7
1 Inna Amaɣlol i Nux: «Ǝggǝz aɣlal kay d aɣaywan-nak fǝlas ǝnâyaɣ as kay ɣas a dat-i imosan alǝs n alɣadil daɣ azzaman a. 2 Tǝdkǝla yay ǝd tǝntay har ǝssa daggan daɣ ǝkkullu n ǝzzǝnǝf ǝn tawaqqast ǝd hǝrwan win xalalnen, tǝdkǝlaɣ yay ǝd tǝntay ɣas daɣ ǝkkullu n ǝzzǝnǝf win xaramnen. 3 Tǝdkǝlaɣ ǝntada daɣ gǝdad yay ǝd tǝntay har ǝssa daggan daɣ ǝkkullu n ǝzzǝnǝf, fǝl a d-irǝg amasa-nasan. 4 Fǝlas ɣur ǝssa adan a din-assaglaɣ akonak a z'agin ǝkkozat tǝmǝrwen n ǝzǝl, iffây ehad-ezal, ǝmǝsaɣ fǝl tasayt n amadal šixǝllak kul šin d ǝxlaka.» 5 Aratan win kul ig-en Nux ǝs tǝmǝwit tas t-omar Amaɣlol.
6 Nux sǝdisat tǝmad n awatay-net as d-osa ǝlwabil wa ǝddǝnet. 7 Iggaz Nux aɣlal ǝnta ǝd taɣurǝs ǝd maddanǝs ǝd tǝdoden-nasan y a d-ǝrǝgan daɣ alwabil. 8,9 Yay ǝd tǝntay daɣ awa iwaran amadal daɣ ǝzzǝnǝfan ǝn mudaran kul win xalalnen ǝd win xaramnen, gǝr win zawwarnen wala win madrornen, ǝd lumǝt-lumǝt, ǝd dǝmǝrdǝmaran, ǝkkan-du Nux s ǝššin ǝššin. Inamaggaz dǝr-san aɣlal ǝs tǝmǝwit tas t-omar Mǝššina.
10 As ǝgan ǝssa adan, osa-du ǝlwabil ǝddǝnet. 11 Ǝzǝl wa n maraw d ǝssa daɣ tǝllit ta n sanatat n awatay wa n sǝdisat tǝmad daɣ tǝɣrǝst ǝn Nux, ǝnta a d-ǝggǝzzayan aman s assahat daɣ sarrutan n amadal, bajaɣjaɣan-du aman win jǝnnawan ǝntanay da. 12 Iffây akonak fǝl amadal har iga ǝkkozat tǝmǝrwen n ǝzǝl iffây ehad-ezal. 13 Ǝzǝl wen da, ad iggaz Nux aɣlal ǝnta ǝd taɣurǝs, ǝd bararan-net ǝmosnen Šem, Xam ǝd Yafet, ǝd tǝdoden-nasan. 14 Iggaz-tu deɣ amasa daɣ ǝkkullu n ǝzzǝnǝf ǝn tawaqqast d ǝkkullu n ǝzzǝnǝf ǝn hǝrwan, d ǝkkullu n ǝzzǝnǝf ǝn lumǝt-lumǝt ǝd dǝmǝrdǝmaran, d ǝkkullu n ǝzzǝnǝf ǝn gǝdad ǝd maggadan. 15 Ǝzzǝnǝfan ǝn tǝxǝllak kul sanfasnen as tanat-d-ǝgmadan ǝššin ǝššin mudaran ǝmosnen yay ǝd tǝntay, ǝkkan-du Nux inamaggaz dǝr-san aɣlal. 16 Yay ǝd tǝntay, daɣ ǝkkullu n ǝzzǝnǝf a ǝggaznen aɣlal ǝs tǝmǝwit tas omar Mǝššina Nux. Tǝzzar ihar-in fall-as Amaɣlol aɣlal. 17 Iga ǝlwabil ǝkkozat tǝmǝrwen n ǝzǝl iffây fǝl amadal. Ǝggǝzzayan aman, saddakalan aɣlal. 18 Ǝttǝyan aman, ǝggǝzzayan wǝllen, izagaylal fall-asan ǝɣlal. 19 Ǝssǝfalan-du aman har ǝlsan idɣaɣan kul win zagrotnen fǝl tasayt n amadal. 20 Ǝlmazan-tan har tan-okayan ǝs maraw ɣallan ǝd sǝmmos. 21 I tu-tǝlla tǝxlǝk tǝddârat, kul tǝmmut, gǝr za igǝdad, wala ihǝrwan, wala iwǝxsan, wala imudaran win wašankalnen fǝl amadal, wala deɣ aytedan. 22 Awa daɣ izgar infas fǝl azzahir n amadal, kul immut. 23 Imas Amaɣlol a iddâran kul fǝl amadal gǝr za aytedan, wala imudaran, ketnasan as tawamasan fǝl amadal. Nux ɣas a d-iqqiman ǝnta d awa fall-as iggazan aɣlal. 24 Har ǝgan aman temeday n ǝzǝl ǝd sǝmmosat tǝmǝrwen wǝr ǝssǝntan daɣ afanaz.