6
Aššar n aytedan
1-2 As ǝggazan aytedan šin tǝttǝyt wazawazan daɣ ǝddǝnet, ǝnayan maddanǝs ǝn jǝnnawan as aytedan ǝhǝwnat-du daɣ-san tǝbararen hossaynen, sannafranan daɣ-asnat šin oggaman ǝzlafan-tanat. 3 Tǝzzar inna Amaɣlol: «Infas-in wǝr z'iha awedan faw, fǝlas wǝr imos ar ag ǝddǝnet, daɣ adi wǝr za tǝlǝs tǝɣrǝst-net akkay ǝn temeday n awatay ǝd sanatat tǝmǝrwen.» 4 Daɣ azzaman win den ǝd win dǝffǝr-san ǝddǝnet ǝhan-tat jobbaran erâwan maddanǝs ǝn jǝnnawan ǝd tǝbararen n aytedan. Ijobbaran win ǝmosan meddan ǝn mǝssǝrha n azzaman win den.
5 Inay Amaɣlol as aššar n aytedan iggǝt fǝl amadal, ǝnnǝyat ǝn wallan-nasan deɣ faw wǝr tǝddig sa sǝr arak mazalan. 6 Tǝzzar eway-du awen s Amaɣlol as immǝttay iduf-net daɣ ǝxluk wa d-iga awedan, ǝɣšadan man-net. 7 Inna Amaɣlol: «Ad ǝmǝsaɣ awa d-ǝxlaka kul daɣ aytedan, ǝmǝsa deɣ tawaqqast ǝd hǝrwan kul, ǝd lumǝt-lumǝt ǝd dǝmǝrdǝmaran ǝd gǝdad fǝlas iduf-in a sammattaya daɣ ǝxluk-nasan.» 8 Mišan Nux ǝnta igraw arraxmat ɣur Amaɣlol.
Attarix ǝn Nux
Ǝlwabil
9,10 Ǝnta da ǝzzurrǝyya ǝn Nux: Nux alǝs n alɣadil a imos, oɣâdan ɣur aytedan n azzaman-net, oɣad deɣ dat Mǝššina. Nux eraw bararan karad: ǝmosnen Šem, ǝd Xam ǝd Yafet. 11 Daɣ azzaman en, ǝddǝnet tǝɣšâd daɣ iduf ǝn Mǝššina, tǝdkâr talbast. 12 Inay Mǝššina as ǝddǝnet tǝɣšâd fǝlas šixǝllak kul ǝɣšâdan alxalan-nasnat.
13 Inna Mǝššina i Nux: «Tilkamat ǝn tǝmǝddurt ǝn tǝxǝllak kul a du-tosat fǝlas aytedan a d-ewaynen s ǝddǝnet as tǝdkar talbast, adi a fǝl tan-z-ǝhlǝka ǝntanay d amadal kul. 14 Ǝɣrǝf i man-nak aɣlal n aman iknan tǝzzǝwwǝrt, tagaq-qu daɣ ašǝk issohen igân esǝm gofer. Aɣlal wa agu daɣ-as idaggan aggotnen ǝmmizzaynen, taɣmaɣ afalla-net d ammas-net daɣ madɣar ǝn kolta. 15 Ǝnta da tǝmǝwit tas tu-za-tǝɣrǝfa: tǝzzǝgrǝt-net ad tǝqqǝl karadat tǝmad n ǝɣil, tasaga-net tǝqqǝl sǝmmosat tǝmǝrwen n ǝɣil, amaran tǝzzǝgrǝt-net s afalla karadat tǝmǝrwen n ǝɣil. 16 Ag-as ǝsǝfǝl ilan ǝruru iffofen fǝl ad iqqǝl taffawt as du-z-itaggaz ǝnnur. Ǝruru wen, iga dǝnnǝg ǝɣlal ahaku n ǝɣil. Tagaɣ-as tǝsǝhǝrt fǝl iyyat daɣ tǝsǝgwen-net, tagaq-qu karad nan misawarnen. 17 Amaran nak a din-assaglaɣ ǝlwabil s ǝddǝnet fǝl ad ihlǝk a tǝqqal tǝxlǝk tǝsanfasat. Awa ihan ǝddǝnet kul ad ammat. 18 Mišan kay a dak-ǝssǝbdǝdaɣ arkawal ǝn tassaq-in. Ad tǝggǝzaɣ aɣlal wa kay ǝd tǝntut-nak, ǝd bararan-nak ǝd tǝdoden-nasan. 19 Tǝzzugǝzaq-qu yay ǝd tǝntay daɣ ǝkkullu n ǝzzǝnǝf daɣ mudaran, y ad ǝqqǝlan amasa a du-z-irǝgan ǝnta da. 20 A kay-d-asin ǝzzǝnǝfan ǝn mudaran kul s ǝššin ǝššin, ǝgan daɣ gǝdad, ǝd tawaqqast ǝd hǝrwan, d ǝzzǝnǝfan kul ǝn lumǝt-lumǝt ǝd dǝmǝrdǝmaran, fǝl a d-ǝrǝgan. 21 Amaran kay agu allaw daɣ šǝtša kul fǝl a sǝr-san tǝddǝram kay dǝr-san.» 22 Aratan win kul ig-en Nux ǝs tǝmǝwit tas t-omar Mǝššina.