan šin afanaz. Ad sattakan aman s a ǝndǝrran a ǝndǝrran fǝl amadal. 4 As ǝzǝl wa n maraw d ǝssa daɣ tǝllit ta n ǝssayat, idas ǝɣlal amadal fǝl ǝdɣaɣ wa n Ararat izzǝkkat. 5 Ad ǝfannazan aman har tǝllit ta n marawat. Ǝzǝl wa azzaran ǝn tǝllit ta ǝnta a du-nafalalan fallatan n ǝdɣaɣan.
6 As ǝganat ǝkkozat tǝmǝrwen n ǝzǝl olam Nux taffawt ta iga daɣ ǝɣlal, 7 issǝgla aɣrut, igallin itaqqal-du har ǝstǝkan aman fǝl amadal. 8 Dǝffǝr adi issǝgla tadabert fǝl ad issǝn kud aman ǝfnâzan fǝl tasayt n amadal wala. 9 Mišan tadabert ta ab-as wala id tǝssǝnsa adar-net, tǝqqal-du Nux daɣ ǝɣlal fǝlas amadal kul as t-ǝlsan aman. Izzal-in Nux ǝfus-net ig-et-du daɣ ǝɣlal. 10 Iqqim as ilas igi n ǝssa adan, ilas-tat ǝsǝgli. 11 As tǝga takǝst gǝzzulat tǝqqal-t-idu tǝdâd ala ibdâgan n ašǝk ǝn zaytun, issan Nux amaran as aman ǝfnazan fǝl amadal. 12 As iga ǝssa adan wiyyad ilas ǝsǝgli ǝn tǝdabert. Taklat ten wǝr t-in-tǝles tewaɣlay.
13 Ǝzǝl wa azzaran ǝn tǝllit ta n iyyat n awatay wa n sǝdisat tǝmad d iyyan daɣ tǝɣrǝst ǝn Nux ǝnta ad ǝɣradan aman win alwabil asatak. Tǝzzar ikkas-in Nux ǝsǝfǝl wa n afalla n ǝɣlal, iswad sa ǝd sa inay as amadal zaɣnin iqqur. 14 As iga ǝzǝl wa n sanatat tǝmǝrwen d ǝssa daɣ tǝllit ta n sanatat amadal ketnet iɣrad taɣart.
15 Tǝzzar iššewal Mǝššina i Nux, inn-as: 16 «Ǝgmǝd aɣlal kay ǝd tǝntut-nak ǝd bararan-nak ǝd tǝdoden-nasan; 17 tǝkkǝsa-du daɣ-as imudaran kul win dǝr-ǝk ku-namahanen gǝr win zawwarnen wala win madrornen, arǝwanet igatan. Wǝziwǝzanet daɣ ǝddǝnet.» 18 Igmad-du Nux ǝnta harkid tǝntut-net ǝd bararan-net ǝd tǝdoden-nasan. 19 Imudaran kul ǝhanen win aɣlal gǝr win zawwarnen wala win madrornen, ǝgmadan-t-idu ǝntanay da, nisalkaman ǝmosan ǝzzǝnǝfan. 20 Ikras Nux edag ǝn tǝkutawen y Amaɣlol, obaz-du daɣ mudaran kul win xalalnen ǝd gǝdad kul win xalalnen, igzam-tan fǝl adag wa n tǝkutawen ig-en fall-as y Amaɣlol šikutawen šin tirǝkǝmmitnen. 21 Oggam Amaɣlol takutay ten iqbal-tat. Tǝzzar inna: «Wǝr z'ǝlǝsaɣ ǝsǝwǝr n amadal tulɣant fǝl ǝddǝlil n awedan fǝl as idkar ǝwǝl-net talbast wa n tǝhǝwt-net har iba-net. Wǝr z'ǝlǝsaɣ ahluk ǝn tǝxlǝk tǝddârat a tǝqqal šilat n awa ǝge da.
22 Iket tǝll-ay ǝddǝnet
taggin nabbalan d allayan
d asamed ǝd tuksay
d awelan ǝd tǝgrǝst
d ahad d azal.»