Diib Maghiduniya wa Yunaan
20
La ciic dolat antahat Bulis itta darasa laáka wa xagho atxaadtarayom,
“Daxan xadagko itkum,”
belayom wa asik Maghiduniya tbaggasa.
2 Wa diibba mandtighat jawala ib atxaadtarot inlithaage igilla addaam wa it dangoba Yunaan batsxa.
3 Diiba salas warex kalá.
Wa ghirub abxarot asik Surya inintu la Yahud diddu muámarat laxabko kim hallaw batsxayu ka ib Maghiduniya igil laqaghbil gharrara.
4 Gale sab saafro baaku qalaw wa hitom Subaaturas wad Birros la min Biirya wa Aristarkos wa Sakundos la min Tassaluniiki wa Ghaayus la min Darba wa Tiimusaawus wa bardu Tiikiikos wa Tirufiimos la min mandtighat Aasiya tom.
5 Hitom ghadamena gesaw wa diib Taruwaas tsabbarawna.
6 Wa xagho Qiid Fadtiir xalfa,
min Fiilibbi abxarna wa xagho xamis amqil la biqidaam qarrena diib Taruwaas wa diiba saboq amqil kalána.
Bulis Aftiikus min mot laqaghannits
7 Itta amqilla saamin la salfayit wajbat igil nitxaawal jammaqana wa Bulis la addaam tahaaga wa ajil la amqil la asara safar naawi qala asik migib laali mathaagaay attalaala.
8 Diibba odat la laqaaliit la diiba ijtimqaam qalna anwaar bizxit taxaya qalat.
9 Wa it shibbaak,
mandalaay Aftiikus la litbahal giisyu qala.
Bulis higyaahu inlaáttalaale hitu hirgaate qannatu,
wa kim ghasna min saalsaay dur wadgha wa maayit inintu traffaqa.
10 Ka Bulis tkarra wa aghama ittu wa jareydu dtabdtaba ittu.
Wa bela,
“Simínna ikkum,
xiyaay halla.”
11 Wa xare ib xadiis laqal qarga wa raghiif falma wa balqa wa darbu higyaahu attalaala asik fakaak wa xare saafara.
12 La sab la mandalaay ib xiyaayu asik betu nasáwu wa sanni taqazzaw.
Bulis sab gats Afasus Ghaabiil
13 Xina ghaddamna wa asik Asus abxarna minna Bulis igil nitsqan.
Hitu illa sittaat jallaab asik ken ib aggaar gayis qala sattaya.
14 Waan diib Asus twaajhenna tsaqanaahu wa asik Miitiiliini abxarna.
15 Fajrata min ken abxarna wa miqiddaay Kiyus batsxana.
Wa la amqil laásara jafar Saamus wa itta asara Miiliitos batsxana.
16 Bulis asik min ken Afasus igil laábxir sittut qala min xaalafot waghit diib mandtighat Aasiya igil lishshankak sabab Orshaliim igil libtsax shaafig qala min litghaddaru ghaddemaay Amqil Ximsa.
17 Wa Miiliitos dolat batsxa asik sab gats kaniisat Afasus liíkat laáka wa diiba igil limtsó wa igil lighaabolu dtalba minnom.
18 Waan batsxaw kiínna belayom,
“Intim kafo tnaabarko gokum taámro minna amqil la diib mandtighat Aasiya igir kareko,
19 wa ib tawaadoq iilissatar wa qinbeq ghizir Molaay kadamko wa la jirab la muámaraatta Yahud karetta ichche kahalko.
20 Bataatan min ballaghot wa waqaz ibba laáfaydakum ib qalan wa diib abyaatkum xar yiíbe.
21 La Yahud wa la Yunaaniyiin tfaaneko it Rabbi igil litobu wa ib Molaayna Yasoq igil liímano kim bom.
22 Wa ana aze asik Orshaliim igayis halleko ib darke Rox Ghiddus wa diiba mi kim kiruy iyye halla yiídalle.
23 Ledta ana laámmirru la Rox Ghiddus diib madiinatka kim laxazziranni sijin wa la kirab kim igil twaajhuni tu.
24 Minnaata igil xayochche ghiimat yahayibba ghadam batsex hadafye wa atmamotta muhimat la Molaay Yasoq kallafenni ibba,
igil ib injiil niqimat Rabbi igil ishhad.
25 Ana aamir halleko intim la diib migibkum la ib mamlakat Rabbi waqazko,
oro minkum xagho illa igil lirénni iiko.
26 Yom qallin halleko kim amiin qalko.
Jalliibu ayi minkum mot diima min mayit ghalacce iiko
27 jallaab min atámarotkum ibba Rabbi igil ghasdayu killu gats xar yiíbe.
28 Nafiskum wa la salif la Rox Ghiddus attawqalekkum tu qighabo imbal naafraay.
Talach kaniisat Rabbi la ib damu zaabaya gibó.
29 Aamir halleko xagho gisko karach girgirit diib migibkum igil tigbá tu wa la salif igil timxak iiko.
30 Min fingekum ma,
la amaan la tawu igil lighnatso tu asarom la darasa igil laájlu.
31 Ka iitighfalo wa fighado igil salas sanat xazzarot kil minkum amqil wa laali qinbiqye injannin yaátkaaramko.
32 Illi kiínna inintu,
itta azeta igil Rabbi wa zaqat niqmatu isalmakkum halleko igil tisnadakkum wa meraas igil tahabakkum migib killom la igil nosu qaarayom.
33 Ana fiddat nafar aw dahabu aw libbaasu iiraghabko.
34 Intim noskum taámro ibbilli ideyye maxaagijje wa maxaagiz telyachche kim qaratteq qalko.
35 Diib killu la wadekowu ibbilli shighil tsalliim la xawaanyaam kim igil nisde bina arekokum ib faghudatta zaqat la Molaay Yasoq nosu belaya,
‘Barkat hiyaab min nissá tbazzex.’”
36 Xagho illi bela,
misil killom abraka wa ddaqa.
37 Inlaxaghghufu killom jaamamaw wa saqamawu.
38 Wa millaqal killu la atxazanayom bahalatu xagho illa gatstsu kim igil liráw iiko tu.
Xaariit asikka safiinat saarxawu.